މެލޭޝިޔާ ތަމްރީން ދަތުރުގައި ސީނިއަރ ކުޅުންތެރިންގެ ފަރާތުން ގިނަ ކަންތައްތަކެއް ދަސްވެ ބޮޑު ހިތްވަރެއް ލިބޭކަމަށް ޤައުމީ ފުޓްބޯޅަ ޓީމްގެ ޒުވާން ފޯވާޑް ހަސަން ނަޒީމް ބުނެފިއެވެ.
މެލޭޝިޔާގައި ދިވެހި ޓީމް ތަމްރީން ހަދަމުން އަންނައިރު، މިފަހަރުގެ ސްކޮޑުގައި ޒުވާން ކުޅުންތެރިން ގިނަކަން ފާހަގަކޮށްލެވެއެވެ. މިފަހަރުގެ ތަމްރީން ދަތުރުގައި ބައިވެރިވި އެންމެ ހަގު ކުޅުންތެރިޔަކީ 19 އަހަރުން ދަށުގެ ޤައުމީ ޓީމްގެ ކެޕްޓަން ހަސަން ނަޒީމް. ނަޒީމްއަކީ އަހަރު އަލަށް ޤައުމީ ޓީމުން ޖާގަ ހޯދި ކުޅުންތެރިއެއް. އޭނާވަނީ ވަރލްޑް ކަޕް ކޮލިފައިންގައި ގުއާމްއާއި ދެކޮޅަށް ކުޅެފައެވެ.
މެލޭޝިޔާގެ ތަމްރީންތަކާއި ގުޅޭގޮތުން ޒުވާން ފޯވާޑް ނަޒީމް ބުނީ ހުރިހާ ގޮތަކުންވެސް ވަރަށް ރަނގަޅު ފުރުސަތެއްކަމަށާއި، މިއީ ހަމައެކަނި މިވަގުތަށް އެކަނި ކުރިއަށްދާން ލިބުނު ފުރުސަތެއް ނޫންކަމަށެވެ. މި ކޭމްޕްގެ ފައިދާ ކުރިއަށް އޮތްތަނުގައިވެސް ކުރާނެކަމަށާއި، އެންމެންގެ ފަރާތުންވެސް ވަރަށް ބޮޑު އެހީތެރިކަމަކާއި އެއްބާރުލުމެއް ލިބޭކަމަށެވެ.
ނަޒީމް ބުނީ ކޭމްޕެއްގައި ހުރިހާ ވިސްނުމެއް ހުންނަނީ ޕާފޯމަންސް ރަނގަޅުކޮށް އަބަދުވެސް ތަމްރީން ހެދުމަށްކަމަށާއި، އަބަދުވެސް މިކަމަށް ފޯކަށް ބެހެއްޓަން ކޭމްޕްތަކުގައި ފަސޭހަކަމަށެވެ.
"އަސްލު ވަރަށް ހެލްޕްވޭ އެންމެންވެސް، ވަރަށް ސަޅި ހަމަ، ހޮޓެލްގަވެސް ދަނޑަށް އައިސްވެސް ވަރަށް ކިޔައިދޭ ހަމަ އެއްޗެހި، ކުޅެން ވީ ގޮތާއި، ނުބައިކޮށް ޕޮޒިޝަންގަ އިނަސް އެ ކިޔައިދޭ. ވަރަށް ހެލްޕްވޭ ސީނިއަރ ޕްލޭޔާސް"
ޒުވާން ޓީމާއިއެކު މިއަހަރު ސަރަހައްދީ މެޑަލް ހޯދި ކުޅުންތެރިޔާ ބުނީ މިއަހަރަކީ ހުރިހާ ގޮތަކުންވެސް ވަރަށް ޚާއްސަ އަހަރެއްކަމަށާއި، ކުލަބު ލެވެލްގައި ކުޅެ ސީނިއަރ ޤައުމީ ޓީމުން ފުރުސަތު ލިބުމަކީވެސް ބޮޑު ހިތްހަމަޖެހުމެއްކަމަށެވެ. އަދި މީގެ އިތުރުން އޭނާގެ ކެޕްޓަންކަމުގެ ދަށުން 19 އަހަރުން ދަށުގެ ޤައުމީ ޓީމް ހޯދި މެޑަލް އަކީވެސް މިއަހަރުގެ ބޮޑު ކާމިޔާބީއެއްކަމަށް އޭނާ ބުންޏެވެ.