ޖަޕާނުގައި ދިރިއުޅޭ ދިވެހިން އެމްބަސީގައި ރަޖިސްޓްރީވުމަށް ޖަޕާނުގައި ހުންނަ ދިވެހި އެމްބަސީން އިލްތިމާސް ކުރައްވައިފިއެވެ.
އެގޮތުން އީމެއިލް މެދުވެރިކޮށް އަދި ކޮންސިއުލަރ އެސިސްޓެންޓަށް ފޯނުން ގުޅައިގެންވެސް ރަޖިސްޓްރީ ވެވޭނެކަމަށް ޖަޕާނުގައި ހުންނަ ދިވެހި އެމްބަސީން ވިދާޅުވެއެވެ. އެ އެމްބަސީންވަނީ މިހާރު ފެތުރެމުންދާ ނުރައްކާތެރި ކޮރޯނާ ވައިރަސްއިން ރައްކާތެރިވުމަށް ހުރިހާ ފަރާތަކުންވެސް ފިޔަވަޅުއެޅުމަށް އިލްތިމާސްކުރައްވާފައެވެ. ޖަޕާނުން މިހެން އިލްތިމާސްކުރައްވާފައިވާއިރު ޖަޕާނުގައި ކޮރޯނާ ވައިރަސްގެ ތިން މައްސަލައެއް ފެނިފައިވާކަމަށް އެޤައުމުގެ ހެލްތު މިނިސްޓްރީން މިހާތަނަށްވަނީ ރިޕޯޓުކޮށްފައެވެ.
ޖަޕާނުގެ އިތުރުން ޗައިނާގައި ހުންނަ ދިވެހި އެމްބަސީންވެސް ގެންދަވަނީ މިވައިރަސްއާ ގުޅިގެން އެޤައުމުގައި އުޅޭ ދިވެހިންގެ ޙާލު ބައްލަވާ އެމީހުންނަށް ބޭނުންވާ އެހީތެރިކަން ފޯރުކޮށްދެމުންނެވެ. ވައިރަސް ފެނުނު ވުހާން ސިޓީގައި ދިރިއުޅޭ ޢާއްމުން އެސިޓީން ނެރުމުގެ މަސައްކަތް ކުރައްވަމުން ގެންދަވާއިރު މިހާރުން މިހާރަށް ބޭނުންވާ މާލީ އެހީތެރިކަން ފޯރުކޮށް ދިނުމަށް ޗައިނާގައި ހުންނަ ދިވެހި އެމްބަސީންވަނީ ނިންމަވާފައެވެ.
އެހެންނަމަވެސް މިދުވަސްކޮޅަކީ ޗައިނާގެ އާއަހަރު ފެށުމަށް ބެންކުތަކާއި މުވައްސަސާތައް ބަންދުކޮށްފައި ވުމުގެ ސަބަބުން މިކަމުގައިވެސް ދަތިތަކެއް ހުރިކަން އެމްބަސީން ފާހަގަކުރައްވައެވެ. ޗައިނާގެ ވުހާން ސިޓީގައި ދިރިއުޅޭ 7 ފަރާތެއްގެ މަޢުލޫމާތު އެމްބަސީއަށް ލިބިފައިވާކަމަށް ޗައިނާ އެމްބަސީން ވިދާޅުވެއެވެ.
ޗައިނާގެ ހޫބެ ޕްރޮވިންސްގެ ވުހާން ސިޓީން ފެނުނު މި ވައިރަސްގެ ސަބަބުން މިހަތަނަށް 57 މީހުން މަރުވެފައިވާކަމަށް ޗައިނާގެ ކަމާބެހޭ ފަރާތްތަކުން މަޢުލޫމާތުދެއެވެ. އަދި ވައިރަސްގެ އަސަރު ޗައިނާގެ 2000 އަށްވުރެ ގިނަ މީހުނަށްވަނީ ކޮށްފައެވެ.