ޕާކިސްތާނުގެ ވައިގެ ސަރަޙައްދުން ނުވަތަ އެ ޤައުމަށް ދަތުރުކުރާ އެމެރިކާގެ މަތިންދާބޯޓުތަކުން ސަމާލުވުމަށް އެމެރިކާގެ ވައިގެ ދަތުރުފަތުރާބެހޭ އިދާރާ ޔޫއެސް ފެޑެރަލް އޭވިއޭޝަން އެޑްމިނިސްޓްރޭޝަން (އެފްއޭއޭ)އިން އަންގައިފިއެވެ. އެމެރިކާގެ އެފްއޭއޭއިން މިގޮތަށް އަންގާފައިވަނީ އެމެރިކާއަށް އަމާޒުކޮށްގެން ދީފާނެ ޓެރަރިސްޓް ޙަމަލާއަކުން އެ ޤައުމުގެ ރައްޔިތުންނާ މުދާ ސަލާމަތްކުރުމުގެ ގޮތުންނެވެ. އެމެރިކާގެ ސިވިލް އޭވިއޭޝަންގެ ދާއިރާއަށް ނުރައްކާ އޮތް މިންވަރަށް ބަލާ، މިދިޔަ އަހަރުގެ މާޗް 23ގައި ނެރުނު އިޢުލާނުގެ މުއްދަތު މިހާރު ވަނީ މި އަންނަ 2021ވަނަ އަހަރުގެ ޖެނުއަރީމަހުގެ އެއްވަނަ ދުވަހަށް އިތުރުކޮށްފައެވެ.
ޕާކިސްތާނަށް ނުވަތަ އެ ޤައުމުގެ ވައިގެ ސަރަޙައްދުން ދަތުރުކުރާ އެމެރިކާގެ އަސްކަރީ އަދި މަދަނީ މަތިންދާބޯޓުތައް އުދުއްސާ ހުރިހާ ޕައިލަޓުންވެސް ތިރިން ދަތުރުކުރަންޖެހޭ ޙާލަތުގައި އިތުރަށް ސަމާލުވުމަށް ވަނީ އަންގާފައެވެ. އެގޮތުން، މަތިންދާބޯޓު ފުރާ ވަގުތާއި ޖައްސާ ވަގުތު އަދި އެއާޕޯޓުގައި އޮންނަ ވަގުތު އިތުރަށް ސަމާލުވުމަށް އިރުޝާދުދީފަވެއެވެ. އެފްއޭއޭގެ ވެބްސައިޓުގައި ބުނެފައިވަނީ ކަޝްމީރުގެ ހަނގުރާމަވެރިންނާ ހިނގަމުންދާ އަސްކަރީ ކުރިމަތިލުންތަކުގެ ސަބަބުން އެމެރިކާގެ ވައިގެ އުޅަނދުތަކުގެ ޝެޑިއުލްއަށް ބުރޫއެރުމަކީ އެކަށީގެންވާކަމެއްކަމަށެވެ. ކުރިން އެންގުމަކާނުލާ އެއާޕޯޓު ބަންދުކުރަންޖެހުމުގެ ސަބަބުން ދަތުރުކުރާ މަންޒިލްގައި ބޯޓު ނުޖެއްސޭގޮތްވުމަކީވެސް ވެދާނެގޮތެއްކަމަށް އެފްއޭއޭއިން ވަނީ ބުނެފައެވެ.
މިދަނޑިވަޅުގައި، ޕާކިސްތާނުގައި ޙަރަކާތްތެރިވަމުންދާ ހަތިޔާރު ގެންގުޅޭ ޖަމާޢަތްތަކުގެ އަތުގައި މަތިންދާބޯޓުތަކަށް ޙަމަލާދެވޭފަދަ މޭން-ޕޯޓަބްލް އެއަރ ޑިފެންސް ސިސްޓަމް ހުރިކަމުގެ ޝައްކުތައް ވަނީ އުފެދިފައެވެ. ފަސޭހަކަމާއެކު އެއްތަނުން އަނެއްތަނަށް ގެންދެވޭ އަދި ކޮނޑުމަތީ ބަހައްޓައިގެން ވައިގެ އުޅަނދުތަކަށް ހަމަލާދިނުމުގެ ޤާބިލްކަން ލިބިފައިވާ މޭންޕޭޑްސް މިސައިލްއަކީ މަތިންދާބޯޓުތަކަށް ނުރައްކާ އެއްޗެކެވެ. މި ބާވަތުގެ ހަތިޔާރު ބޭނުންކޮށްގެން 25،000 ފޫޓު މަތިން ދަތުރުކުރާ މަތިންދާބޯޓު ވައްޓާލުމަކީ ކުރެވިދާނެކަމެކެވެ. މިދުވަސްވަރު އިންޑިއާގެ މަތިންދާބޯޓުތަކުން ޕާކިސްތާނުގެ މަތިން ދަތުރުކުރިއަސް ސީދާ ޕާކިސްތާނަށް ދަތުރުނުކުރަނީ މިހެންވެކަމަށް ބެލެވެއެވެ.
އިންޑިއާއާއި ޕާކިސްތާނަކީ ޒަމާނީ ފެންވަރުގެ ހަނގުރާމަމަތީ ފައިޓަރ ޖެޓްތައް ގެންގުޅޭ ދެ ޤައުމެވެ. މި ދެ ޤައުމުގެ ވައިގެ ބާރުތަކުގެ މެދުގައި ކުއްލިގޮތަކަށް ފެށިދާނެ ކުރިމަތިލުންތަކެއްގެ ނުރައްކާ އެމެރިކާގެ ވައިގެ އުޅަނދުތަކަށް ފޯރާފާނެކަމުގެ ބިރު އެބަ އޮތެވެ. އިންޑިއާއާއި ޕާކިސްތާނާ ދެ ޤައުމުންވެސް ޤަޞްދުގައި މިހާތަނަށް އެއްވެސް މަދަނީ މަތިންދާބޯޓަކަށް ޙަމާދީފައެއް ނުވެއެވެ. ނަމަވެސް މިދިޔަ އަހަރުގެ ފެބްރުއަރީމަހު ކަންތައްވީފަދައިން ކުއްލިގޮތަކަށް ދެ ޤައުމުގެ ފައިޓަރ ޖެޓްތަކުން ތަފާތު އަމާޒުތަކަށް ޙަމަލާދޭން ފަށައިފިނަމަ އެކަމުގެ ނުރައްކާ މަދަނީ މަތިންދާބޯޓުތަކަށް ކުރާނެއެވެ. މިހެންކަމާއެކު އެ ސަރަޙައްދުން ދަތުރުކުރާ ހުރިހާ ވައިގެ އުޅަނދުތައް މިކަމަށް ސަމާލުވާންޖެހެއެވެ.