ގޯލްޑެން ފުޓްސަލް އެސޯސިއޭޝަނުން އިންތިޒާމްކޮށްގެން ކުރިޔަށްގެންދާ "ގޯލްޑެން ފުޓްސަލް ޗެލެންޖް" ގެ ސެމީ ފައިނަލަށް ދަތުރުކުރި ޓީމުތަށް ކަށަވަރުވެއްޖެއެވެ.
ހުޅުމާލޭގައި ކުރިޔަށްދާ މި މުބާރާތުގެ ކުއާޓާ ފައިނަލުގެ މެޗުތައް ރޭ ވަނީ ކުޅެފައެވެ. އެގޮތުން މި މެޗުތައް ކާމިޔާބުކޮށް ސެމީ ފައިނަލަށް ދަތުރުކުރި ޓީމުތަކަކީ، ށ.ގޮއިދޫ، ބ.އޭދަފުށި އަދި ތ.ތިމަރަފުށީގެ އިތުރުން ލ.ގަން ފުޓްސަލް ޓީމެއެވެ.
މުބާރާތުގެ ކުއާޓާ ފައިނަލުގެ ފުރަތަމަ މެޗުގައި ބައްދަލުކުރީ ބ.އޭދަފުއްޓާއި ރ.އިނގުރައިދޫއެވެ. މި މެޗުގެ ފުރިހަމަ ވަގުތު ހަމަވިއިރު ދެ ޓީމުވެސް ވަނީ 1-1 އިން އެއްވަރުވެފައެވެ. މެޗުގައި އިނގުރައިދޫ ޓީމުން ޖެހި ލަނޑު އަޙުމަދު އައިހަމް ކާމިޔާބުކޮށްދިން އިރު އޭދަފުށިން ޖެހި ލަނޑު އެޓީމަށް ކާމިޔާބުކޮށްދިނީ ހާފިޒް އަޙުމަދުއެވެ. މެޗުގެ ނަތީޖާ ނެރެން ޖެހި ޕެނަލްޓީގައި އިނގުރައިދޫގެ މައްޗަށް އޭދަފުށި ކުރި ހޯދީ 4-5 ގެ ނަތީޖާއަކުންނެވެ. މި މެޗުގެ މޮޅު ކުޅުންތެރިޔާގެ މަޤާމް ހޯދީ ބ.އޭދަފުށި ޓީމުގެ އަޙުމަދު އަޝްރަފް ޔޫސުފްއެވެ.
ކުއާޓާ ފައިނަލުގެ ދެވަނަ މެޗުގައި ކ.ގުރައިދޫ އަދި ށ.ގޮއިދޫ ބައްދަލުކުރި މި މެޗު 2-3 ގެ ނަތީޖާއަކުން ކާމިޔާބުކުރީ ށ.ގޮއިދޫ ޓީމުންނެވެ. މި މެޗުގައި ގޮއިދޫ ޓީމުން ޖެހި ލަނޑުތައް އެޓީމަށް ކާމިޔާބުކޮށްދިނީ، މުހައްމަދު މިސްބާހް އަދި ހުސައިން ނަސީމްގެ އިތުރުން އިބްރާހިމް ޢަލީއެވެ. ގުރައިދޫ ޓީމުން ޖެހި ދެ ލަނޑު އެޓީމަށް ކާމިޔާބުކޮށްދިނީ، އަޙުމަދު ނަބީލް އަދި އަޙުމަދު ޝުޢޫންއެވެ. މި މެޗުގެ މޮޅު ކުޅުންތެރިޔާގެ މަޤާމް ހޯދީ ށ.ގޮއިދޫ ޓީމުގެ މުހައްމަދު މިސްބާހްއެވެ.
މުބާރާތުގެ ކުއާޓާ ފައިނަލުގެ ތިންވަނަ މެޗުގައި ބައްދަލުކުރީ ތ.ތިމަރަފުއްޓާއި އދ.އޮމަދޫއެވެ. މި މެޗު 3-8 ގެ ނަތީޖާއަކުން ކާމިޔާބުކުރީ ތިމަރަފުއްޓެއެވެ. މެޗުގައި ތިމަރަފުށި ޓީމުން ޖެހި ލަނޑުތައް އެޓީމަށް ކާމިޔާބުކޮށްދިނީ، އިބްރާހިމް އަސްވަދު، ޢަލީ ޝިފާއު އަދި ޢިސްމާއިލް މުނީޒްއެވެ. އޮމަދޫ ޓީމުން ޖެހި ލަނޑުތައް އެޓީމަށް ކާމިޔާބުކޮށްދިނީ، މޫސާ އަރީފް އަދި އިސްމާއިލް މަހުފޫޒްއެވެ. މެޗުގެ މޮޅު ކުޅުންތެރިޔާގެ މަޤާމް ހޯދި ތ.ތިމަރަފުށި ޓީމުގެ އިބްރާހިމް އަސްވަދުއެވެ.
ކުއާޓާ ފައިނަލުގެ ފަހު މެޗުގައި ރޭ ގދ.މަޑަވެލިގެ މައްޗަށް ލ.ގަން ކުރި ހޯދީ 1-5 ގެ ނަތީޖާއަކުންނެވެ. މި މެޗުގައި ގަމު ޓީމުން ޖެހި ލަނޑުތައް އެޓީމަށް ކާމިޔާބުކޮށްދިނީ، ހުސައިން ޝަރީފް، އަލީ ޝާމިސް އަދި މުހައްމަދު މުސްލިހްގެ އިތުރުން ހުސައިން ނާޝިދުއެވެ. މަޑަވެލި ޓީމުން ޖެހި ހަމައެކަނި ލަނޑު އެޓީމަށް ކާމިޔާބުކޮށްދިިނީ ޒަމްޢަތު މުހައްމަދު ވަޙީދުއެވެ. މެޗުގެ މޮޅު ކުޅުންތެރިޔާގެ މަޤާމް ހޯދީ ލ.ގަމުގެ ޓީމުގެ ހުސައިން ޝަރީފްއެވެ.
މި ނަތީޖާއާއެކު މުބާރާތުގެ ސެމީ ފައިނަލުގެ ފުރަތަމަ މެޗުގައި މާދަމާ ރޭ ބައްދަލުކުރާނީ ށ.ގޮއިދޫއާއި ބ.އޭދަފުއްޓެއެވެ. ސެމީ ފައިނަލުގެ ދެވަނަ މެޗުގައި ތި.ތިމަރަފުށި ނުކުންނާނީ ލ.ގަން ފުޓްސަލް ޓީމާއި ދެކޮޅަށެވެ. މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ އަންނަ ހޮނިހިރު ދުވަހުގެރެއެވެ.
މި އަހަރުގެ މުބާރާތުގައި 66 ޓީމަކުން ވަނީ ބައިވެރިވެފަ އެވެ. މުބާރާތުގެ ޗެމްޕިއަން ޓީމަށް 65،000 ރުފިޔާ ކަނޑައަޅާފައިވާއިރު ރަނަރަޕް ޓީމަށް 25،000 ރުފިޔާ ދޭނެ އެވެ.