ދިވެހި ފޮތް ކިޔުމަށް ކުދިންގެ ހިތްތަކުގައި ލޯބި ޖެއްސުމުގެ މަގުސަދުގައި ދިވެހި ބަހުގެ އެކަޑަމީން ފޮތް ކިޔުމުގެ ޚާއްސަ ހަވީރެއް ބާއްވާއިފިއެވެ.
ހިނގަމުން ހިނގަމުން ކިޔަމާގެ ނަމުގައި ކުރިއަށް ގެންދިޔަ މި ހަވީރުގައި ގިނަ ޢަދަދެއްގެ ކުޑަކުދިން ވަނީ ވާހަކަކިޔުމުގައި ބައިވެރިވެފައެވެ.
ކުޑަކުދިންގެ މެދުގައި ފޮތް ކިޔުމަށް ޝައުގުވެރިކަން އުފައްދައި ދިވެހި ބަހުގެ އެކި ބައިތަކަށް އަހުލުވެރިކުރުމުގެ މަގުސަދުގައި ދިވެހި ބަހުގެ އެކަޑަމީން ކުރަމުން އަންނަ މަސައްކަތުގެ ތެރެއިން ޚާއްސަ ފޮތް ކިޔުމުގެ ހަވީރެއް ބާއްވާފައި ހޮނިހިރު ދުވަހުގެ ހަވީރުގައެވެ. މިއަހަރުގެ މާދަރީ މަހުގެ ދުވަސް ފާހަގަކުރުމަށް އަހަރު ތެރެއަށް ބަހާލައިގެން ކުރިއަށްގެންދާ މި ޙަރަކާތްތަކުގެ ބޭނުމަކީ ކުދިންގެ ހިތްތަކުގައި ބަހަށް ލޯބިޖެއްސުންކަމުގައި ބަހުގެ އެކަޑަމީން ވިދާޅުވެއެވެ.
"ހިނގަމުން ހިނގަމުން ކިޔަމާ" ހަވީރު ޝަރަފުވެރިކޮށްދެއްވާ ވާހަކަފުޅުދައްކަވަމުން މިނިސްޓްރީ އޮފް އެޑިއުކޭޝަންގެ ސްޓޭޓް މިނިސްޓަރ ޑރ.ޢަބްދުﷲ ރަޝީދު ވިދާޅުވީ ދިވެހި ބަހަކީ ހުރިހާ މައިދަނެއްގައިވެސް ކުދިންގެ ތަޢުލީމު ކުރިއެރުވުމަށް މުހިއްމު އެއްޗެއްކަމަށެވެ. އެގޮތުން ދިވެހި ބަހާއި ދުރުވެގެން އެހެން މާއްދާތައް ކިޔެވުމުގައިވެސް ކުދިންނަށް ގިނަ ފަހަރަށް ދަތިތަކާއި ކުރިމަތިވާކަމަށް ސްޓޭޓް މިނިސްޓަރ ވިދާޅުވިއެވެ.
މިރަސްމިއްޔާތުގައި ވާހަކަފުޅުދައްކަވަމުން ދިވެހި ބަހުގެ އެކަޑަމީގެ ރައިސް ޢަޝްރަފް ޢަލީ ވިދާޅުވީ ބައެއް ބެލެނިވެރިން ތަހުޒީބު ގޮތްކަމަށް ދެކިގެން ގޭތެރޭގައި ދަރިންނާއި ދެބަސް މަސްހުނިކޮށްގެން ވާހަކަދެއްކުން ހުއްޓާލަންޖެހޭކަމަށެވެ. ސަބަބކީ އެއީ ކުއްޖާގެ ކުރިއެރުމަށް ބޮޑު ހުރަސްތަކެއް ކުރިމަތިވާކަމެއްކަމަށް ޢަޝްރަފް ވިދާޅުވިއެވެ.