އަވަސް އަރުވާލައިގެން އެމެރިކާއާއެކު ވިޔަފާރީގެ އެއްބަސްވުމެއް އެކުލަވާލާކަށް ބޭނުމެއް ނޫން: އިންޑިޔާ

އަވަސް އަރުވާލައިގެން އެމެރިކާއާއެކު ވިޔަފާރީގެ އެއްބަސްވުމެއް އެކުލަވާލަން މަސައްކަތް ނުކުރާނެކަމަށް އިންޑިޔާގެ ޚާރިޖީ ވުޒާރާއިން ބުނެފިއެވެ. އިންޑިޔާގެ ޚާރިޖީ ވުޒާރާއިން އެގޮތަށް ބުނެފައިވަނީ ރަސްމީ ދަތުރެއްގައި އެމެރިކާގެ ރައީސް ޑޮނަލްޑް ޓްރަމްޕް އިންޑިޔާއަށް ދަތުރުކުރެއްވުމަށް ހަމަޖެހިފައިވަނިކޮށެވެ.

އެމެރިކާގެ ރައީސް ޓްރަމްޕުގެ ދަތުރުގައި އިންޑިޔާގެ ވެރިރަށް ނިއު ދިއްލީގެ އިތުރުން ގުޖުރާތަށް ވަޑައިގަތުމަށްވަނީ ހަމަޖެހިފައެވެ. އަދި އިންޑިޔާގެ ބޮޑުވަޒީރު ނަރެންދްރަ މޯދީއާއެކު ރަސްމީ ވާހަކަތައް ބޭއްވުމަށްވަނީ ހަމަޖެހިފައެވެ. މީގެ އިތުރުން، އިންޑިޔާގެ ބޮޑެތި ވިޔަފާރި ކުންފުނިތަކުގެ އިސްވެރިންނާވެސް ޓްރަމްޕް ބައްދަލުކުރައްވާނެއެވެ.

އިންޑިޔާއާއި އެމެރިކާއިން މަސައްކަތްކުރަމުންދަނީ ދަތުރުގެ ތެރެއިން ދެޤައުމުގެ ދެމެދުގައި ވިޔަފާރީގެ އެއްބަސްވުމެއް ޤާއިމުކުރުމަށެވެ. އެއްބަސްވުމެއް އެކުލަވާލުމަށް މަސައްކަތްކުރަނީ ދެޤައުމުން ދެމެދުގައި ކުރާ ވިޔަފާރިން ނަގާ ޓެކްސްގެ ނިސްބަތް ކުޑަކުރުމަށާއި އެމެރިކާގެ ބާޒާރަށް ނެރޭ އިންޑިޔާގެ އެއްގަމު މަހާއި ކިރުގެ ބާވަތްތަކާ ގުޅޭގޮތުންނެވެ.

ޗައިނާއަށްފަހު، އެމެރިކާއަކީ އިންޑިޔާގެ އެންމެ ބޮޑު ވިޔަފާރީގެ ބައިވެރިޔާއެވެ. 2018ވަނަ އަހަރު ދެޤައުމުގެ ދެމެދުކޮށްފައިވާ ވިޔަފާރީގެ އަގު 142.16 މިލިއަން އެމެރިކާ ޑޮލަރަށް އަރައެވެ.