ސަރުކާރުގެ ޚަރަދުތައް ކުޑަކުރަން ފިނޭންސް މިނިސްޓްރީން ސަރުކާރުގެ ވުޒާރާތަކަށް އަންގަވައިފިއެވެ.
ސަރުކާރުގެ ޚަރަދުތައް ކުޑަކުރުމަށް ފިނޭންސް މިނިސްޓްރީން އެންގީ މިހާރު ދުނިޔޭގައި ހަލުވިކަމާއެކު ފެތުރެމުން އަންނަ ނޮވެލް ކޮރޯނާ ވައިރަސްގެ ސަބަބުން ދުނިޔޭގެ އިޤްތިޞާދަށް އަންނަމުންދާ ބަދަލުތަކާއި ގުޅިގެން ދިވެހިރާއްޖޭގެ އިޤްތިޞާދަށްވެސް މީގެ ނޭދެވޭ އަސަރު ކުރާނެކަމަށް ލަފާކުރެވޭތީއެވެ. އެގޮތުން މި އަހަރަށް ފާސްކޮށްފައިވާ ބަޖެޓްގައި ލަފާކޮށްފައިވާ މިންވަރަށްވުރެ އާމްދަނީ ދަށްވުމަކީ އެކަށީގެންވާކަމެއްކަމަށް ފިނޭންސްއިން ވިދާޅުވެއެވެ.
ޚަރަދު ކުޑަކުރުމުގެ ގޮތުން އަޅަން އަންގާފައިވާ ފިޔަވަޅުތަކުގެ ތެރޭގައި ބަޖެޓުން ޚަރަދުކުރާ ގޮތަށް އާ މަޤާމުތައް ނުއުފެއްދުމާއި ފިނޭންސްގެ ހުއްދަ ލިބިގެން މެނުވީ މުސާރައިގެ އޮނިގަނޑުތަކަށް ބަދަލެއް ނުގެނައުން ހިމެނެއެވެ. މީގެއިތުރުން ރަސްމީ ބޭނުމުގައި ރާއްޖެއިން ބޭރަށް ކޮންމެހެން ކުރަންޖެހޭ ދަތުރުތައް ނޫނީ ނުކުރުމާއި، އަދި ދަތުރުތައް ކުރަންޖެހިއްޖެނަމަ ޚަރަދުތައް ވީހާވެސް ކުޑަވާނެގޮތަކަށް ދަތުރުތައް ރޭވުމަށްވެސް ފިނޭންސްއިން ވަނީ އަންގާފައެވެ. އަދި ސަރުކާރުގެ އޮފީސްތަކުގައި އިތުރުގަޑީގައި މަސައްކަތްކުރަން ނުޖެހޭގޮތަށް މަސައްކަތް ރޭވުމަށްވެސް ފިނޭންސްއިން ވަނީ ސަރުކާރުގެ ވުޒާރާތަކަށް އަންގަވާފައެވެ.
ކޮރޯނާ ވައިރަސްގެ ސަބަބުން އިޤްތިޞާދަށް ލިބިދާނެ ގެއްލުމަކުން ސަލާމަތްވުމަށް ރާއްޖެއިން މަސައްކަތް ފަށާފައިވާއިރު، މި ވައިރަސް ފެތުރެމުންދާ ޤައުމުތަކުންވެސް ދަނީ އިޤްތިޞާދަށް ކޮށްފާނެ އަސަރުތައް ދިރާސާކޮށް، އެކަމާ ގުޅިގެން އަޅަންޖެހޭ ފިޔަވަޅުތައް އަޅަމުންނެވެ.