އަންނަ މަހު ނޭޕާލްގައި ފަށާ 13 ވަނަ ސައުތު އޭޝިއަން ގޭމްސްގެ ފުޓްބޯޅަ އިވެންޓުގައި ރާއްޖެ އިންޑިއާއާއި އެއް ގްރޫޕެއްގައި ލައްވާލައިފިއެވެ.
ރާއްޖެއާއެކު ގްރޫޕް ބީގައި ދެން ހިމެނޭ ޤައުމު ތަކަކީ އިންޑިއާގެ އިތުރުން ސްރީ ލަންކާއެވެ. ގްރޫޕް އޭގައި ހިމެނެނީ މުބާރާތް ބާއްވާ ޤައުމު ނޭޕާލާއި ބަންގްލަދޭޝް އަދި ބޫޓާންއެވެ.
ސައުތު އޭޝިއަން ގޭމްސްގެ ފުޓްބޯޅަ އިވެންޓް ފަށާނީ އަންނަ މަހުގެ ފުރަތަމަ ދުވަހުއެވެ. މުބާރާތުގެ ފުރަތަމަ މެޗުގައި ބައްދަލުކުރާނީ ނޭޕާލާއި ބަންގްލަދޭޝްއެވެ.
މި މުބާރާތުގައި ރާއްޖެ ކުޅޭ ފުރަތަމަ މެޗުގައި ޑިސެމްބަރ މަހުގެ ދެވަނަ ދުވަހު ނުކުންނާނީ އިންޑިއާއި ދެކޮޅަށެއެވެ. އަދި ގްރޫޕް ސްޓޭޖުގައި ކުޅޭ ދެވަނަ މެޗުގަައި ސްރީ ލަންކާއާއި ދެކޮޅަށް ނުކުންނާނީ ޑިސެމްބަރ މަހުގެ ހަަތަރު ވަނަ ދުވަހުއެވެ. މުބާރާތުގެ ސެމީ ފައިނަލަށް ދަތުރުކުރާނީ ކޮންމެ ގްރޫޕަކުންވެސް އެންމެ ގިނަ ޕޮއިންޓް ހޯދާ ދެ ޓީމެއެވެ.
މި މުބާރާތުގައި ރާއްޖެ ތަމްސީލްކުރާނީ 23 އަހަރުން ދަށުގެ ޤައުމީ ފުޓްބޯޅަ ޓީމްއެވެ. ޒުވާން ޓީމު މުބާރާތުގައި ވާދަކުރިޔަސް ސީނިއާ ތިން ކުޅުންތެރިން ޓީމުގައި ހިމެނުމުގެ ފުރުސަތު ލިބޭނެއެވެ.
މި ގޭމްސްގައި ރާއްޖޭގެ ޤައުމީ އަންހެން ފުޓްބޯޅަ ޓީމުވެސް ވާދަކުރާނެއެވެ. އަންހެން އިވެންޓުގެ ކުޅުން ކުރިޔަށްދާނީ ލީގު އުސޫލުން ކޮންމެ ޓީމެއް ކޮންމެ ޓީމަކާއި ކުޅެ އެންމެ ގިނަ ޕޮއިންޓް ހޯދާ ދެ ޓީމު ފައިނަލަށް ދަތުރުކުރާގޮތަށެއެވެ.
އަންހެން ފުޓްބޯޅަ އިވެންޓުގައި ރާއްޖެ ކުޅޭ ފުރަތަމަ މެޗުގައި ޑިސެމްބަރ މަހުގެ ތިންވަނަ ދުވަހު ނުކުންނާނީ އިންޑިއާއި ދެކޮޅަށެއެވެ. އަދި ޑިސެމްބަރ މަހުގެ ފަސްވަނަ ދުވަހު ނޭޕާލްއާއި ދެކޮޅަށް ނުކުންނައިރު ލީގު ބުރުގެ ފަހު މެޗުގައި ޑިސެމްބަރ މަހުގެ ހަތްވަނަ ދުވަހު ނުކުންނާނީ ސްރީ ލަންކާއާއި ދެކޮޅަށެއެވެ.
މިފަހަރުގެ ގޭމްސް ރަސްމީކޮށް ފެށުމަށް ހަމަޖެހިފައިވަނީ ޑިސެމްބަރ 1 ގައެވެ.