ކޮރޯނާވައިރަސްގެ ސަބަބުން އޭޝިޔާއާއި ޔޫރަޕްގެ ބައެއް ޤައުމުތަކުގެ އެކްސްޕޯޓް ދަށަށް ދާން ފަށައިފިއެވެ.
ބައެއް ޤައުމުތަކުގެ އެކްސްޕޯޓް ދަށަށް ދާން ފަށާފައި މިވަނީ، އެޤައުމުތަކުގައި ތަކެތި އުފައްދާ ފަރާތްތަކުން ޗައިނާގެ އުފެއްދުންތަކަށް ބަރޯސާވެފައިވާ މިންވަރުގެ ސަބަބުންނެވެ.
ޔޫރަޕާއި އޭޝިޔާގެ ބައެއް ކާރުހަނާތަކަށް ބޭނުންވާ ތަކެތި ފޯރުކޮށްދޭ އެންމެ ބޮޑު ސަޕްލަޔަރަކީ ޗައިނާކަމަށްވާއިރު، ކޮރޯނާވައިރަސްގެ ސަބަބުން ޗައިނާގެ ކާރުހާނާތައް ބަންދުކުރުމަކީ ދުނިޔޭގެ އެކި ކަންކޮޅުތަކުގައި ހިންގަމުންދާ ކާރުހަނާތަކަށް އޭގެ އަސަރު ވަރަށް ބޮޑަށް ކުރާނެކަމަށް ތަޖުރިބާކާރުން ބުނެއެވެ. އެގޮތުން ޔޫރަޕާއި އޭޝިޔާގެ ބައެއް ޤައުމުތަކުން މިހާރުވެސް ދަނީ އެޤަޢުމުތަކުގެ އިޤްތިޞާދަށް މިއަހަރު ހީނަރުކަމެއް އަންނާނެކަމަށް ބުނަމުންނެވެ.
ޗައިނާއަކީ ޖަރުމަންވިލާތުގެ ވިޔަފާރީގެ ބޮޑު ބައިވެރިޔަކަށްވާއިރު، އެޤައުމުގެ އިޤްތިޞާދަށްވެސް މާބޮޑު ކުރިއެރުމެއް ނާންނާނެކަމަށް އެޤައުމުގެ ފިނޭންސް މިނިސްޓްރީން ވަނީ ހާމަކޮށްފައެވެ. އަދި އިޤްތިޞާދީ ހީނަރުކަމެއް އޮތްވާ، ކޮރޯނާވައިރަސް ފެތުރެން ފެށުމަކީ ޔޫރަޕްގެވެސް އެންމެ ބޮޑު އިޤްތިޞާދުކަމަށްވާ ޖަރުމަންވިލާތަށް ކުރިމަތިވާނޭ އިތުރު ގޮންޖެހުމެއްކަމަށް އެޤައުމުގެ ކަމާބެހޭ ފަރާތްތަކުން ބުނެއެވެ.
ޖަރުމަންވިލާތުގެ އިތުރުން، ޗައިނާއާއެކު ވިޔަފާރީގެ ގާތް ގުޅުމެއް ބާއްވާ ދެކުނު ކޮރެޔާގެ އިޤްތިޞާދަށްވެސް އަންނަނީ ކޮރޯނާވައިރަސްގެ ސަބަބުން ކުރިމަތިވަމުންދާ ކަންކަމުގެ އަސަރުތައް ކުރަމުންނެވެ. އެގޮތުން މިދިޔަ އަހަރުގެ ފެބްރުއަރީމަހު ޗައިނާގެ އެކްސްޕޯޓް 12.4 ޕަސަންޓް ކުރިއަރާފައިވާއިރު، މިމަހު ވަނީ އެކްސްޕޯޓް 3.7 އިންސައްތަ ދަށަށް ގޮސްފައެވެ.
ކޮރޯނާވައިރަސްގެ ސަބަބުން ދުނިޔޭގެ އިޤްތިޞާދަށް ކުރިމަތިވެދާނެ ހީނަރުކަމަކުން ސަލާމަތްވުމަށް ވަރަށް ގިނަ މަސައްކަތްތައް ދަނީ ޤައުމުތަކުން ކުރަމުންނެވެ. މިދިޔަ އަހަރު ދުނިޔޭގެ އިޤްތިޞާދު ކުޑަކޮށް އަޑި އަޅާލުމަށްފަހު، މިއަހަރު ދުނިޔޭގެ އިޤްތިޞާދަށް ކުރިއެރުންތަކެއް އަންނާނެކަމަށް ތަޖުރިބާކާރުން ތިބީ ބަލައިގެނެވެ. ނަމަވެސް ކޮރޯނާވައިރަސްގެ ސަބަބުން ތަޖުރިބާކާރުންގެ ލަފާކުރުންތައް ދަނީ ބަދަލުކުރަމުންނެވެ.