ޗައިނާއާއި އެމެރިކާއާ ދެމެދު ޤާއިމްކުރި ފުރަތަމަ މަރުހަލާގެ ވިޔަފާރީގެ އެއްބަސްވުމުގެ ސަބަބުން އާސިއާން ސަރަޙައްދުގެ އިޤްތިޞާދަށްވެސް ފައިދާކުރާނެކަމަށް ތަޖުރިބާކާރުން ބުނެފިއެވެ.
ޗައިނާއާއި އެމެރިކާއާ ދެމެދު ޤާއިމްކުރި ފުރަތަމަ މަރުހަލާގެ ވިޔަފާރީގެ އެއްބަސްވުމުގެ ސަބަބުން އާސިއާން ސަރަޙައްދުގެ އިޤްތިޞާދަށްވެސް ފައިދާކުރާނެކަމަށް ތަޖުރިބާކާރުން ބުނެފައިވާއިރު، އެމެރިކާއާއި ޗައިނާގެ ކޯޅުމުގެ ސަބަބުން އާސިއާން ޤައުމުތަކުގެ އިޤްތިޞާދަށް ވަނީ އަސަރުތަކެއްކޮށްފައެވެ.
އާސިއާންއަކީ ދެކުނު އިރުމަތީ އޭޝިޔާގެ 10 ޤައުމެއް އެކުލެވޭ ޖަމުޢިއްޔާއެކެވެ. އަހަރަކަށްވުރެ ގިނަ ދުވަހަށް ދެމިގެންދިޔަ ޗައިނާއާއި އެމެރިކާގެ ވިޔަފާރީގެ ހަނގުރާމައިގެ ސަބަބުން އާސިއާން ޤައުމުތަކުގެ އިޤްތިޞާދަށްވެސް ވަނީ ބޮޑެތި އަސަރުތަކެއްކޮށްފައެވެ. އާސިއާންގެ ޤައުމުތަކުގެ އިޤްތިޞާދަށް ވިޔަފާރީގެ ހަނގުރާމައިގެ ސަބަބުން އަސަރުތަކެއްކޮށްފައިވާއިރު، އެކި ޤައުމުތަކުގެ އިޤްތިޞާދަށް އަސަރުކޮށްފައިވަނީ އެކި މިންވަރަށެވެ.
ތަޖުރިބާކާރުން ލަފާކުރާ ގޮތުގައި ޗައިނާއާއި އެމެރިކާއާ ދެމެދު ކުރިއަށްދިޔަ ވިޔަފާރީގެ ހަނގުރާމަ ނިމުމަކަށް ގެނެސް، ވިޔަފާރީގެ އެއްބަސްވުމެއް ޤާއިމްކުރިއިރު، މީގެ ސަބަބުން އާސިއާންގެ ޤައުމުތަކުގެ އިޤްތިޞާދަށް ފައިދާތަކެއްކޮށް، އާސިއާން ސަރަޙައްދުގެ އިޤްތިޞާދު ކުރިއަރާނެކަމަށް ތަޖުރިބާކާރުން ބުނެއެވެ.
ޗައިނާއާއި އެމެރިކާއާ ދެމެދު ވިޔަފާރީގެ އެއްބަސްވުމެއްގައި ސޮއިކޮށްފައިވާއިރު، އާސިއާން ސަރަޙައްދުގެ އިޤްތިޞާދު ކުރިއަށްއޮތް ދުވަސްތަކުގައި 4.7 އިންސައްތައިން 4.9 އިންސައްތައަށް ކުރިއަރާނެކަމަށް އިޤްތިޞާދު ދިރާސާކުރާ ފަރާތްތަކުން ބުނެއެވެ.
ޗައިނާއާ އެމެރިކާއާ ދެމެދު ވިޔަފާރީގެ ފުރަތަމަ މަރުހަލާގެ އެއްބަސްވުމެއްގައި މިމަހުގެ 15 ވަނަ ދުވަހު ސޮއިކޮށްފައިވާއިރު، މީގެ ސަބަބުން ދެ ޤައުމަށްވެސް ފައިދާތަކެއްވާނެއެވެ. އެގޮތުން އެމެރިކާގެ ބައެއް އުފެއްދުންތައް ގަތުމަށް ޗައިނާއަށް ލާޒިމްވާއިރު، ޗައިނާއިން އެތެރެކުރާ މުދަލުން ނަގާ ޑިއުޓީ ނުވަތަ ޓެރިފް އެމެރިކާއިން ބޮޑުކުރުން ހުއްޓާލާނެއެވެ.
ދުނިޔޭގެ މާލީ އިދާރާތަކުން ލަފާކުރި ގޮތުގައި ޗައިނާއާއި އެމެރިކާއިން ވިޔަފާރީގެ ހަނގުރާމަ ނިންމާނުލައިފިނަމަ، ދުނިޔޭގެ އިޤްތިޞާދަށް އެކަމުގެ ސަބަބުން ބޮޑެތި އަސަރުތަކެއް ކުރާނެއެވެ.