މިދިޔަ ބުދަ ދުވަހު އީރާނުން ނައްޓާލައިގެން ޔޫކްރެއިން ދަތުރުކުރަމުން ދަނިކޮށް އީރާނަށް ވެއްޓުނު ޔޫކްރެއިންގެ މަތިންދާބޯޓު އީރާނުން ފުރުމުގެ ކުރިން މި ބޯޓަށް އެއްވެސް ނުރައްކަލެއް އޮތްކަމުގެ އިންޒާރެއް އީރާނުން ނުދޭކަމަށް ބޯޓު ނިސްބަތްވާ ޔޫކްރެއިން އިންޓަރނޭޝަނަލް އެއަރލައިނުން ބުނެފިއެވެ.
176 މީހުންނާއެކު ދަތުރުކުރަމުން ދިޔަ މި ބޯޓު ނައްޓާލިތާ މާގިނަ އިރުތަކެއްނުވެ ވެއްޓުނުއިރު މި ޙާދިސާގައި ބޯޓުގައި ދަތުރުކުރަމުންދިޔަ ހުރިހާ މީހުންވަނީ މަރުވެފައެވެ. މި ހަފުތާ ބަންދުގައި އީރާނުން ވަނީ މި ބޯޓު ވެއްޓިފައިވަނީ އެ ޤައުމަށް އޮޅިގެން ދެވުނު މިސައިލް ޙަމަލާއެއްގައިކަމަށް އިޢުތިރާފުވެފައެވެ.
ނޫސްވެރިންނާ ވާހަކަދައްކަވަމުން އެއަރލައިންގެ އޮފިޝަލުން ވިދާޅުވީ ޔޫކްރެއިންގެ ވެރިރަށް ކިއެވްއަށް މިސްރާބުޖަހާފައިހުރި މަތިންދާބޯޓު ނައްޓާލުމުގެ ކުރިން މި ބޯޓު ދަތުރުކުރާ މަގުން ބޯޓަށް ނުރައްކަލެއް ކުރިމަތިވެދާނެކަމުގެ އެއްވެސް އިންޒާރެއް އީރާނުގެ ކަމާބެހޭ އެއްވެސް ފަރާތަކުން ދީފައިނުވާކަމަށެވެ. އަދި މި ބޯޓު ދަތުރުކުރަން ކަނޑައަޅާފައިވާ މަގުން ކައްސާލައިގެން އީރާނުގެ އަސްކަރީ މަރުކަޒެއްގެ ކައިރިން ދަތުރުކުރިކަމަށް ބުނެ އީރާނުން ދައްކާފައިވާ ވާހަކަތައްވެސް އެއަރލައިނުގެ އޮފިޝަލުން ވަނީ ދޮގުކޮށްފައެވެ.