މާތްވެގެންވާ އަލްއަޤްޞާ މިސްކިތް ހިމެނޭހެން ޤުދުސް އިސްރާއީލަށް ދިނުމަށް އެމެރިކާގެ ރައީސް ޑޮނަލްޑް ޓްރަމްޕް ހުށަހަޅުއްވައިފިއެވެ. އޭނާ ހުށަހެޅުއްވީ ޤުދުސަކީ އިސްރާއީލުގެ ވެރިރަށުގެ ގޮތުގައި ކަނޑައެޅުމަށެވެ.
ފަލަސްޠީނުގެ މައްސަލައަށް ސުލްޙަވެރި ހައްލެއް ހޯއްދެވުމުގެ ނަމުގައި އިސްރާއީލުގެ ބޮޑުވަޒީރު ބެންޔަމިން ނަތަންޔާހޫއާއިއެކު ވައިޓްހައުސްގައި ބޭއްވި ހަފުލާއެއްގައި އެމެރިކާގެ ރައީސް ޓްރަމްޕުވަނީ ފަލަސްޠީނުގެ މިނިވަން ވަކި ދަޢުލަތެއް އުފެއްދުމަށްވެސް ހުށަހަޅުއްވާފައެވެ. އަދި ފަލަސްޠީނުގެ މިނިވަން ދަޢުލަތުގެ ވެރިރަށަކީ އިރުމަތީ ޤުދުސްކަމަށްވެސް ޓްރަމްޕުވަނީ ހުށަހަޅުއްވާފައެވެ.
ބައިނަލްއަޤުވާމީ ޤާނޫނުތަކާއި އދގެ ޤަރާރުތަކާއި ޚިލާފަށް ޓްރަމްޕަށް ހުށަހެޅުއްވި ހުށަހެޅުއްވުމުގައި ވިދާޅުވެފައިވަނީ އަލްއަޤްޞާއަށް މުސްލިމުންނަށް ޒިޔާރަތްކުރެވޭނެކަމަށާއި އެމިސްކިތް ބަލަހައްޓާނީ އިސްރާއިލުންކަމަށެވެ. އަދި މިހާރު ޔަހޫދީން އާބާދުވެފައިވާ ސަރަޙައްދުތައް ހިމެނޭހެން އިސްރާއީލުގެ ސަރަޙައްދީ ރޮނގު އެކުލަވާލަންވެސް ޓްރަމްޕުވަނީ ހުށަހަޅުއްވައިފައެވެ. އެހެން އެގޮތަށްވެއްޖެނަމަ، ފަލަސްޠީނުގެ ހުޅަނގު އައްސޭރީގެ ދެބައިކުޅަ އެއްބައިދާނީ އިސްރާއީލުގެ ބާރުގެ ދަށަށެވެ. އަދި ހަތަރު އަހަރުގެ މުއްދަތަށް ހުޅަނގު އައްސޭރީގައި ޔަހޫދީން އާބާދުކުރުން ހުއްޓާލުމަށްވެސް ޓްރަމްޕްވަނީ ހުށަހަޅުއްވާފައެވެ.
ޓްރަމްޕުގެ ހުރިހާ ހުށަހެއްޅުވުމެއް ފަތަޙަ ޖަމާޢަތާއި ޙަމާސް ޖަމާޢަތް ހިމެނޭހެން، ފަލަސްޠީނުންވަނީ ޤަބޫލުނުކުރަން ނިންމައިފައެވެ.