އަފްޣާނިސްތާނުގެ އެކި ސަރަޙައްދުތަކުގައި އާދަޔާ ޚިލާފަށް ފިނިގަދަވުމުގެ ސަބަބުން މަރުވި މީހުންގެ އަދަދު 17އަށް އަރައިފިއެވެ.
އެ ޤައުމުގެ ނޭޝަނަލް ޑިޒާސްޓަރ މެނޭޖްމަންޓް އޮފީހުގެ ތަރުޖަމާނު ތަމީމް އަޒީމީ ވިދާޅުވީ ފިނިގަދަވުމުގެ ސަބަބުން ހޮނިހިރު ދުވަހު އެކަނިވެސް 17 މީހުން މަރުވި ކަމަށާ މި އަދަދާއެކު މިއަހަރު ފިނިގަދަވުމުގެ ސަބަބުން މަރުވި މީހުންގެ އަދަދު 24އަށް އަރާފައިވާކަމަށެވެ. އޭނާ ވިދާޅުވީ މި ޙާދިސާގައި މަރުވި މީހުންގެ އަދަދު އިތުރުވުމަކީ އެކަށިގެންވާ ކަމެއްކަމަށެވެ.
މީގެ އިތުރުން، މިއަހަރުގެ ފިނި މޫސުމާ ދިމާކޮށް އެ ޤައުމުގައި އާދަޔާ ޚިލާފަށް ފިނިގަދަވާނެކަމަށް ކަމާބެހޭ ފަރާތްތަކުން އަންދާޒާކޮށްފައިނުވާކަމަށް އަޒީމީ ވިދާޅުވިއެވެ. އަޒީމީ ވިދާޅުވީ ފިނިމޫސުމާ ދިމާކޮށް އަފްޣާނިސްތާނުގެ އެކި ސަރަޙައްދުތަކަށް ބޯކޮށް ސްނޯ ފައިބަމުންދާކަމަށާ އެކަމުގެ ސަބަބުން ގިނަ ބައެއްގެ ފުރާނަ ގެއްލިފައިވާކަމުގެ ރިޕޯޓްތައް ލިބިފައިވާކަމަށެވެ. އެހެން ނަމަވެސް މިކަމުގެ ސަބަބުން މަރުވި މީހުންގެ އަދަދު އަދި ސާފުނުވާކަމަށްވެސް އޭނާ ވިދާޅުވިއެވެ.
ސްނޯ ފޭބުމުގެ ސަބަބުން އަފްޣާނިސްތާނުގެ ބައެއް ބޮޑެތި ހައިވޭތައް ބަންދުކުރަން ޖެހިފައިވާއިރު މީގެ ތެރޭގައި އެ ޤައުމުގެ އުތުރާ މައި ސަރަޙައްދުތައް ގުޅުވައިދޭ ސަލާންގް ޓަނަލް ހިމެނެއެވެ.