2020ވަނަ އަހަރު ބާއްވާ އެމެރިކާގެ ރިޔާސީ އިންތިޚާބުގައި ވާދަކުރައްވަން މަސައްކަތްކުރައްވަމުން ގެންދަވާ ބަރނީ ސެންޑަރސް ހިތްޕުޅުގެ އާލާސްކަންފުޅެއްގައި ކުއްލިގޮތަކަށް ހޮސްޕިޓަލުގައި އެޑްމިޓްކޮށްފިއެވެ. ޢުމުރުފުޅުން 78 އަހަރުގެ ސެންޑަރސްއަކީ ވަރމޮންޓްގެ ފަރާތުން އެމެރިކާގެ ސެނެޓްގައި އިންނަވާ ބޭފުޅެކެވެ.
އެމެރިކާގެ ލަސް ވޭގަސްގައި ކެމްޕެއިންކުރައްވަން އުޅުއްވަނިކޮށް ކުއްލިއަކަށް މޭފުޅަށް ތަދެއް އެރުމާއި ގުޅިގެން ސެންޑަރސްވަނީ ހޮސްޕިޓަލަށް ގެންގޮސް ފަރުވާދޭން ފަށާފައެވެ. ޓެސްޓްތަކަށްފަހު ހިތަށް ލޭ ފޮނުވައިދޭ ނާރެއް ބެދިފައިވާކަމަށް ދެއްކުމުން ޑޮކްޓަރުން މިހާރު ވަނީ ލޭ ދައުރުކުރުމަށްޓަކައި ދެ ސްޓެންޓް ލައްވާފައެވެ.
ސެންޑަރސްއަށް ލަފާއަރުވާ ޖެފް ވީވާ ވިދާޅުވީ ސެންޑަރސްގެ ހާލުކޮޅު މިހާރު އަންނަނީ ރަނގަޅުވަމުންކަމަށެވެ. ނަމަވެސް އަރާމުކުރަން ދުވަސްތަކެއް ނަގާނެތީ ރިޔާސީ ކެމްޕެއިންގެ މަސައްކަތް މިވަގުތަށް ވަނީ މެދުކަނޑާފައިކަމަށް އޭނާ ވިދާޅުވިއެވެ. އަދި އަލުން ކެމްޕެއިން ފަށާނެ ދުވަހެއް ފަހުން އިޢުލާނުކުރާނެކަމަށް އޭނާ ވަނީ ވިދާޅުވެފައެވެ.
ސެންޑަރސްއަކީ ޑިމޮކްރަޓިކް ޕާޓީގެ ފަރާތުން ރިޔާސީ ރޭހުގައި ވާދަކުރަން މިފަހަރު ނުކުތް 19 ކެނޑިޑޭޓުންގެ ތެރެއިން އެންމެ ޢުމުރުން ދުވަސްވީ ބޭފުޅާއެވެ.