ކުރިއަށް އޮތް 24 ގަޑިއިރުވެސް ރާއްޖޭގެ ހުރިހާ ހިސާބަކަށްވެސް ވައިގަދަ ވުމުގެ ސަބަބުން އުދަ އެރުމުގެ ފުރުސަތު އެބައޮތްކަމަށް މޫސުމާއި ބެހޭ ޤައުމީ އިދަރާއިން ވިދާޅުވެއްޖެއެވެ.
މޫސުމާއި ބެހޭ ޤައުމީ އިދާރާއިން ވިދާޅުވީ، ދެކުނުގެ އަތޮޅުތަކަށް ވައިޖެހޭނީ އިރުއުތުރާއި އިރުން، ގަޑިއަކު 06 މޭލާއި 16 މޭލާ ދެމެދުގެ ބާރުމިނުގައިކަމަށެވެ. އަދި އެހެން ހިސާބުތަކަށް ގަޑިއަކު 15 މޭލާއި 23 މޭލާ ދެމެދުގެ ބާރުމިނުގައި ވައި ޖެހޭނެކަމަށާއި ވިލާގަނޑުގައި ގަޑިއަކު ގާތްގަނޑަކަށް 40 މޭލުގެ ބާރުމިނަށް ވައިގަދަވުން އެކަށީގެން ވާކަމަށްވެސް މެޓު އޮފީހުން ވިދާޅުވެއެވެ.
ރާއްޖޭގެ އެކި ހިސާބަށް މިހާރު އުދައިގެ އަސަރުކުރަމުންދާއިރު ދިޔަވަރު ބޮޑުވާ ވަގުތުތަކުގައި އުދައިގެ އަސަރު އަދިވެސް ކުރާނެކަމަށް މެޓު އޮފީހުން ލަފާކުރެއެވެ. އެގޮތުން މިރޭގެ މެންދަމުގެ ގަޑިތަކުގައި އުދަ އަރާފާނެކަމަށް ލަފާކޮށް ރައްކާތެރިކަމުގެ ފިޔަވަޅުތައް އެޅުމަށް މެޓު އޮފީހުން އިލްތިމާސްކުރެއެވެ. މެންދުރު 11:30ން ފެށިގެން 13:30 އާއި ދެމެދު ރާއްޖޭގެ އެކި ހިސާބުތަކުގެ ދިޔަވަރު އާދައިގެ ވަރަކަށް ބޮޑުވާނެކަމަށް ލަފާކުރެވުނަސް އެވަގުތު ތަކުގައި އުދައިގެ އަސަރު ކުރާނެކަމަކަށް ނުބެލެވޭކަމަށް މެޓު އޮފީހުން ވިދާޅުވެއެވެ.
އެއިދާރާއިން ވިދާޅުވީ ހޮނިހިރު ދުވަހުން ފެށިގެން ވައި މަޑުވާނެކަމަށް ބެލެވޭކަމަށާއި އެހެންކަމުން އުދައިގެ އަސަރު ރާއްޖޭގެ ރަށްރަށަށް ކުރަމުން އަންނަ މިންވަރު ކުރިއަށް އޮތް ދުވަސްތަކުގައި ކުޑަވާނެކަން އެއިދާރާއިން ފާހަގަކުރެއެވެ.
ރާއްޖޭގެ މޫސުން ކުރިއަށް އޮތް 24 ގަޑި އިރަށް ބަލާއިރު މެދު ރާއްޖެއާއި ދެކުނުގެ އަތޮޅުތަކަށް ގުގުރުމާއެކު ވިއްސާރަކުރާނެކަމަށްވަނީ ލަފާކޮށްފައެވެ. އަދި މެދު ރާއްޖެއާއި އުތުރުގެ ކަނޑުތައް ގަދަވާނެކަމަށާއި އެހެންކަމުން ކަނޑު ދަތުރުކުރައްވާ ފަރާތްތަކުން މޫސުމަށް ސަމާލުވުމަށް އެއިދާރާއިންވަނީ އިލްތިމާސް ކޮށްފައެވެ.
މިހާރުކުރަމުންދާ ވިއްސާރަ އަދި އިރުވައިގެ ހަޅައިގެ ސަބަބުން ރާއްޖޭގެ ބައެއް ރަށްރަށަށް އުދަ އަރަމުންދާކަމުގެ މަޢުލޫމާތު ނޭޝަނަލް ޑިޒާސްޓަރ މެނޭޖްމަންޓަށްވެސް ލިބިފައިވާކަމަށް އެއޮތޯރިޓީން ވިދާޅުވެއެވެ.
އެއޮތޯރިޓީން ވިދާޅުވީ މީހުން ދިރިއުޅޭ ގެތަކާއި ހަމައަށް އުދައިގެ އަސަރުކޮށްގެން މިހާތަނަށް ރިޕޯޓުކޮށްފައި ވަނީ ށ.ކޮމަންޑޫއިން އެކަނިކަމަށެވެ. އެރަށުގެ ކައުންސިލުން މިހާރު ވެލިބަސްތާ ޖެހުމުގެ މަސައްކަތްކުރިއަށްދާކަމަށް ޑިޒާސްޓަރ މެނޭޖްމަންޓް އޮތޯރިޓީން ވިދާޅުވެއެވެ.