އެމެރިކާގެ އައު ޖޮއިންޓް ޗީފް އޮފް ސްޓާފް މާރކް މިލޭ ހުވާކުރެއްވުމުގެ ރަސްމިއްޔާތަށް ވަޑައިގެން، އެމެރިކާގެ ރައީސް ޑޮނަލްޑް ޓްރަމްޕް އޭނާއަށް މަރުޙަބާ ވިދާޅުވެއްޖެއެވެ. އެއަށްފަހު ޓްރަމްޕްވަނީ ހައުސް އިންޓެލިޖެންޓް ކޮމިޓީގެ ޗެއަރމަން އެޑަމް ޝިފްއަށް ހޫނު ބަހުގެ ޙަމަލާތަކެއް ރައްދުކުރައްވާފައެވެ.
ޓްރަމްޕް ކުރެއްވި ޓުވީޓެއްގައި ވިދާޅުވެފައިވަނީ އެމެރިކާގެ ޤާނޫނުހަދާ މަޖިލީހުގެ ތިރިގޭގައި އޭނާއާއި ގުޅޭ ޝަރީޢަތެއް ފެށުމުގެ ކަންކަމުގައި އެންމެ އިސްކޮށް ހުންނެވި އެޑަމް ޝިފް ޤައުމަށް ޚިޔާނާތްތެރިވުމުގެ ކުށުގައި ހައްޔަރުކުރަންޖެހޭކަމަށެވެ.
ޖުލައި މަހުގެ 25ވަނަ ދުވަހު ޓްރަމްޕް ޔޫކްރެއިންގެ ރައީސް ވޮލޮޑިމީރް ޒެލެންސްކީއަށް ކުރެއްވި ފޯނުކޯލެއްގައި ޖޯ ބައިޑަންއާއި އޭނާގެ ދަރިފުޅު ހަންޓަރ ބައިޑަން ޔޫކްރެއިންގެ ވިޔަފާރި ކުންފުންޏެއްގެ ބޯޑު މެންބަރުންގެ ގޮތުގައި ތިއްބެވިއިރު ހިންގެވި މުޢާމަލާތުތައް ތަޙުޤީޤުކޮށްދެއްވުމަށް އެދިލެއްވިކަމަށް ބުނާ ވާހަކަތައް ޓްރަމްޕްވަނީ ދޮގުކުރައްވާފައެވެ. ޓްރަމްޕް ވިދާޅުވީ އެ ފޯނު ކޯލުގައި އޭނާ ވިދާޅުވިކަމަށް ބުނެ، ޝިފް ދައްކަވަމުންގެންދަވާ ވާހަކަތަކާއި އޭނާއާއި އެއްވެސް ގުޅުމެއްނެތްކަމަށެވެ. ޝިފް ވާހަކަތައް ހަދަހަދައިގެން ކޮންގްރެސްއަށާއި އެމެރިކާގެ ރައްޔިތުންނަށް އިއްވަމުންދާކަމަށް ޓްރަމްޕް ތުޙުމަތުކުރެއްވިއެވެ.
ވަރޖިނިއާގައި އޮތް ރަސްމިއްޔާތުގައި ޓްރަމްޕް ވިދާޅުވީ އެމެރިކާގައި 20ވަނަ އަށް ޢައްޔަނުކުރެވުނު އާ ޗެއަރމަން އޮފް ޖޮއިންޓް ޗީފް އޮފް ސްޓާފް، މިލޭގެ ފަރާތުން އެމެރިކާ ދިފާޢުކުރުމުގައި އެންމެން އުންމީދުކުރާފަދަ ޚިދުމަތްތަކެއް ފެނިގެންދާނެކަމަށެވެ.