އައިޖީއެމްއެޗް ބައިނަލްއަޤްވާމީ މިންގަނޑުތަކާ އެއްގޮތަށް އެކްރިޑެޓް ކުރުމުގެ މަސައްކަތް ފަށައިފި

އިންދިރާ ގާންދީ މެމޯރިއަލް ހޮސްޕިޓަލް، އައިޖީއެމްއެޗް ބައިނަލްއަޤްވާމީ މިންގަނޑުތަކާއި އެއްގޮތަށް އެކްރިޑެޓް ކުރުމުގެ މަސައްކަތް ފަށައިފިއެވެ.

މިކަމާއި ގުޅޭގޮތުން އައިޖީއެމްއެޗުން ނެރުނު ބަޔާނެއްގައި އެ ހޮސްޕިޓަލުން ވަނީ، ނެޝަނަލް އެކްރެޑިޓޭޝަން ބޯޑް ފޮ ހޮސްޕިޓަލްސް އެންޑް ހެލްތު ކެއާ ޕްރޮވައިޑަރސް (އެން.އޭ.ބީ.އެޗް) އަދި ނެޝަނަލް އެކްރެޑިޓޭޝަން ބޯޑް ފޮ ޓެސްޓިންގް އެންޑް ކެލިބަރޭޝަން ލެބޯރަޓޯރީޒް (އެން.އޭ.ބީ.އެލް) ގެ ގައިޑްލައިންތަކާއި އެއްގޮތަށް ފެންވަރު ރަނގަޅު ކުރުމުގެ މަސައްކަތް އިންދިރާ ގާންދީ މެމޯރިއަލް ހޮސްޕިޓަލުގައި ފަށާފައިވާކަން ހާމަކޮށްފައެވެ. މި މަސައްކަތް ކުރަނީ އިންޑިއާގެ އެކްމެގެ ކޮންސަލްޓޭޝަންގެ ދަށުންކަމަށް އެ ހޮސްޕިޓަލުން މަޢުލޫމާތުދެއެވެ.

މި މިންގަނޑުތައް އެކްރިޑެޓް ކުރުމުގެ ބޭނުމަކީ ހޮސްޕިޓަލްތަކުގައި ކުރާ މަސައްކަތްތަކާއި، ޚިދުމަތްތައް ބައިނަލްއަޤްވާމީ މިންގަނޑުތަކާއި އެއްހަމައެއްގައި ބެހެއްޓުމަށް ސްޓްރީމްލައިން ކޮށް، ހޮސްޕިޓަލުން ފޯރުކޮށްދޭ ޚިދުމަތްތައް ފަސޭހައިން ރައްޔިތުންނަށް ދެނެގަނެވޭނެ ގޮތްތަކާއި، ބައިނަލްއަޤްވާމީ މިންގަނޑުތަކާއި އެއްގޮތަށް ޚިދުމަތްތަކަށް ބަދަލު ގެނެސް، އެ މިންގަނޑުގައި ދެމެހެއްޓުމަށް މަސައްކަތް ކުރުމެވެ. މީގެތެރޭގައި ހޮސްޕިޓަލުގައި ބޭނުން ކުރާ އާލާތްތައް ކަނޑައެޅޭ މިންގަނޑު ތަކަކަށް ބެހެއްޓުމާއި ޤަވާއިދުން ހޮސްޕިޓަލުގެ ޚިދުމަތްތަކާއި މަސައްކަތްތައް އޮޑިޓު ކުރުންވެސް ހިމެނެއެވެ.

ޕީއެސްއެމްނިއުސްއަށް ދެއްވި ޚާއްސަ އިންޓަވިއުއެއްގައި ވާހަކަފުޅުދައްކަވަމުން އައިޖީއެމް ހޮސްޕިޓަލުގެ ސީއީއޯ އިބްރާހީމް ސަލީމު ވިދާޅުވީ އެހޮސްޕިޓަލުގެ އަމާޒަކީ "ސްޓޭންޑަޑައިޒްޑް އިންސްޓިޓުޓް"އެއްގެ ގޮތުގައި ނުވަތަ ވަކި ފެންވަރުގެ މުއައްސަސާއެއްގެގޮތުގައި އައިޖީއެމްއެޗު ތަރައްޤީކުރުންކަމަށެވެ. އެގޮތުން ކުރިއަށް އޮތް 16 މަސްދުވަހުގެތެރޭގައި އެކަމަށްޓަކާއި އެކުލަވާލަންޖެހޭ އުސޫލުތައް ކަނޑައެޅުމުގެ މަސައްކަތްކުރަމުން ގެންދަވާކަމަށް އައިޖީއެމްއެޗުން ވިދާޅުވެއެވެ. އެހޮސްޕިޓަލުގެ ސީއީއޯ ވިދާޅުވީ ހޮސްޕިޓަލް އެކްރެޑިޓްކުރުމުގެ މަސައްކަތްނިމިގެންދާއިރު ހޮސްޕިޓަލަކީ ދުނިޔޭގެ ފެންވަރުގައިވެސް މީހުން ބަލައިގަންނަ ހޮސްޕިޓަލަކަށްވެގެންދާނެކަމަށެވެ.

އައިޖީއެމްއެޗުން އަންނަނީ، އެހޮސްޕިޓަލުގެ ފެންވަރު މަތިކޮށް ޚިދުމަތްތައް އިތުރަށް ހަރުދަނާކުރުމަށް ގިނަ މަސައްކަތްތަކެއް ކުރައްވަމުންނެވެ.