މިއީ ފުޓްބޯޅަ ކެރިއަރުގައި އެންމެ މުހިންމު އަހަރުކަމަށް ޤައުމީ ޓީމްގެ ޒުވާން ފޯވާޑް މުޙައްމަދު ޖައިލަމް ބުނެފިއެވެ.
ޒުވާން ޤައުމީ ޓީމާއި ށ.ފޯކައިދޫ ޓީމުން ވިދާލި މުޙައްމަދު ޖައިލަމްއަކީ އެފްއޭއެމުން ހޮވި މިދިޔަ އަހަރު ރާއްޖޭގެ އެންމެ މޮޅު ޒުވާން ކުޅުންތެރިޔާއެވެ. އޭނާ އަންނަނީ މިއަހަރު ޤައުމީ ސްކޮޑުގައި ހިމެނި ޤައުމީ ޓީމާއިއެކު ފަރިތަކުރަމުން. އަދި މިދިޔަ ޖުލައި މަހު އިންޑިއަން އޯޝަން އައިލެންޑް ގޭމްސްގައި ޖައިލަމްވަނީ ޤައުމީ ޓީމުގެ ފުރަތަމަ އެގާރައިގައި ހިމެނިގެން ކުޅެފައެވެ.
އުއްމީދީ ފޯވާޑް މުޙައްމަދު ޖައިލަމް ބުނީ މި އަހަރަކީ ފުޓްބޯޅަ ކެރިއަރުގައި އެންމެ ފާހަގަކޮށްލެވޭ އަހަރުކަމަށާއި، މިއީ ގިނަ ކުރިއެރުންތަކެއް ލިބުނު އަހަރެއްކަމަށެވެ. އޭނާ ބުނީ ޤައުމީ ސްކޮޑުގައި ހިމެނި ޓީމާއިއެކު ގިނަ ފަރިތަކުރުންތަކެއްކޮށް ތަމްރީން ކޭމްޕްތަކުގައި ބައިވެރިވެވުމަކީ އިތުރު އެއްޗެހި ދަސްވެ ފުޓްބޯޅައިގައި ކުރިއަށްދާން ލިބުނު ހިތްވަރެއްކަމަށެވެ.
ވަރލްޑް ކަޕް އަދި އޭޝިއަން ކަޕްގެ ޖޮއިންޓް ކޮލިފައިންގައި ފިލިޕީންސްއާއި ގުއާމްއާއި ވާދަކުރާ މެޗަށް ދިވެހި ޓީމް އަންނަނީ މެލޭޝިޔާގައި ތަމްރީން ހަދަމުންނެވެ.
މި ތަމްރީން ދަތުރާއި ގުޅޭގޮތުން ޖައިލަމް ބުނީ ކޮންމެ ދަތުރެއްގައިވެސް ސީނިއަރ ކުޅުންތެރިންގެ ފަރާތުން ގިނަ ކަންތައްތަކެއް ދަސްވާކަމަށާއި، ކޮންމެ ކޭމްޕެއްގައިވެސް ބޮޑު ހިތްވަރެއް ލިބޭކަމަށެވެ. އޭނާ ބުނީ ޒުވާން ކުޅުންތެރިންގެ ކުރިއެރުމަށް މި ކޭމްޕްތަކުގެ ސަބަބުން ބޮޑެތި ފައިދާތަކެއްކުރާކަމަށެވެ.
"ކޭމްޕް ކޮންމެހެނެއްވިޔަސް ވަރަށް މުހިންމުވާނެތާ، ރާއްޖެއިން ބޭރުގައި (ކޭމްޕް)ކުރާއިރު ހުރިހާ އެންމެންވެސް އެއްތާކު ތިބެގެން އެއްކޮށް އުޅޭއިރު ޓީމްވޯކް ވަރުގަދަވޭނެކަމަށް މިބަލަނީ، ކުރިއެރުންވެސް އަންނާނެ ބޮޑަށް ކޭމްޕްތަކުން"