ކޮރޯނާ ވައިރަހަށް ޝައްކުކުރެވޭ މީހަކު މިހާތަނަށް ރާއްޖެ އެތެރެވެފައެއް ނުވޭ - ހެލްތު މިނިސްޓަރ އަމީން
ޗައިނާއިން ފެނިފައިވާ ކޮރޯނާ ވައިރަހަށް ޝައްކުކުރެވޭ އެއްވެސް މީހަކު އަދި މިހާތަނަށް ރާއްޖެއިން ފެނިފައި ނުވާކަމަށް ހެލްތު މިނިސްޓަރ ޢަބްދުﷲ އަމީން ވިދާޅުވެއްޖެއެވެ. މިނިސްޓަރ އަމީން މިހެން ވިދާޅުވީ ކޮރޯނާ ވައިރަސްއިން ރައްކާތެރިވުމަށް ރާއްޖެއިން އަޅަމުންދާ ފިޔަވަޅުތަކުގެ މައުލޫމާތު ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައެވެ.
ކޮރޯނާ ވައިރަހާއި ގުޅިގެން ރާއްޖެއިން އަޅަމުންދާ ފިޔަވަޅުތަކާއި ގުޅޭގޮތުން މަޢުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި މިނިސްޓަރ އޮފް ހެލްތު ޢަބްދުﷲ އަމީން ވިދާޅުވީ، ރާއްޖެއަށް އަންނަ މީހުންގެ ތެރެއިން އެވައިރަހަށް ޝައްކުކުރެވޭ އެއްވެސް މީހަކު އަދި މިހާތަނަށް ފެނިފައިނުވާކަމަށެވެ. މިނިސްޓަރ މިހެން ވިދާޅުވެފައި މިވަނީ ރާއްޖޭއިން ބޭރުން އައި ދެމީހަކު ހުޅުމާލޭގައި ކަރަންޓީންކޮށްފައި ވާކަމަށް ބުނެ ދޮގު ވާހަކަތަކެއް ފަތުރާފައިވާ ދަނޑިވަޅެއްގައެވެ. މިނިސްޓަރ އަމީން ވިދާޅުވީ ކޮރޯނާ ވައިރަސްއާއި ގުޅިގެން ރާއްޖެއިން މިހާރު ޢަމަލުކުރަމުން އަންނަނީ މިބައްޔާއި ގުޅޭގޮތުން ޑަބްލިއުއެޗްއޯގެ ސްޓޭންޑަރޑްތަކާއި އެއްގޮތަށްކަމަށެވެ.
އެގޮތުން ރާއްޖޭގެ ހުރިހާ ޕޯޓެއްގައި މިހާރު ތާމަލް ކެމެރާތައް ހަރުކޮށްގެން އަންނަ މީހުން ސްކްރީންކުރަމުން އަންނައިރު ބަލީގެ ބައެއް އަލާމާތްތައް ފެނުމުން އުސޫލުތަކާއި އެއްގޮތަށް އެމީހަކާއި އެމީހަކާއި އެކު ދަތުރުކުރި މީހުންގެ ދަތުރުގެ ހިސްޓްރީއަށް ބެލުމަށް ފަހު ބަލި ނެތްކަން ކަށަވަރުކުރަމުން އަންނަކަމަށެވެ. އެހެންނަމަވެސް މިއީ ވައިރަސްއެއްގެ ޒަރިއްޔާއިން ފެތުރޭ ބައްޔަކަށްވުމުން އެއްވެސް އަލާމާތެއް ނެތް މީހެއްގެ ގައިގައިވެސް ވައިރަސްގެ އަސަރު ހުރެދާނެކަމަށް ހެލްތު މިނިސްޓްރީން ވިދާޅުވެއެވެ.
ހެލްތު މިނިސްޓަރ ވިދާޅުވީ ކޮރޯނާވައިރަސްއަށް ރާއްޖޭގައި އަދި ޓެސްޓުކުރެވޭނެ ގޮތެއް ނެތްކަމަށާއި މުޅި ދުނިޔޭގައިވެސް މި ވައިރަހަށް ޓެސްޓުކުރެވެނީ ހަމައެކަނި ހޮންގކޮންގާއި ނެދަރލޭންޑްސްގައިކަމުން ޝައްކުކުރެވޭ މީހަކު ފެނިއްޖެ ޙާލަތެއްގައި އެމީހެއްގެ ސާމްޕަލް ވީ އެންމެ އަވަހަކަށް ރާއްޖެއިން ބޭރަށް ފޮނުވައިގެން ޓެސްޓު ކުރެވޭނެ މަގު މިހާރު ހަމަޖައްސާފައި ވާކަމަށެވެ.
މިނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ހެލްތު ޕްރޮޓެކްޝަން އޭޖެންސީގެ ފަރާތުން ޑރ.ނަޒްލާ ވިދާޅުވީ ބަލީގެ ބައެއް އަލާމަތްތައް ކަމަށް ފެންނަ މީހުންނާއި ސުވާލުކުރުމުގެ އުސޫލުގެ ދަށުން އެކަން ކުރެވެމުން އަންނައިރު އެއީ އެއްވެސް ގޮތަކަށް ބައްޔަށް ޕޮޒިޓިވްވިކަމަށް ޝައްކުކުރަނީ ނޫންކަމަށެވެ.
އެގޮތުން އަލާމާތްތައް ހުރިގޮތުން މިހާތަނަށް އެއަރޕޯޓުން 2 މީހަކާއި ސުވާލުކޮށްފައިވާކަމަށް ހެލްތު މިނިސްޓްރީން މަޢުލޫމާތުދެއެވެ. އަދި މިކަމާއި ގުޅިގެން އެކުލަވާލާފައިވާ ކޯލް ސެންޓަރަށް ރިސޯޓުތަކުން ބަލަމުން އަންނަ ޕްރޮސެސްގެ ތެރެއިން 2 މީހަކާ ސުވާލުކޮށްފައިވާކަމަށް އެމިނިސްޓްރީން ވިދާޅުވެއެވެ. އަދި މިއިން ސުވާލުކުރަނީ އެމީހެއްގެ ދަތުރު ކުރި ޤައުމުތަކާއި ބަލި ފެނިފައިވާ ސަރަޙައްދުތަކާއި ގުޅުމެއްވޭތޯ ބެލުމަށްކަމަށް އެމިނިސްޓްރީން ވިދާޅުވެއެވެ.
ހެލްތު މިނިސްޓްރީން ވިދާޅުވީ ހަލުއިކަމާއެކު ފެތުރެމުން އަންނަ ކޮރޯނާ ވައިރަހާއި ގުޅިގެން ރާއްޖެއިން އަދި ކަންބޮޑުވާންޖެހޭ ހާލަތެއް ނެތް ނަމަވެސް މިއީ ފަރުވާއެއް ނެތި ހަލުވިކަމާއެކު ފެތުރޭ ބައްޔެއްކަމަށްވުމުން މިއީ ނުރައްކާ ބައްޔެއްކަމަށެވެ.
އެހެންކަމުން މިޙާލަތުގައި ސަރުކާރުން ކުރެވެންހުރި މަސައްކަތްތައް ކުރަމުން އަންނައިރު ފަރުދީގޮތުން ޢާއްމު ސިއްހަތަށް އިތުރަށް ސަމާލުވުމަށް އެމިނިސްޓްރީން އިލްތިމާސްކުރައްވައެވެ.