އިންސާނިއްޔަތަށް ޚިދުމަތް ކޮށްދިނުމާއި އިންސާނިއްޔަތަށް މަސައްކަތް ކުރުމުގައި އެއްބާރުލުން ދިނުމުގެ އެމް.އޯ.ޔޫއެއްގައި މޯލްޑިވްސް ޕޮލިސް ސަރވިސްއާ މޯލްޑިވްސް ރެޑްކްރެސެންޓާ ދެމެދު ސޮއިކޮށްފިއެވެ.އެމް.އޯ.ޔޫގައި ސޮއިކުރުމަށްފަހު ވާހަކަފުޅު ދައްކަވަމުން ކޮމިޝަނަރ އޮފް ފޮލިސް ހުސެއިން ވަހީދު ވިދާޅުވީ މިއެއްބަސްވުމުގައި ސޮއިކުރެވުމާއެކު ފުލުހުންނާ ރެޑްކްރެސެންޓް ގުޅިގެން ހިންގާ ހަރަކާތްތަކުގައި ރަސްމީ ސިފަ ޖެހިގެންދިޔައީކަމަށެވެ. ސީޕީ ވިދާޅުވީ އިންސާނީ ޚިދުމަތް ފޯރުކޮށްދިނުމުގައި ފުލުހުންނަށް އަބަދުވެސް ރެޑްކްރެސެންޓްގެ ފަރާތުން އެހީތެރިކަމާ އެއްބާރުލުން ލިބެމުންދާކަމަށާއި، ކުރިއަށްއޮތްތަނުގައި މިގުޅުން އިތުރަށް ވަރުގަދަވެގެންދާނެކަމަށެވެ.މޯލްޑިވްސް ރެޑްކްރެސެންޓްގެ ސެކެޓަރީ ޖެނެރަލް އަބްދުއްރައްޒާޤް އިބްރާހީމް ވިދާޅުވީ މި އެމް.އޯ.ޔޫގެ ސަބަބުން ޒުވާނުން ކުށުގެ ވެށިން ދުރުކުރުމަށް ކުރަމުންދާ މަސައްކަތަށް އެމް.އާރ.ސީގެ ފަރާތުން އެހީތެރިކަން ފޯރުކޮށްދިނުމުގެ ފުރުސަތު ލިބިގެންދާނެކަމަށެވެ.