ޚަބަރު

އިލެކްޝަނަށް މެމްބަރަކު އައްޔަންކުރުން މާދަމާ


އިލެކްޝަންސް ކޮމިޝަން (އީސީ)ގެ މެމްބަރުކަމުގެ މަޤާމަށް ބޭފުޅަކު އައްޔަންކުރުމަށް މަޖިލީޖިލީހުގެ މާދަމާގެ ޖަލްސާއަށް އެޖެންޑާކޮށްފިއެވެ.

އީސީއަށް މެމްބަރަކު އައްޔަންކުރުމަށް މިނިވަން މުއައްސަސާތަކާއިބެހޭ ކޮމިޓީން މަޖިލިސް ތަޅުމަށް ފޮނުވާފައިވާ ރިޕޯޓް މާދަމާގެ ޖަލްސާގައި އިއްވުމަށްވަނީ އެޖެންޑާކޮށްފައެވެ. އަދި މާދަމާގެ ޖަލްސާގައި ވޯޓަށް އެހުން އޮންނާނެއެވެ.

އީސީގެ މެމްބަރުކަމަށް އައްޔަންކުރެއްވުމަސް ރައީސުލްޖުމްހޫރިއްޔާ އިސްކަންދެއްވި 4 ބޭފުޅުންނާއި މިނިވަން މުއައްސަސާތަކާއި ބެހޭ ކޮމިޓީން ވަނީ އިންޓަރވިއުކޮށްފައެވެ. ރައީސް އިސްކަންދެއްވި ހަތަރު ބޭފުޅުންނަކީ ފުއާދު ތައުފީގާއި، އަމްޖަދު މުސްތަފާއާއި މަރިޔަމް ހަނީފް ޙާލިދްގެ އިތުރުން ހަަސަން ނާޒިމްއެވެ. މި ހަތަރު ބޭފުޅުންގެ ތެރެއިން ނާޒިމް ފިޔަވާ ދެން ތިއްބެވި 3 ބޭފުޅޫންގެ ނަން ކޮމެޓީން ވަނީ މަޖިލީހުގެ ތަޅުމަށް ފޮނުވާފައެވެ.

މިބޭފުޅުންގެ ތެރެއިން ލިސްޓްގެ އެންމެ ކުރީގައި އޮތީ ކުރީގެ އިލެކްޝަންސް ކޮމިޝަންގެ ރައީސްކަންކުރައްވާފައިވާ ފުއާދު ތައުފީގުގެ ނަންފުޅެވެ.

އިލެކްޝަންސް ކޮމިޝަންގެ މެމްބަރުކަމަށް ބޭފުޅަކު އައްޔަންކުރުމުގެ މަސައްކަތް ފަށާފައިމިވަނީ އެ ކޮމިޝަންގެ މެމްބަރުކަމުގައި ހުންނެވި ކޮމިޝަންގެ މިހާރުގެ ނާއިބު ރައީސް އަމްޖަދު މުސްތަފާގެ މެމްބަރުކަމުގެ ދައުރު މި މަހުގެ 24 ވަނަދުވަހު ހަމަވާތީއެވެ.

އީސީއަށް އައްޔަންކުރެއްވުމަށް ފޮނުއްވެވި ނަންފުޅުތަކުގެ ތެރެއިން ފުއާދު ތައުފީޤަކީ އެކޮމިޝަންގައި ރައީސްކަން ކުރައްވާފައިވާ އަދި ގިނަދުވަސްތަކެއް ވަންދެން އެކޮމިޝަނުގައި މަސައްކަތްކުރައްވާފައިވާ ބޭފުޅެކެވެ. ސުޕްރީމް ކޯޓުގެ އަމުރަށް ނުކިޔަމަންތެރިވި ކަމަށް ކަނޑައަޅާ ފުއާދު ތައުފީގުގެ މައްޗަށް ވަނީ 2014ވަނަ އަހަރު 6 މަސް ދުވަހުގެ ޖަލު ހުކުމެއް ސުޕްރީމްކޯޓުން އިއްވާފައެވެ. އަދި ފުއާދުގެ މެމްބަރު ކަމުގެ ޝަރުތު ގެއްލިއްޖެކަމަށްވެސް ކޯޓުން ކަނޑައެޅިއެވެ.