ފ. މަގޫދޫގައި ޤާއިމުކޮށްފައިވާ ސޯލަރ ކަރަންޓު ނިޒާމުން އުފައްދާ ކަރަންޓު ފެނަކަ ކޯޕަރޭޝަނުން ގަތުމާއި ގުޅޭ އެއްބަސްވުމެއްގައި އެރަށު ކައުންސިލާއެކު ސޮއިކޮށްފިއެވެ.
ފ. މަގޫދޫގައި އޮތް ޚާއްސަ ރަސްމިއްޔާތެއްގައި މި އެއްބަސްވުމުގައި ފެނަކައިގެ ފަރާތުން ސޮއި ކުރެއްވީ މެނޭޖިންގ ޑިރެކްޓަރ އަޙްމަދު ސައީދު މުޙައްމަދުއެވެ. އަދި ފ. މަގޫދޫ ކައުންސިލްގެ ފަރާތުން ސޮއިކުރެއްވީ ކައުންސިލްގެ ރައީސް ޢަބްދުﷲ ވަޙީދުއެވެ.
މިއީ ފެނަކަ ކޯޕަރޭޝަނުން ސޮއިކުރި މިފަދަ ފުރަތަމަ ޕަވަރ ޕާރޗޭސް އެއްބަސްވުމެވެ. ފެނަކައިން ބުނީޯ މިއެއްބަސްވުމުން ހާމަކޮށްދެނީ މޯލްޑިވްސް އެނަރޖީ އޮތޯރިޓީގެ މިންގަނޑުތަކާއި އުސޫލުތަކާ އެއްގޮތައް، މިފަދަ އިތުރު، އިންޑެ ޕެންޑެންޓް ޕަވަރ ޕްރޮޑިއުސަރތަކުން އިޔާދަކުރަނިވި ހަކަތައިންއުފައްދާ ކުރަންޓު ގަތުމަށް ފެނަކައިން މިހާރު ތައްޔާރަށް އޮތްކަންކަން ހާމަވާ ކަމެއް ކަމަށެވެ.
މި އެއްބަސްވުމާއެކު ފެނަކައިން އުފައްދާ ކުރަންޓުގެ ބައެއް މި ސޯލަރ ނިޒާމުން ލިބޭ ކުރަންޓުގެ ގޮތުގައި ބޭނުންކުރާނެއެވެ. މީގެ ސަބަބުން ފެނަކައިން ހަކަތަ އުދެއްދުމަށް ބޭނުންކުރާ ތެލުގެ ޚަރަދު ކުޑަ ވެގެންދާނެކަމަށް އެކުންފުނިން ބުނެއެވެ. އަދި މިކަމުގެ ސަބަބުން ކައުންސިލަށްވެސް މަންފާ ލިބިގެންދާނެއެވެ.