ވޭތުވެދިޔަ 5 އަހަރު ދުވަހު ޗައިނާ އާއި ރާއްޖޭގައި ދިވެހި ސިވިލް ސަރވިސްގެ 922 މުވައްޒަފުން ތަމްރީނުކޮށްފައިވާކަމަށް އެ ކޮމިޝަނުން ހާމަކުރައްވައިފިއެވެ.
ސިވިލްސާވިސް ކޮމިޝަނާއި ޗައިނާގެ ނޭޝަނަލް އެކަޑަމިކް އޮފް ގަވަރނެންސާއި ގުޅިގެން ކުރިއަށް ގެންދާ ތަމްރީން ޕްރޮގްރާމްތަކަށް 5 އަހަރު ފުރުމުގެ މުނާސަބަތުގައި ބޭއްވި ހަފްލާގައި މިކަން ހާމަކުރެއްވީ ސިވިލް ސަރވިސް ކޮމިޝަންގެ ރައީސް ޑރ.އަލީ ޝަމީމެވެ.
މި ރަސްމިއްޔާތުގައި ޝަމީމް ވިދާޅުވީ ޗައިނާއިން ކުރިއަށް ގެންދާ ކުރު މުއްދަތުގެ ކޯސްތަކަށް ސިވިލް ސަރވިސް ކޮންމެ މުވައްޒަފަކަށް 50 ހާސް ރުފިޔާ ޚަރަދުވާކަމަށެވެ. މިގޮތުން ޗައިނާގައި 242 މުވައްޒަފުންނާއި ރާއްޖޭގައި ހުންނަ ސިވިލް ސާރވިސް ޓްރެއިނިން އިންސްޓިއުޓުން 680 މުވައްޒަފުން ތަމްރީނުކޮށްފައި ވާކަން އޭނާ ފާހަގަ ކުރެއްވިއެވެ. ސިވިލް ސަރވިސް މުވައްޒަފުން ތަމްރީނު ކުރުމަށް ރާއްޖެ އާއި ޗައިނާ ދެމެދު ވެފައިވާ އެއްބަސްވުމުގެ މުއްދަތު މިހާރު ހަމަވެފައިވާކަން ފާހަގަކުރައްވައި ޝަމީމް ވިދާޅުވީ އެ އެއްބަސްވުން އަލުން އައު ކުރާނެކަމަށް އުއްމީދުކުރައްވާކަމަށެވެ. އަދި މި އެއްބަސްވުމުގެ ޒަރިއްޔާއިން ވޭތުވެދިޔަ އަހަރުތަކުގައި ދެ ޤައުމަށް ފައިދާވެފައި ވާކަމަށް އޭނާ ވިދާޅުވިއެވެ.
މި ރަސްމިއްޔާތުގައި ޗައިނާއިން ރާއްޖެއަށް ކަނަޑައަޅުއްވާފައި ހުންނަވާ ސަފީރު ޒާންގް ލިޒޯންގް ދެއްކެވި ވާހަކަފުޅުގައި ވިދާޅުވީ ކުރިއަށް އޮތް އަހަރުތަކުގައިވެސް ޗައިނާއިން ދިވެހި މުވައްޒަފުން ތަމްރީންކުރުމަށް އެހީތެރިވަމުންދާނެކަމަށެވެ. ސަފީރު ވިދާޅުވީ މިއަހަރު އެކަނިވެސް ރާއްޖޭގެ އެކި ދާއިރާތަކުގައި މަސައްކަތްކުރާ 300 އެއްހާ މުވައްޒަފުންނަށް ތަމްރީން ހޯދުމުގެ ފުރުޞަތު ދެވިފައިވާ ކަމުގައި އޭނާ ވިދާޅުވިއެވެ. މީގެ ތެރޭގައި ކައުންސިލަރުންނާއި މަސްވެރިކަމުގެ ސިނާޢަތުގައި ހަރަކާތްތެރިވާ މީހުންވެސް ހިމެނެއެވެ.
ޗައިނާގެ ނޭޝަނަލް އެކަޑަމިކް އޮފް ގަވަރނެންސާއި ސިވިލް ސަރވިސް ކޮމިޝަން ގުޅިގެން ސިވިލް ސަރވިސް މުވައްޒަފުން ތަމްރީން ކުރުމަށް އެއްބަސްވުމެއްގައި ސޮއިކޮށްފައި ވަނީ 2015 ވަނަ އަހަރުގައެވެ. މި އެއްބަސްވުމުގެ ދަށުން ޗައިނާއިން ދިވެހި މުވައްޒަފުންގެ ތެރެއިން މުދައްރިސުންނާއި މެނޭޖަރުންނާއި، ހިއުމަން ރިސޯސް މުވައްޒަފުންނާއި އަދިވެސް އެހެނިހެން ދާއިރާތަކުގައި މަސައްކަތް ކުރާ މުވައްޒަފުން ތަމްރީންކޮށްފައި ވެއެވެ.