ޗައިނާއިން ދުނިޔޭގެ އެހެން ސަރަޙައްދުތަކަށް ހަލުވިކަމާއެކު ފެތުރެމުންދާ ކޮރޯނާވައިރަސް ޖެހިގެން ފުރަތަމަ ފަހަރަށް އެޤައުމުން ބޭރުގައި މީހަކު މަރުވެއްޖެއެވެ.
މަޢުލޫމާތު ލިބިފައިވާގޮތުގައި އެމީހާ މަރުވެފައިވަނީ ފިލިޕީންސްގައެވެ. އެމީހާއަކީ ކޮރޯނާވައިރަސް އެންމެ ފުރަތަމަ ފެނުނު ޗައިނާގެ ވުހާނަށް ނިސްބަތްވާ އުމުރުން 44 އަހަރުގެ ފިރިހެނެކެވެ. އެމީހާ މަރުވެފައިވަނީ ފަރުވާ ދެނިކޮށް ފުއްޕާމޭގައި ފެން އުފެދިގެންނެވެ.
މިދިޔަ އަހަރުގެ ފަހުކޮޅު ޗައިނާގެ ވުހާނުން ފުރަތަމަ ފެނުނު ވައިރަސް މިހާރުވަނީ ދުނިޔޭގެ 27 ޤައުމަކަށް ފެތުރިފައެވެ. ކޮރޯނާވައިރަސްގެ އަސަރު 14،500އަށްވުރެ ގިނަ މީހުންނަށްކޮށް، 300އަށްވުރެ ގިނަ މީހުންވަނީ މަރުވެފައެވެ.
ކޮރޯނާވައިރަސްގެ ސަބަބުން ދުނިޔޭގެ ސިއްޙަތު ޖަމްޢިއްޔާ ޑަބްލިއުއެޗްއޯއިންވަނީ ދުނިޔޭގައި ސިއްޙީ ކުއްލި ނުރައްކަލުގެ ޙާލަތު އިޢުލާނުކޮށްފައެވެ. އަދި ގިނަ ޤައުމުތަކުން ޗައިނާއަށް ކުރަމުންދާ ދަތުރުތައް މެދުކަނޑާލާ، ޗައިނާއަށް ދަތުރުނުކުރުމަށްވެސްވަނީ އަންގާފައެވެ.