ކޮރޯނާވައިރަހަށް ޕޮޒިޓިވްވި މީހުންގެތެރެއިން ޗައިނާގެ ހޮސްޕޮޓަލެއްގައި ފަރުވާ ދެމުން އައި ޢުމުރުން 91 އަހަރުގެ މީހަކު ފަރުވާއަށް ފަހު ރަނގަޅުވެގެން ގެއަށް ދޫކޮށްލައިފިއެވެ. މިއީ މިހާތަނަށް މިވައިރަސްއަށް ޕޮޒިޓިވްވި މީހުންގެ ތެރެއިން ޢުމުރުން މިހާދުވަސްވީ މީހަކު ރަނގަޅުވި ފުރަތަމަ ފަހަރެވެ.
ނޮވެލް ކޮރޯނާވައިރަހަކީ ދުނިޔެއިން މުޅިންއަލަށް ފެނިގެންދިޔަ ވައިރެހެކެވެ. ހަލުވި ކަމާއެކު މުޅި ޗައިނާއަށާއި ދުނިޔޭގެ ގިނަ ޤައުމުތަކަށް މި ވައިރަސް ފެތުރިފައިވާއިރު ވައިރަސްގެ ހުރިހާ ހަގީގަތެއް އަދިވެސް ހޯދިފައެއް ނުވެއެވެ.
މިހާތަނަށް ހޯދިފައިވާ ހޯދުންތަކުން ދައްކާގޮތުގައި މިވައިރަސްގެ ސަބަބުން އެންމެ ބޮޑަށް ނުރައްކަލީ ފުއްޕާމޭގެ މައްސަލަ ހުންނަ މީހުންނާއި ނޭވާލާ ނިޒާމުގެ ބަލިތއްހުރި މީހުންނާއި ދިފާޢީ ނިޒާމުގެ ބަލިކަށި ތުއްތު ކުދިންނާއި ވައިރަހާ ހަނގުރާމަކުރެވޭނެ ބާރު، ދިފާޢީ ނިޒާމުގައި ނެތް ޢުމުރުން ދުވަސްވީ މީހުންނެވެ. އެހެންނަމަވެސް މިކަމުގައި މިހާތަނަށް ހޯދިފައިވާ ހޯދުންތަކަށް އިތުރު ހަރުފަތަކަށް ގެންދެވޭނެ މަގު ފަހިވެގެން ދިޔަ މިވައިރަސްއާ ހަނގުރާމަކޮށް 91 އަހަރުގެ ޗައިނާ މީހަކު ރަނގަޅުވި ހިސާބުންނެވެ.
މިދިޔަ މަހުގެ 23ވަނަ ދުވަހު ޗައިނާގައި މިވައިރަސް ޢާއްމުވި ސެންޓްރަލް ޗައިނާގެ ހުބޭ ޕްރޮވިންސްގެ "ދަ ތަރޑް ޕީޕަލްސް ހޮސްޕިޓަލް އޮފް ޔީޗަންގ"ގައި ވޭންގ އެޑްމިޓުކޮށް އޭނާއަށް ފަރުވާ ކުރަމުންއައީ ވައިރަސްގެ ސަބަބުން ފެންނަމުންދިޔަ ޢަލާމާތްތަކަށެވެ. ވޭންގގެ ފަރުވާއަށްފަހު 15 ދުވަސް ފަހުން މުޅިން ރަނގަޅުވުމުން އޭނާ ހޮސްޕިޓަލުން ދޫކޮށްލީ ހުކުރު ދުވަހުގައެވެ. ވޭންގ ވަނީ އެނާ ރަނގަޅުވުމުން އެކަމާ ވަރަށް އުފާވާކަމަށް ބުނެފައެވެ. އަދި އޭނާއަށް ފަރުވާ ކުރުމުގައި ޙަރަކާތްތެރިވި ހުރިހާ މެޑިކަލް އޮފިސަރުންނާއި މުވައްސާސަތަކުގެ ދައުރާއި ކަނބޮޑުވުމާއި އަޅާލުން އޭނާ ވަނީ ފާހަގަކޮށްފައެވެ.
ވޭންގަކީ މިހާތަނަށް ކޮރޯނާ ވައިރަސްއަށް ޕޮޒިޓިވްވި މީހުންގެ ތެރެއިން މިބަލިން މުޅިން ރަނގަޅުވި އުމުރުން އެންމެ ދުވަސްވީ މީހާއެވެ. މިއާއެކު ކޮރޯނާ ވައިރަސްގެ ހޯދުންތަކާއި މިއަށް ހޯދަމުން އަންނަ ފަރުވާ ހޯދުމަށް ރެއާއިދުވާ އެއްކުރަމުން އަންނަ ސައިންސްވެރިންނަށާއި މިބައްޔާ ދެކޮޅަށް މަސައްކަތްކުރަމުން އަންނަ ޑޮކްޓަރުންނަށްވަނީ އިތުރު ހިތްވަރެއް ލިބިފައެވެ. އަދި މިވަގުތު ދެމުންދާ ފަރުވާތައް އިތުރަށް ހަރުދަނާކޮށް ކުރިއަށް ގެންދިޔުމާމެދު އޮތް ޔަގީންކަން މިވަނީ އިތުރުވެގެން ގޮސްފައެވެ.
މީގެ އިތުރުން އުމުރުން ދުވަސް ވީނަނަމަވެސް ކޮރޯނާ ވައިރަސްއާއި ހަނގުރާމަކޮށް މިބަލިން އެއްކޮށް ރަނގަޅުވާނެކަމުގެ ޔަގީންކަން ލިބިގެން ދިޔުމަކީ މިވަގުތު ޗައިނާގެ ސިއްޙީ ޚިދުމަތްދޭ އިދާރާތަކަށް ލިބިގެންދިޔަ ވަރަށް ބޮޑު ކުރިއެރުމެއްގެ ގޮތުގައި "ދަ ތަރޑް ޕީޕަލްސް ހޮސްޕިޓަލް އޮފް ޔީޗަންގ"ގެ އިސްވެރިން ފާހަގަކުރައްވައެވެ.
ކޮރޯނަ ވައިރަސް އެންމެ ބޮޑަށް ފެތުރިފައިވާ ޗައިނާގައި ބުދަ ދުވަހު ވިހެއި ކުއްޖަކު ކޮރޯނާއަށް ޕޮޒިޓިވް ވުމާއިވެސް ގިނަބައެއްގެ ކަންބޮޑުވުންތަކެއްވަނީ ގުޅިފައެވެ. އެހެންނަމަވެސް މިހާތަނަށް މިއީ ކުއްޖާގެ މަންމަގެ ބަނޑުގައި އޮވެގެން ދަރިފުޅަށް މިވައިރަސްގެ އަސަރުކުރީކަމަށް ބުނެވެވޭން ނެތްކަމަށް ޗައިނާގެ ކަމާބެހޭ ފަރާތްތަކުން ހާމަކުރެއެވެ. އަދި ބޮޑަށް ބުރަވެވެނީ މިއީ ވިހެއުމުގެ ތެރޭގައި ނުވަތަ އޭގެ ފަހުން ކުއްޖާގެ ގައިގައި އަތްލުމުގެ ސަބަބުން ވައިރަސްގެ އަސަރުކުރީކަމަށް ޗައިނާގެ ކަމާބެހޭ ފަރާތްތަކުންވަނީ ހާމަކޮށްފައެވެ. އަދި މިހާރު މިކުއްޖާގެ ޙާލުވެސް ރަނގަޅުވަމުން އަންނަކަމަށް ޚަބަރުތައް ބުނެއެވެ.
ކޮރޯނާ ވައިރަސް އެންމެ ފުރަތަމަ ޢާއްމުވެފައިވަނީ ޗައިނާގެ ހޫބެއި ޕްރޮވިންސްގެ ވުހާން ސިޓީންނެވެ. އެހެންނަމަވެސް މިހާރު މުޅި ޗައިނާއަށް މިވައިރަސް ފެތުރިފައިވާއިރު ވައިރަސްގެ ސަބަބުން 560 އަށްވުރެ ގިނަ މީހުން ޗައިނާއިން ވަނީ މަރުވެފައެވެ.