ފުލުހުންގެ ދެމުން އަންނަ ނެއިބާރހުޑް ޕޮލިސް ޚިދުމަތް އައްޑޫސިޓީގައި ރަސްމީކޮށް ފަށައިފިއެވެ.
މިޚިދުމަތް ފެށުމަށް މިއަދު ހެނދުނު ގަމުގެ އީކުއޭޓަރ ވިލެޖުގައި ބޭއްވި ރަސްމީއްޔާތު ޝަރަފުވެރި ކޮށްދެއްވީ ކަމިޝަނަރ އޮފް ޕޮލިސް މުޙައްމަދު ޙަމީދުއެވެ. އައްޑޫގައި މިޚިދުމަތް މިއަހަރު މޭއި މަހު ޢަމަލީ ގޮތުން ފަށައި ތަޖްރިބާ ތަކެއް ކޮށްފައި ވެއެވެ. އެގޮތުން މިކަމަށްޓަކައި މިހާތަނަށް މީހުން ދިރިއުޅޭ 1024 ގެއަކަށާއި، އެކި ބާވަތު ވިޔަފާރި ކުރާ 135 ތަންތަނަށް ގޮސް މަޢުލޫމާތު އެއްކޮށް، ނެއިބާރހުޑް ކަނޑައަޅައި، ލިބޭ މަޢުލޫމާތުގެ އަލީގައި ގެންނަން ޖެހޭ ބަދަލުތައް ގެނެވި ޚިދުމަތް އެންމެ ފުރިހަމަ ގޮތުގައި ދިނުމުގެ މަސައްކަތް ފަށާފައިވާ ކަން ފުލުހުން ފާހަގަ ކުރެއެވެ.
އިދާރީ ގޮތުން އައްޑޫ ސިޓީގެ އަވަށްތައް ބެހިފައިވާ ގޮތަށް ބަލައި، އައްޑޫ ސިޓީ ބަހާލެވިފައި ވަނީ މުޅިއެކު 21 ބަޔަކަށް ކަމަށް ފުލުހުން މަުލޫމާތު ދެއެވެ. އަދި މިއިން ކޮންމެ ނެއިބާރހުޑް އަކަށް 2 ސަޕޯޓު އޮފިސަރުން ހަމަޖެހިފައި ވާ ކަމަށްވެސް ފުލުހުން ބުނެއެވެ.
މިރަސްމީއްޔާތުގައި ވާހަކަ ދައްކަވަމުން ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވީ، މިޚިދުމަތަކީ ފުލުހުންގެ ޚިދުމަތުގެ މައިގަނޑު ފަންކްޝަނެއްގެ ގޮތުގައި ދެމިގެން ދިއުމަށް މިހާރު މަސައްކަތް ކުރައްވަމުން ގެންދަވާ ކަމަށެވެ. އަދި މިކަމަށް ޤާނޫނީ ބާރު ދީގެން ނޫނީ އެންމެ އެކަށީގެންވާ ގޮތަށް މިކަން ދެމެހެއްޓިގެން ނުދާނެ ކަން ކޮމިޝަނަރ ފާހަގަ ކުރެއްވިއެވެ.
މިރަސްމީއްޔާތުގައި ވާހަކަ ދައްކަވަމުން އައްޑުސިޓީ މޭޔަރ ޢަބްދުﷲ ސާދިޤް ވިދާޅުވީ، މިހާރު އޮންނަ ނޯމަލް ރޫޓީން ޕޮލިސިންގް އަށް ވުރެ ބޮޑަށް އިފްތިތާޙް ވެގެން މިދާ ނެއިބާރހުޑް ޕޮލިސިންގް ޚިދުމަތުގެ ސަބަބުން ރައްޔިތުންނާއި އެކު ރައްޔިތުންގެ މައްސަލަތަށް ހައްލުކުރުމަށް ގާތުން މަސައްކަތް ކުރެވިގެންދާނެ ކަމަށް އުއްމީދު ކުރައްވާ ކަމަށެވެ. އަދި މިކަމަށް ހުރިހާ ފަރާތަކުން އެއްބާރުލުން ދިނުން މުހިންމު ކަމަށް ވެސް މޭޔަރ ފާހަގަ ކުރެއްވިއެވެ.
މާލޭ ސަރަޙައްދުން ބޭރުގައި ކޮމިއުނިޓީ ޕޮލިސިންގް ތަޢާރަފު ކުރެވިގެން މިދިޔައީ އައްޑޫސިޓީގައެވެ. އަދި މިޚިދުމަތް އިތުރަށް ފުޅާ ކުރުމަށް ރާއްޖެއިން ބޭރަށް ސަޕޯޓު އޮފިސަރުން ފޮނުވައި މިފަދަ ޚިދުމަތެއް ދިނުމަށް އިތުރަށް ތަޖުރިބާ ހޯދުމުގެ މަސައްކަތް ކުރާނެ ކަމަށް ފުލުހުން ބުނެއެވެ.