އެމެރިކާގެ މަޝްހޫރު ޓީވީ ނެޓްވޯކް، ސީއެންއެންއިން ހޮވި ދުނިޔޭގެ އެންމެ ރޮމޭންޓިކް މަންޒިލްތަކުގެ ލިސްޓުގެ 1 ވަނަ ރާއްޖެއަށް ލިބިއްޖެއެވެ.
ސީއެންއެން އިން ހޮވި ދުނިޔޭގެ އެންމެ ރޮމޭންޓިކް މަންޒިލްތަކުގެ ލިސްޓުގެ 1 ވަނަ ރާއްޖެއަށް ލިބިފައިވާއިރު، މި ލިސްޓުގައި 13 ޤައުމެއް ހިމެނެއެވެ. މި ލިސްޓުގެ 2 ވަނަ ލިބިފައިވަނީ ކެނެޑާގެ ކީބެކް ސިޓީއެވެ. އަދި ތިންވަނައަށް ހޮވިފައިވަނީ އިޓަލީގެ ޓަސްކަނީއެވެ.
މި ލިސްޓުގައި ފަތުރުވެރިކަމުގެ ސިނާއަތުގައި ހޮވާލެވޭ މަންޒިލްތަށް ކަމަށްވާ ބޯރާ ބޯރާ އަދި ހަވާއީ ފަދަ މަންޒިލްތައްވެސް ހިމެނެއެވެ.
ލޯބިވެެރިންގެ މެދުގައި އެންމެ ކަމުދާ މަންޒިލަކަށް ރާއްޖެ ހޮވާފައިވާއިރު، ސީއެންއެންއިން ވަނީ ރާއްޖޭގެ ރީތިކަމަށް ވަރަށް ބޮޑަށް ތައުރީފުކޮށްފައެވެ. އެގޮތުން ރާއްޖޭގެ ގޮނޑުދޮށްތަކާއި މޫދު އަޑީގެ ގުދުރަތީ ރީތިކަމަށް ވަނީ ތައުރީފްކޮށްފައެވެ.
އެންމެ ރޮމޭންޓިކް މަންޒިލަކަށް ރާއްޖެ ހޮވިފައިވާއިރު، ރާއްޖެއަކީ ލޯބިވެރިންގެ މެދުގައި މަޤްބޫލް މަންޒިލެކެވެ. އެގޮތުން ރާއްޖެއަށް ޒިޔާރަތްކުރާ ފަތުރުވެރިންގެ ތެރޭގައި އެންމެ ގިނައީ ހަނީމޫނަށް އަންނަ ފަތުރުވެރިންނެވެ.
ސީއެންއެންއިން ހޮވި އެންމެ ރޮމޭންޓިކް މަންޒިލަކަށް ރާއްޖެ ހޮވިފައިވާއިރު، ސީއެންއެންއަކީ އެތައް މިލިއަން ބަޔަކު ބަލާ ޓީވީ ނެޓްވޯކެކެވެ. ސީއެންއެން ފަދަ ނެޓްވޯކްތަކުގެ ލިސްޓުތަކުން ރާއްޖޭގެ ފަތުރުވެރިކަން ޕްރޮމޯޓްވެގެންދާއިރު، ސަރުކާރުން މަސައްކަތްކުރަމުންދަނީ ފަތުރުވެރިކަމުގެ އެކި ދާއިރާތަކުން ރާއްޖެ އިޝްތިހާރުކޮށް، ރާއްޖެ ޒިޔާރަތްކުރާ ފަތުރުވެރިންގެ އަދަދު އިތުރުކުރުމެވެ.
މިދިޔަ އަހަރު ރާއްޖެއަށް 1.7 މިލިއަން ފަތުރުވެރިން ޒިޔާރަތްކޮށްފައިވާއިރު، ސަރުކާރުގެ އަމާޒަކީ މިއަހަރު 2 މިލިއަން ފަތުރުވެރިން ރާއްޖެ ގެނައުމެވެ.