ސަރުކާރުން ހިންގާ ރެގިއުލަރައިޒޭޝަން ޕްރޮގްރާމްގެ ދަށުން ބިދޭސީން ރަޖިސްޓްރީ ވުމުގެ ޕްރޮގްރާމެއް އައްޑޫ ސިޓީގައި މިއަދު ފަށައފިއެވެ.
މިޕްރޮގަރާމުގެ ދަށުން އައްޑޫސިޓީގައި ދިރިއުޅެމުންދާ ބިދޭސީން ރަޖިސްޓްރީ ވުމަށް އައްޑޫސިޓީ ކައުންސިލުންވަނީ މިކަމަށް ޚާޞަ އިންތިޒާމު ތަކެއް ހަމަޖައްސާފައެވެ.
އައްޑޫސިޓީގައި ޤަވާއިދާ ޚިލާފަށް އުޅޭ ބިދޭސީންނަށް އަމާޒުކޮށްގެން ހިންގާ މިޕްރޮގްރާމްގެ ދަށުން ރަޖިސްޓްރީ ކޮށްދޭން ހަމަޖެހިފައިވަނީ ރާއްޖޭގައި މަސައްކަތް ކުރުމުގެ ހުއްދަ ދެވި، މުއްދަތު ހަމަވެފައިވާ ބިދޭސީންނަށާއި، ކާކުކަން އެނގެން ނެތަސް އެއްވެސް އިރެއްގައި ހުއްދަ އޮވެގެން ރާއްޖޭގައި މަސައްކަތް ކުރުމަށް އައިސްފައިވާ ބިދޭސީންނަށެވެ.
އައްޑޫސިޓީ ކައުންސިލުންމަޢުލޫމާތުދޭ ގޮތުގައި މިޕްރޮގްރާމް އައްޑޫގައި ކުރިއަށް ގެންދިއުމަށް ޓަކައި އެޕޮއިންޓްމެންޓް ހަދައިދިނުން އޮންނާނީ މިއަދުންފެށިގެން 15 ވަނަ ދުވަހުގެ ނިޔަލަށް އައްޑޫސިޓީ ކައުންސިލް އިދާރާގެ ހޯލްގައެވެ. އެޕޮއިންޓްމެންޓް ހައްދައި ދިނުމާބެހޭ ތަފްޞީލް އައްޑޫ ސިޓީކައުންސިލުން ވަނީ ހާމަ ކޮށްފައެވެ.
ސަރުކާރުން ހިންގާ ބިދޭސީން ރެގިއުލަރައިޒޭޝަން ޕްރޮގްރާމަކީ، އެކި ސަބަބުތަކާއި ހުރެ ޤަވާއިދާ ޚިލާފަށް އުޅޭ ބިދޭސީން ޤަވާޢިދުގެ ތެރެއަށް ވައްދައި ދަފްތަރު ކުރުމުގެ ގޮތުން ހިންގާ ޕްރޮގްރާމެކެވެ. އައްޑޫސިޓީ ކައުންސިލް އިދާރާގައި ރެޖިސްޓްރޭޝަން އަދި އެޕޮއިންޓްމެންޓް ކުރިއަށް ދާއިރު، ރެގިއުލަރައިޒް ކުރުމަށްޓަކައި ރެޖިސްޓްރީ ކުރުމަށް އިކޮނޮމިކް މިނިސްޓްރީގެ ޓީމެއް މިހަފްތާގައި އައްޑޫސިޓީއަށް ދާގޮތަށް ވަނީ ހަމަޖެހިފައެވެ. އަދި 8 ވަރަކަށްދުވަހު އެޓީމު މިކަމުގައި ޙަރަކާތްތެރި ވާނެއެވެ.
މިޕްރޮގްރާމް ތެރެއަށް ނުވަންނަ ބިދޭސީން ލައްވާ މަސައްކަތް ކުރުމަކީ މަނާ ކަމަކެވެ. އަދި އެއްވެސް ސަބަބަކާއި ހުރެ ރެގިއުލަރައިޒް ނުވާ ބިދޭސީންގެ ދަފްތަރެއް އިކޮނޮމިކް މިނިސްޓްރީން އެކުލަވާލާނެއެވެ. މީގެ އިތުރުން މިޕްރޮގްރާމުގައި ބައިވެރިނުވެ އަދި ޤަވާއިދާ ޚަލާފަށް އުޅޭ ބިދޭސީންނާ މެދު ފިޔަވަޅު އަޅާގޮތަށް އިކޮނޮމިކް މިނިސްޓްރީން ވަނީ ނިންމާފައެވެ.
ރާއްޖޭގެ ދެވަނަ އޮތް އެންމެ ބޮޑު އާބާދީ ކަމުގައިވާ އައްޑޫސިޓީގައި އާބާދީގެ ނިސްބަތުން ޤަވާޢިދާ ޚިލާފަށް އުޅޭ ބިދޭސީން ގިނަކަމަށް ތަފާސްހިސާބުތަކުން ދައްކައެވެ. އަދި މިގޮތަށް އުޅޭ ބިދޭސީން އާމްދަނީ ހޯދުމަށް އަމިއްލަ ގޮތުން އެކި މަސައްކަތް ކޮށް އުޅޭކަން އައްޑޫސިޓީގެ ޢާއްމު ބައެއް ފަރާތްތަކުން ފާހަގަ ކުރަމުން ދެއެވެ.