ނުރައްކާތެރި ކޮރޯނާވައިރަސް، ކޯވިޑް-19ގެ ސަބަބުން ބަންދުކޮށްފައިވާ ޗައިނާއާއި ވިއެޓްނާމު ގުޅޭ ސަރަޙައްދީ ރޮނގު ހުޅުވުމަށްފަހު ވިއެޓްނާމުގެ ވިޔަފާރި މުދާ އަނެއްކާވެސް ޗައިނާއަށް ފޮނުވަންފަށައިފިއެވެ.
ވިއެޓްނާމުގެ ސަރުކާރުން ބުނެފައިވަނީ ސަރަޙައްދީ ރޮނގު ހުޅުވީ ކޯވިޑް-19ގެ ސަބަބުން އިޤްތިޞާދަށް ލިބެމުންދާ ގެއްލުންތައް ކުޑަކުރުމުގެ ބޭނުމުގައިކަމަށެވެ. ޗައިނާއަކީ ވިއެޓްނާމުގެ އެންމެ ބޮޑު ވިޔަފާރީގެ ބައިވެރިޔާއެވެ. ވިއެޓްނާމުގެ އުފެއްދުންތެރިކަމުގެ ސިނާއަތް ބަރާސޯވެފައިވަނީ ޗައިނާއިން އެތެރެކުރާ ސާމާނަށެވެ. އަދި ޗައިނާއިންދަނީ ވިއެޓްނާމުގައި އުފައްދާ ގިނަ ޢަދަދެއްގެ ގޮވާން އެޤައުމަށް އެތެރެކުރަމުންނެވެ.
ޗައިނާއާ ގުޅޭ ސަރަޙައްދީ ރޮނގު ވިއެޓްނާމުގެ ސަރުކާރުން ބަންދުކޮށްފައިވަނީ މިމަހުގެ 5ވަނަ ދުވަހުއެވެ. އަލުން ސަރަޙައްދީ ރޮނގު ހުޅުވުމާއެކު ވިއެޓްނާމުގެ ގިނަ ޢަދަދެއްގެ މުދާއުފުލާ އުޅަނދުވަނީ ޗައިނާއަށް އެތެރެވެފައެވެ. އަދި ސަރަޙައްދީ ރޮނގުގައި ޙަރަކާތްތެރިވާ ކަސްޓަމްސްގެ އޮފިސަރުން މާސްކު އަޅައިގެން ޙަރަކާތްތެރިވާ މަންޒަރުވަނީ ފެނިފައެވެ.
ޗައިނާގެ ހޫބައި ޕްރޮވިންސްގެ ވުހާން ސިޓީގައި އެންމެ ފުރަތަމަ ފެތުރެން ފެށި ކޯވިޑް-19ވަނީ ވިއެޓްނާމުގެ 16 މީހަކަށް ޖެހިފައެވެ.