ބޮޑެތި އިނާމުތަކަކާއެކު އެސްޓީއޯ ރަމަޟާން ބާޒާރު ފަށައިފިއެވެ.
އެސްޓީއޯ ހޯމް އިމްޕްރޫވްމަންޓްގައި ބޭއްވި ރަސްމިއްޔާތެއްގައި މި އަހަރުގެ ރަމަޟާން ބާޒާރު ފައްޓަވައިދެއްވީ އެސްޓީއޯގެ ސީއީއޯ އަދި މެނޭޖިންގ ޑިރެކްޓަރ ހުސެން އަމްރު މުހައްމަދު ރަޝާދެވެ.
40 އިންސައްތައާ ހަމައަށް ޑިސްކައުންޓް ލިބޭ މި ޕްރޮމޯޝަން ކުރިއަށް ދާނީ އަންނަ މެއި މަހުގެ 30 ވަނަ ދުވަހާ ހަމައަށެވެ. މި ޕްރޮމޯޝަންގައި ކޮންމެ 1000 ރުފިޔާއިން މަތީގެ ވިޔަފާރިއަކަށް ކޫޕަނެއް ލިބެއެވެ.
މިއަހަރުގެ ރަމަޟާން ބާޒާރާއި ގުޅޭގޮތުން މައުލޫމާތުދެމުން އެސްޓީއޯގެ މީޑިއާ ކޯރޑިނޭޓަރ އަބްދުﷲ މުޙައްމަދު ވިދާޅުވީ، މިއަހަރުގެ ޕްރޮމޯޝަންގެ 1 ވަނައަށް ހޮވޭ ފަރާތަކަށް، 4 ބޭފުޅެއްގެ އުމުރާ ޕެކޭޖެއް އަދި ދެވަނަ އާއި ތިންވަނައަށް ހޮވޭ ފަރާތްތަކަށްވެސް އުމްރާ ދަތުރެއް ދިނުމަށް ހަމަޖެހިފައިވާ ކަމަށެވެ.
" މިއަހަރު ގްރޭންޑް ޕްރައިސްގެ ގޮތުގައި ކަނޑައެޅިފައިވަނީ ހަތް އުމްރާ ދަތުރު، އެގޮތުން އެއްވަނައަށް ހޮވޭ ފަރާތަކަށް 4 ބޭފުޅުންނަށް އުމްރާ ޕެކޭޖެއް، ދެވަނަ އަށް ހޮވޭ ފަރާތަކަށް ދެ ބޭފުޅުން އުމްރާ ދަތުރެއް ދިނުމަށް ހަމަޖެހިފައިވާއިރު، ތިންވަނައަށް ހޮވޭ ފަރާތަކަށްވެސް އުމްރާ ދަތުރެއް ދިނުމަށްވަނީ ހަމަޖެހިފައި،" އަބްދުﷲ ވިދާޅުވިއެވެ.
މީގެ އިތުރުން ހަފްތާއަކު އެއްފަހު ނެގޭ ގުރުއަތުގައިވެސް 10،000 ރުފިޔާއާއި 20،000 ރުފިޔާއާ ދެމެދުގެ އަގުހުރި އިނާމެއް ދިނުމަށްވަނީ ހަމަޖެހިފައިވާ ކަަމަށާއި، ހޯމް އިމްރޫވްމަންޓުން ވިއްކާ ބައެއް ބްރޭންޑްތަކުގެ މުދަލާއެކު ވަގުތުން ހަދިޔާ ދިނުމަށްވެސް ހަމަޖެހިފައިވާކަމަށް އެސްޓީއޯއިން ބުނެއެވެ.
ރަމަޟާން ބާޒާރުގައި އެސްޓީއޯއިން ވަނީ އެ ކުންފުނިން ވިއްކާ ނިޕޯން ވިނިލެކްސް އަދި ނިޕޯން ވިނީލް ސިލްކް ރޭންޖްގެ ކުލަތަކުންވެސް 15 އިންސައްތައިގެ ޑިސްކައުންޓެއް ދޭން ފަށާފައެވެ. މީގެ އިތުރުން އާއްމުންގެ މެދުގައި މަގުބޫލު ފިލިޕްސް އެއަރ ފްރައިޔަރއެކުވެސް ހަދިޔާއެއް ދިނުމަށް ހަމަޖެހިފައިވާ ކަމަށް އެސްޓީއޯއިން ބުނެއެވެ.