ސައުތް އޭޝިއަން ގޭމްސްގައި ބައިވެރިވުމަށް 13 ކުޅިވަރަކުން ޝައުގުވެރިކަން ފާޅުކޮށްފިއެވެ.
ނޭޕާލްގައި ޑިސެންބަރު މަހުގެ 1އިން 10އަށް ކުރިއަށްގެންދިއުމަށް ހަމަޖެހިފައިވާ ސައުތް އޭޝިއަން ގޭމްސްގައި ރާއްޖޭއިން 13 ކުޅިވަރަކުން ބައިވެރިވުމަށް ޝަޢުގުވެރިކަން ފާޅުކޮށްފައިވައި ވީނަމަވެސް މިގޭމްސްގައި ބައިވެރިކުރާނެ ކުޅިވަރުތަށް ނިންމާނީ ސްޕޯޓްސް ކައުންސިލުންނެވެ. ޑިސެންބަރު މަހުގައި އޮންނަ ސައުތް އޭޝިއަން ގޭމްސްގައި ބައިވެރިވާން ޝައުގުވެރިކަން ފާޅުކޮށްފައިވާ ކުޅިވަރުތަކަކީ އެތްލެޓިކްސް، ސްވިމިންގް، ބެޑްމިންޓަން، ޓޭބަލް ޓެނިސް، ޓެނިސް، ޝޫޓީން، ބާސްކެޓް، 3 އޮން 3 ، ވޮލީ ބޯލް، ބީޗް ވޮލީ، ކްރިކެޓް، ފުޓްބޯޅަ އަދި ހޭންޑްބޯލްއެވެ.
މި13 ކުޅިވަރުންވެސް އަންހެން އަދި ފިރިހެން ޓީމްވެސް ބައިވެރިކުރަން އެސޯސިއޭޝަންތަކުން ބޭނުންވެއެވެ. ޔޫތް މިނިސްޓްރީން ބުނީ އެސޯސިއޭޝަންތަކާއި މިހަފްތާގެ ތެރޭގައި ސްޕޯޓްސް ކައުންސިލުން ވަކިވަކިން ބައްދަލުކުރުމަށް ނިންމާފައިވާކަމަށާއި ސައުތް އޭޝިއަން ގޭމްސްއަށްދާނެ ކުޅިވަރުތައް ނިންމާނީ އެސޯސިއޭޝަންތަކާއި ބައްދަލުކޮށް، މިއަންނަ ހަފްތާގެ ތެރޭގައިކަމަށެވެ.
ޔޫތް މިނިސްޓްރީން ބުނީ ސައުތް އޭޝިއާގެ ގައުމުތަކުން ވާދަކުރާ މުބާރާތަކަށްވުމުން، މިމުބާރާތުން ރާއްޖެއަށް މާބޮޑު ކާމިޔާބީއެއް ލިބޭނެކަމަށް އުއްމީދު ނުކުރާކަމަށާއި މިމުބާރާތުގައި ވާދަކުރާނެ ކުޅިވަރުތަށް ނިންމާނީ ކުޅިވަރުތަކުން ގޭމްސްއަށް ވެފައިވާ ތައްޔާރީތަކަށް ބަލާފަކަމަށެވެ. މެޑަލް ނުލިބުނަސް ވާދަކުރެވޭނެ ކުޅިވަރުތަކާއި ތަޖްރިބާގެ މެޗްތައް އެންމެ ބޭނުންވަނީ ކޮން ކުޅިވަރަކަށް ކަމަށްވެސް ކައުންސިލް ނިންމާނެކަމަށް ޔޫތް މިނިސްޓްރީއިން މަޢުލުމާތުދީފައިވެއެވެ.
ސައުތް އޭޝިއަން ގޭމްސްގައި ބައިވެރިވާނެ ކުޅިވަރުތައް އަދި ނިންމާފައިނުވާއިރު، މިހާރުވެސް ބައެއް ކުޅިވަރުތަކުންދަނީ ވަރަށް ބުރަކޮށް މަސައްކަތް ކުރަމުން އަދި ބައެއް އެސޯސިއޭޝަންތަކުންދަނީ ރާއްޖޭއިން ބޭރުގައި ކޭމްޕްވެސް ކުރަމުންނެވެ.