ހުރިހާ ކުޅުންތެރިންގެވެސް ފޯކަސް ހުރީ ފިލިޕީންސްއާއި ގުއާމް މެޗު ކާމިޔާބުކުރަން އެންމެ ރަނގަޅަށް ތައްޔާރުވުމަށްކަމަށް ޤައުމީ ޓީމްގެ ކީޕަރު މުޙައްމަދު ފައިސަލް ބުނެފިއެވެ.
ޤައުމީ ޓީމް މިހާރު ތައްޔާރުވަމުން އަންނަނީ ވަރލްޑް ކަޕް އަދި އޭޝިއަން ކަޕްގެ ކޮލިފައިންގައި ފިލިޕީންސްއާއި ގުއާމްއާއި ދެކޮޅަށް މާލޭގައި ކުޅޭ 2 މެޗަށެވެ. މި 2 މެޗަށް ތާއްޔާރުވުމަށް މެލޭޝިޔާގައި ތަމްރީން ހަދަމުންނެވެ.
ޤައުމީ ފުޓްބޯޅަ ޓީމްގެ ތައްޔާރީތަކާއި ގުޅޭ ގޮތުން ގޯލްކީޕަރު މުޙައްމަދު ފައިސަލް ބުނީ ހުރިހާ ކުޅުންތެރިންވެސް ތިބީ ފިލިޕީންސް މެޗަށް ވަރަށް ރަނގަޅަށް ތައްޔާރުވުމުގެ އަޒުމުގައިކަމަށާއި، އެ މެޗުން ތިން ޕޮއިންޓް ހޯދުމަކީ ޓާގެޓްކަމަށެވެ. އަދި މިތަމްރީން ދަތުރުގެ ބޭނުން އެންމެ ފުރިހަމަ ގޮތުގައި ހިފާނެކަމަށާއި، ޓީމް ތެރޭގައި ވަރުގަދަ ރޫހެއްވެސް އެބައޮތްކަމަށް ފައިސަލް ބުންޏެވެ.
ޤައުމީ ޓީމްގެ އެއްވަނަ ކީޕަރު ބުނީ އެންމެ މުހިންމުކަމަކީ ސީރިޔާ މެޗުގައި ހެދުނު ގޯސްތައް ރަނގަޅު ކުރަން މި ތަމްރީން ދަތުރުގައި މަސައްކަތްކުރުންކަމަށާއި، ފިލިޕީންސް މެޗަށް ނިކުންނައިރު އެކަންތައްތައް ރަނގަޅުކުރާނެކަމަށެވެ. އޭނާ ބުނީ ސީރިޔާ މެޗުގައި ޑިފެންސް ލައިން ފެނުނީ ވަރަށް ވަރުގަދަކޮށްކަމަށާއި، އެއަށްވުރެ ރަނގަޅު ކުޅުމެއް ދައްކަން ހުރިހާ ކުޅުންެތެރިންވެސް ތައްޔާރުވާނެކަމަށެވެ.
"ހުރިހާ އެންމެންވެސް ވަރަށް ޖޯޝުގައި ތިބީ ފިލިޕީންސް މެޗާއި ގުއާމް މެޗުން 6 ޕޮއިންޓް ހޯދަން، އެންމެންވެސް ހަމަ އެންމެ ރަނގަޅަށް ތައްޔާރުވެ އެ މެޗުގައި ރަނގަޅަށް ކުޅުން ޓާގެޓަކީ. މިއީ ކޮލިފައިންގައި ކުޅޭނެ އެންމެ މުހިންމު ދެ މެޗުވީމަ އެންމެންވެސް ވަރަށް ބޮޑަށް މިކަމާއި އެބައުޅޭ" ފައިސަލް ބުންޏެވެ.