ޓީމުގެ ހުރިހާ ކުޅުންތެރިންގެވެސް އަޒުމަކީ ކުރިއަށް މިއޮތް ދެ މެޗު ކާމިޔާބުކޮށް ސަޕޯޓަރުން އުފާކޮށްދިނުންކަމަށް ޤައުމީ ފުޓްބޯޅަ ޓީމްގެ މިޑްފިލްޑަރ އިބްރާހިމް އައިސަމް ބުނެފިއެވެ.
ޤައުމީ ޓީމް މިހާރު ތައްޔާރުވަމުން އަންނަނީ ވަރލްޑް ކަޕް އަދި އޭޝިއަން ކަޕްގެ ކޮލިފައިންގައި ފިލިޕީންސްއާއި ގުއާމްއާއި ދެކޮޅަށް މާލޭގައި ކުޅޭ 2 މެޗަށެވެ. މި 2 މެޗަށް ތާއްޔާރުވުމަށް މެލޭޝިޔާގައި ތަމްރީން ހަދަމުންނެވެ.
ޤައުމީ ޓީމްގެ މިޑްފިލްޑަރ އިބްރާހިމް އައިސަމް ބުނީ މެލޭޝިޔާގެ ޓްރެއިނިންގެ ކޭމްޕްގެ ސަބަބުން ހުރިހާ ކުޅުންތެރިންގެ ޓީމް ވަރކް ރަނގަޅުވެ، ކުޅުންވެސް ރަނގަޅުވަމުން އަންނަކަމަށެވެ. އޭނާ ބުނީ މި ތަމްރީން ދަތުރުގެ ސަބަބުން އެންމެންގެ ގުޅުން ވަރުގަދަވެ ކޯޗު ބޭނުންވާ ގޮތަށް ޓީމް ބައްޓަންކުރަން ވަގުތު ލިބޭނެކަމަށެވެ.
އައިސަމް ބުނީ ހުރިހާ ކުޅުންތެރިންގެ އަމާޒަކީވެސް އެންމެން އެއްކޮށް މަސައްކަތްކޮށް ކުރިއަށް އޮތް ދެ މެޗު ކާމިޔާބުކުރުންކަމަށެވެ. އޭނާ ބުނީ މި މެޗަށް ޓީމް ތައްޔާރުވާ މިންވަރަށް ސަޕޯޓަރުންވެސް ތައްޔާރުވަމުން އަންނަކަމަށާއި، ދެ މެޗުގަައި ވެސް ރަނގަޅު ކުޅުމެއް ދައްކައި މެޗުން މޮޅުވެ ސަޕޯޓަރުން އުފާކޮށްދިނުމަކީ އަމާޒުކަމަށެވެ.
އައިސަމް ބުނީ ކޮންމެ ޕްރެކްޓިސްއަކަށްވެސް ކުޅުންތެރިންދަނީ ވަރަށް ތައްޔާރުވެގެންކަމަށާއި، ކޮންމެ ކުޅުންތެރިއެއްވެސް ވަރަށް ބުރަކޮށް މަސައްކަތްކުރަމުން އަންނަކަމަށެވެ.
"އަސްލު އެންމެންވެސް ވަރަށް ގުޅިގެން މަސައްކަތްކުރަނީ، ވަރަށް ބޮޑަށް އެފަޓްލަމުން އަންނަނީ. ޓީމްގެ ރޫހުވެސް ވަރަށް ރަނގަޅު. އެންމެންގެވެސް އަމާޒަކީ ކުރިއަށް މިއޮތް ދެ މެޗު ކާމިޔާބުކުރު. ވަރަށް ބުރަކޮށް ހުރިހާ ކުޅުންތެރިންވެސް މަސައްކަތްކުރަނީ."