ސީ ޕްލޭން ޓަރމިނަލާއި ގުޅުންހުރި މައްސަލައެއްގައި މުވައްޒަފަކު ވަކިކޮށްފައިނުވާނެ - އެމް.އޭ.ސީ.އެލް
ވެލާނާ އިންޓަރނޭޝަނަލް އެއަރޕޯޓުގައި ތަރައްޤީކުރަމުންދާ އައު ސީޕްލޭން ޓާމިނަލް ޓީ.އެމް.އޭއަށް ދޭން ދެކޮޅު ހެދި 2 މުވައްޒަފަކު ވަޒީފާއިން ވަކިކޮށްފައިވާކަމަށް ބުނެ ފަތުރަމުންދާ ޚަބަރު މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމް.އޭ.ސީ.އެލުން ދޮގުކޮށްފިއެވެ.
އައު ސީޕްލޭން ޓަރމިނަލް ޓީ.އެމް.އޭއަށް ދިނުމާ ދެކޮޅުހެދި އެކުންފުނީގެ ޑެޕިއުޓީ ޗީފް، ފައިނޭންޝަލް އޮފިސަރު ހާމިދު ރިޒާއާއި ޖެނެރަލް މެނޭޖަރ، ކޮމާޝަލް، މުޖުތަބާ ލަތީފް ވަޒީފާއިން ވަކިކޮށްފައިވާކަމަށް އެމް.އޭ.ސީ.އެލްގެ ބައެއް ވެރިންނާއި ހަވާލާދީ ބައެއް މީޑިއާތަކުން ވަނީ ރިޕޯޓްކޮށްފައެވެ.
މިކަން ދޮގުކޮށް އެމް.އޭ.ސީ.އެލުން ކޮށްފައިވާ ޓުވީޓެއްގައި ބުނެފައި ވަނީ، ސީ ޕްލޭން ޓަރމިނަލާއި ގުޅުންހުރި އެއްވެސް މައްސަލައެއްގައި އެކުންފުނީގެ އެއްވެސް މުވައްޒަފަކު ވަޒީފާއިން ވަކިކޮށްފައިނުވާނެކަމަށެވެ. އަދި އެކުންފުންޏަކީ މުވައްޒަފުން ވަޒީފައިގައި ދެމިތިއްބުމުގައި ރަނގަޅު ޓްރެކެއް އޮންނަ ކުންފުންޏެއްކަމަށާއި، އެއްވެސް ކަމަކާހުރެ މުވައްޒަފަކު ވަޒީފާއިން ވަކިކުރިޔަސް، އެކަން ކުރާނީ އޮންނަ އުޞޫލުގެ ތެރެއިން އިންސާފުވެރި ކަމާއެކުގައި ކަމަށްވެސް އެކުންފުނިން ބުނެފައިވެއެވެ.
އައު ސީޕްލޭން ޓަރމިނަލް ހިންގުމަށް ޓީ.އެމް.އޭއަށް ދޭން އުޅޭކަމަށްބުނެ ދާދިފަހުން ފެތުރުނު ވާހަކަތައްވެސް އެމް.އޭ.ސީ.އެލުން ވަނީ ދޮގުކޮށްފައެވެ. އަދި ޓަރމިނަލުން ޖާގަ ކުއްޔަށް ދިނަސް، އެތަން ހިންގާނީ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމް.އޭ.ސީ.އެލުންކަމަށް އެކުންފުނިން ބުނެފައިވެއެވެ. އައު ސީޕްލޭން ޓާރމިނަލުން ޖާގަ ކުއްޔަށް ދިނުމަށް މިހާތަނަށް އައިއިރު، އެއްވެސް އޮޕަރޭޓަރަކާއެކު އެއްބަސްވެވިފައިނުވާކަމަށާއި، އެކުންފުންޏާއި ސީޕްލޭން އޮޕަރޭޓަރުންނާއި ދެމެދު ކުރިއަށްގެންދިޔަ މަޝްވަރާތައްވެސް މިވަގުތަށް މަޑުޖައްސާލާފައިވާކަމަށް އެމް.އޭ.ސީ.އެލުން ބުނެފައިވެއެވެ.