ރައީސް ޔާމީންގެ މައްސަލަ މިހާރު އޮތް ހިސާބުން ކުރިއަށްގެންދިއުމަށް އެ މައްސަލަ ބައްލަވާ ބެންޗުން ނިންމަވައިފި
ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމުގެ މައްޗަށް އުފުލާފައިވާ މަނީލޯންޑްރިންގެ ދައުވާ މިހާރު ކުރިއަށް ގޮސްފައިވާ ހިސާބުން ކުރިއަށް ގެންދިއުމަށް އެ މައްސަލަ ބެލުމަށް އަލަށް އެކުލަވާލި ބެންޗުން ނިންމަވައިފިއެވެ.
މިގޮތަށް އެ ބެންޗުން ނިންމަވާފައިވަނީ ރައީސް ޔާމީންގެ މައްޗަށް އުފުލާފައިވާ ދައުވާގެ ޝަރީއަތުގެ އަޑުއެހުންތައް ނިމި ހުކުމް ކުރުމާ ހަމައަށް ގޮސްފައިވަނިކޮށް އެ މައްސަލަ ބެއްލެވި ކްރިމިނަލް ކޯޓުގެ އިސް ގާޒީ އަޙްމަދު ހައިލަމް ސަސްޕެންޑް ކުރުމާ ގުޅިގެން އެ ކޯޓުން އެ މައްސަލަ ބެލުމަށް އަލަށް އެކުލަވާލި ބެންޗުން ބޭއްވި ފުރަތަމަ އަޑުއެހުމުގައެވެ.
މިހާރު ކުރިއަށްދާ ޝަރީއަތުގެ މަޖިލީހުގެ ރިޔާސަތު ބައްލަވާ ގާޒީ ޢަލީ ރަޝީދު ވިދާޅުވީ އެގޮތަށް ނިންމީ މިހާރު މައްސަލައިގެ ހެކިބަސް ނެގުމުގެ ކަންކަންވެސް ނިމިފައިވާތީ ކަމަށެވެ. އަދި ގާޒީއިން ބަދަލުވާ ހާލަތުގައި އަމަލުކުރާނެ ގޮތް ޖިނާއީއިޖުރާއަތު ގާނޫނުގެ 152 ވަނަ މާއްދާގައި ބަޔާންކޮށްފައިވާކަމަށްވެސް އިސް ގާޒީ ވިދާޅުވިއެވެ. އެގޮތުން މައްސަލަ އަލުން ބެލުމަށްވެސް ނުވަތަ މައްސަލަ ނިންމާފައި އޮތް ހިސާބުން ކުރިއަށް ގެންދިއުމަށްވެސް ޖިނާއީ އިޖުރާއަތުގެ ގާނޫނުގައި ބުނެފައިވާކަން އިސް ގާޒީ ވަނީ ފާހަގަކުރައްވާފައެވެ.
މި މައްސަލަ ބައްލަވާ ބެންޗުން މިގޮތަށް ނިންމެވުމުން ދެން އޮންނާނީ މައްސަލައިގެ ހުކުމް އިއްވުމެވެ.
ރައީސް ޔާމިންގެ މައްޗަށް ދައުވާ އުފުލާފައިވަނީ ކޮރަޕްޝަނުގެ ފައިސާ ކަމަށް ތުހްމަތު ކުރެވޭ ފައިސާ އެމަނިކުފާނުގެ އަމިއްލަފުޅު އެކައުންޓަށް ޖަމާވެފައިވަނިކޮށް އެ ފައިސާ އިންވެސްޓުކޮށް އަދި އޭގެ އަސްލު އޮޅުވާލުމަށް މަސައްކަތްކޮށްފައިވާކަމަށް ތުހްމަތު ކުރެވޭ މައްސަލައިގައެވެ. ރައީސް ޔާމިންގެ މައްޗަށް މަނީ ލޯންޑްރައިންގެ ދައުވާ އުފުލާފައިވަނީ މަނީ ލޯންޑްރިންނާއި ޓެރަރިޒަމްއަށް ފައިނޭސްކުރުން ހުއްޓުވުމުގެ ޤާނޫނުގެ 53 ވަނަ މާއްދާގެ (ހ) އާއި ހަވާލާދީ އެ މާއްދާގެ ށ ދަށުނެވެ.
އެ ޤާނޫނު ބުނާ ގޮތުން މަނީލޯންޑްރިންގެ ކުށެއް ކޮށްފި މީހަކަށް ކުށްސާބިތުވެއްޖެނަ ދެ ގޮތަކަށް އަދަބު ދެވިދާނެއެވެ. އެއް ގޮތަކީ އެމީހަކު 100,000 (އެއްލައްކަ) ރުފިޔާއާއި 1,000000 (އެއްމިލިއަން) ރުފިޔާއާ ދެމެދުގެ ޢަދަދަކުން ޖޫރިމަނާކުރުމާއެކު 5 އަހަރާއި 15 އަހަރާ ދެމެދުގެ މުއްދަތަކަށް ޖަލަށްލުމެވެ. އަދި ދެ ވަނަ ގޮތަކީ ޢަމަލު ހިންގުމުގައި ބޭނުންކުރި ފައިސާގެ ޢަދަދު (ލޯންޑަރކުރި ފައިސާގެ ޢަދަދު) ގެ 5 ގުނައަށްވުރެ އިތުރުނުވާ ޢަދަދަކުން ޖޫރިމަނާކުރުމާއެކު 5 އަހަރާއި 15 އަހަރާ ދެމެދުގެ މުއްދަތަކަށް ޖަލަށްލުމެވެ.