އެމްޑީޕީގެ ލޯކަލް ކައުންސިލް އިންތިޚާބުގެ ޕްރައިމެރީގައި ސިޓީތަކުގައި މިވަގުތު ތިއްބެވި ހުރިހާ މޭޔަރުންނަށް ނާކާމިޔާބީ އާއި ކުރިމަތިލާން ޖެހިއްޖެއެވެ.
ލޯކަލް ކައުންސިލްގެ ޤާނޫނަށް ގެނައި އިސްލާހާއި އެކު މާލެ ސިޓީއާއި އައްޑޫ ސިޓީގެ އިތުރުން ފުވައްމުލަކު ސިޓީގެ މޭޔަރުވެސް އާ ދައުރަކަށް ކުރިމަތިލެއްވުމަށް ޕްރައިމެރީގައި ވާދަކުރެއްވިއެވެ.
މާލޭގެ މިހާރުގެ މޭޔަރު ސިފާ މުހައްމަދު ބަލި ކުރައްވާ މާލޭގެ މޭޔަރުކަމުގެ ޕާޓީ ޓިކެޓް ކާމިޔާބު ކުރެއްވީ ޕާޓީގެ ސެކެރެޓަރީ ޖެނެރަލްކަންވެސް ކުރައްވަމުން ގެންދަވާ އަނަސް އަބްދުއް ސައްތާރެވެ. އަނަސް ސިފާގެ މައްޗަށް ކުރި ހޯއްދަވާފައިވަނީ 200 ވުރެ ގިނަ ވޯޓުގެ ތަފާތަކުންނެވެ.
އެމްޑީޕީން މިހާތަނަށް އާއްމުކޮށްފައިވާ ނަތިޖާ ދައްކާގޮތުން މިހާރުގެ މޭޔަރު ސިފާއަށް ލިބިވަޑައިގަތީ 835 ވޯޓެވެ. އަނަސް އިންތިހާބު ކާމިޔާބުކުރެއްވީ 1025 ވޯޓާއި އެކުއެވެ. މި ޕްރައިމެރީގައި މާލޭގެ މޭޔަރުކަމަށް ކުރިމަތިލެއްވި ބޭފުޅުންގެ ތެރެއިން ތިންވަނާގައި އޮތީ މާލޭގެ ފުރަތަމަ މޭޔަރުކަން ކުރެއްވި އާދަމް މަނިކެވެ. އޭނާއަށް ލިބިވަޑައިގަތީ 780 ވޯޓެވެ.
މާލޭ ސިޓީގެ އިތުރުން މިދިޔަ ތިން ދައުރު އައްޑޫ ސިޓީގެ މޭޔަރަކަށް ހުންނެވި ޢަބްދުﷲ ޞާދިޤް (ސޯބެ) އަށްވެސް ވަނީ ޕްރއިމެރީގައި ނާކާމިޔާބީ އާއި ކުރިމަތިލާން ޖެހިފައެވެ. އެނާ ބަލިކުރައްވާ އައްޑޫ ސިޓީގެ މޭޔަރުކަމުގެ ޓިކެޓް ޔަގީންކުރެއްވީ ރައްޔިތުން މަޖިލީހުގެ ހިތަދޫ އުތުރު ދާއިރާގެ ކުރީގެ މެންބަރު ޢަލީ ނިޒާރުއެވެ. ޞާދިޤް ކުރީގައި އުޅޭކަމަށް ދައްކަނީ އޭނާ ނިސްބަތްވާ ހިތަދޫ އުތުރު ދާއިރާގެ ވޯޓުގެ ނަތީޖާއިން އެކަނިއެވެ. އައްޑޫ ސިޓީގެ މޭޔަރުކަމަށް ޞާދިޤާއި ނިޒާރުގެ އިތުރުން ދެން ވާދަކުރެއްވީ އެ ދާއިރާގެ ރައީސް އަޙްމަދު އަދުހަމެވެ.
މީގެ އިތުރުން ފުވައްމުލައް ސިޓީގެ މިހާރުގެ މޭޔަރު ޢަބްދުﷲ ފަލާހު ފަހަތައް ޖައްސާލުމަށްފަހު ޕްރައިމަރީގައި ފުވައްމުލަކު ސިޓީގެ މޭޔަރުކަމަށް ވާދަކުރާން ޕާޓީގެ ޓިކެޓް ކަށަވަރުކޮށްފައިވަނީ އިސްމާޢިލް ރަފީޤްއެވެ.
ލޯކަލް ކައުންސިލް އިންތިޚާބުގައި އެމްޑީޕީން ވާދަކުރާނެ ކެނޑިޑޭޓުން ހޮވުމަށް ކުރިއަށްގެންދިޔަ ޕްރައިމަރީގައި ބައެއް މައްސަލަތައް ވަނީ ދިމާވެފައެވެ. މިގޮތުން ގއ.އަތޮޅުގެ ޕްރައިމަރީ އެޕާޓީން ވަނީ ބާޠިލްކޮށްފައެވެ. ގއ.އަތޮޅުގެ ޕްރައިމަރީ އެމްޑީޕީން ބާޠިލްކޮށްފައިވަނީ މާލޭގައި އެއަތޮޅުގެ ރައްޔިތުން ވޯޓްލުމަށް ބެހެއްޓީ ވޯޓްފޮށި ކައިރީގައި ހިނގި ހަމަނުޖެހުންތަކާއި ގުޅިގެންނެވެ.
އެމްޑީޕީގެ ނާއިބު ރައީސް މުޙައްމަދު ޝިފާޒް ވިދާޅުވީ، ކައުންސިލް އިންތިޚާބަށް ކެނޑިޑޭޓުން ހޮވުމަށް ރާއްޖޭގެ އެކި ސަރަޙައްދުތަކުގައި ކުރިއަށްގެންދިޔަ ދިޔަ ޕްރައިމަރީގައި މައްސަލަ ދިމާވިކަމަށާ، މައިގަނޑު ގޮތެއްގައި ދިމާވެފައިވަނީ އިދާރީ މައްސަލަތައްކަމަށެވެ. ޝިފާޒް ވިދާޅުވީ ގއ.ޕްރައިމަރީ ބާޠިލްކޮށް ހުރިހާ ވޯޓް ކަރުދާހެއް މަންދޫބުންނާއި އޮބްޒާވަރުންގެ ކުރިމަތީގައި ނައްތާލަން އެއަތޮޅުގެ ހުރިހާ ރަށަކަށް އެންގިކަމަށެވެ. ހަމަނުޖެހުންތަކުގައި ވޯޓް ފޮށިތައް އަންދާލިކަމަށް ދެކެވޭ ވާހަކައާ ގުޅިގެން ޝިފާޒް ވިދާޅުވީ، ހަމަނުޖެހުމުގައި ފޮށިތައް އެންދީނޫންކަމަށާއި، އެއީ ޕާޓިން އެންގި އެންގުމަށް ވޯޓް ކަރުދާސްތައް ނައްތާލުމަށް ކުރިކަމެއްކަމަށެވެ. އަދި ގއ.ގައި އިންތިޚާބު ބާއްވާނެ ދުވަސް ފަހުން އިޢުލާންކުރާނެކަމަށްވެސް ޝިފާޒް ވިދާޅުވިއެވެ.
ރާއްޖޭގެ އެކި ސަރަހައްދުތަކުގައި ކުރިޔަށް ދިޔަ އެމްޑީޕީގެ ޕްރައިމަރީގައި ވޯޓްލުމަށް ސަތޭކަ ފަސްދޮޅަސް ނުވަ ވޯޓް ފޮށި ބެހެއްޓިއެވެ. މި ޕްރައިމެރީގައި 909 ކެނޑިޑޭޓުން ވާދަކުރިއެވެ.
ލާމަރުކަޒީ ޤާނޫނަށް ގެނައި އިސްލާހުތަކާއި އެކު ކައުންސިލްތަަކަށް ވަނީ ބޮޑެތި ބާރުތަކެއް ދީފައެވެ. އޭގެ ތެރޭގައި ބޮޑު ބަޖެޓަކާއި ކައުންސިލަރުންގެ މުސާރަތަކަށް ގެނައި ބަދަލުތައް ހިމެނެއެވެ.
މިގޮތުން ސިޓީ މޭޔަރަކަށް މުސާރަ އާއި ލިވިން އެލަވަންސްގެ ގޮތުގައި 40،000 ރުފިޔާ ލިބިވަޑައިގަންނަވާނެއެވެ. ޑެޕިއުޓީ މޭޔަރަށް 35،000 ރުފިޔާ އަދި ސިޓީ ކައުންސިލް މެމްބަރުންނަށް 30،000 ރުފިޔާ ލިބިވަޑައިގަންނަވާނެއެވެ. އަތޮޅު ކައުންސިލްގެ ރައީސަކަށް 28،000 ރުފިޔާ، ރަށު ކައުންސިލްގެ ރައީސަކަށް 23،000 ރުފިޔާ، ނައިބު ރައީސަށް 15،000 ރުފިޔާ ލިބިވަޑާއިގަންނަވާއިރު ކައުންސިލް މެމްބަރަކަށް 12،000 ލިބިވަޑައިގަންނަވާނެއެވެ.
އަންނަ ލޯކަލް ކައުންސިލް އިންތިޚާބު އޮންނާނީ އަންނަ އޭޕްރިލް މަހުގެ 4 ވަނަދުވަހުއެވެ.