މިވަގުތު ޤައުމީ ޓީމުގެ ރޫޚު ވަރަށް ރަނގަޅުކަމަށް ޤައުމީ ފުޓްބޯޅަ ޓީމްގެ މިޑްފިލްޑަރ ހުސައިން ނިހާން ބުނެފިއެވެ.
ވަރލްޑް ކަޕާއި އޭޝިއަން ކަޕްގެ ޖޮއިންޓް ކޮލިފައިންގައި ކުރިއަށް އޮތް ދެ މެޗަށް ތައްޔާރުވުމަށް ޤައުމީ ފުޓްބޯޅަ ޓީމް މިހާރު ތަމްރީން ހަދަމުން އަންނަނީ މެލޭޝިޔާގައެވެ. ކޮންމެ ދުވަހަކުވެސް ހެނދުނު ފަރިތަކުރުންތައް ކުރިއަށްގެންދާއިރު، ހަވީރު ފިޒިކަލް ވަރުގަދަ ކުރުމަށް ފިޓްނަސް ކޯޗު މިރްކޯ ކްރުނިޗްގެ އިރުޝާދުގެ ދަށުން ޖިމް ސެޝަންތަކެއްވެސް އަންނަނީ ކުރިއަށް ގެންދަމުންނެވެ.
ޤައުމީ ޓީމްގެ ތައްޔާރީތަކާއި ގުޅޭގޮތުން ވާހަކަދައްކަމުން މިޑްފިލްޑަރ ހުސައިން ނިހާން ބުނީ މުހިންމު ދެ މެޗު ކުރިއަށް އޮތްއިރު ތަމްރީން ކޭމްޕެއް ޖެހުމަކީ ވަރަށް މުހިންމުކަމެއްކަމަށެވެ. އަދި މި ކޭމްޕްގެ ސަބަބުން ޓީމަށް ރަނގަޅު ކުރިއެރުމެއް އަންނާނެކަމަށް އޭނާ ބުންޏެވެ.
ނިހާން ބުނީ ޓީމްގެ ރޫހު ވަރަށް ރަނގަޅުކަމަށައި، ހުރިހާ ކުޅުންތެރިންވެސް ޓީމެއްގެ ގޮތުގައި ބުރަކޮށް މަސައްކަތްކުރަމުން އަންނަކަމަށެވެ. އޭނާ ބުނީ ޓީމްގެ ހުރިހާ ކުޅުންތެރިންގެ އަމާޒަކީވެސް ކުރިއަށް މިއޮތް ދެ މެޗުން ރަނގަޅު ނަތީޖާއެއް ހޯދުންކަމަށާއި، އެކަމަށް ވަރަށް ބޮޑަށް ތައްޔާރުވަމުން އަންނަކަމަށެވެ.
"ޓީމް ސްޕިރިޓް ވަރަށް ރަނގަޅު، ހުރިހާ ކުޅުންތެރިންވެސް އެއްކޮށް ވަރަށް ރަނގަޅަށް މަސައްކަތްކުރަމުން އަންނަނީ. މިއީ ވަރަށް މުހިންމު ކޭމްޕެއް ހަމަ ކުރިއަށް އޮތް ދެ މެޗުގެ ކުރިން. މި ކޭމްޕުން ޓީމަށް ރަނގަޅު ކުރިއެރުން ލިބޭނެ"