މަރާމާތު ކުރުމުގެ މަސައްކަތް ކުރިއަށްދާތީ އިސްލާމީ މަރުކަޒުގެ ޖަލްސާކުރާ މާލަމުގައިވެސް ހުކުރު ނަމާދު ކުރާނެ
އިސްލާމީ މަރުކަޒު މަރާމާތު ކުރުމުގެ މަސައްކަތް ކުރިއަށްދާތީ މިއަދުގެ ހުކުރު ނަމާދު ކުރުމުގެ އިންތިޒާމް އިސްލާމީ މަރުކަޒުގެ ޖަލްސާކުރާ މާލަމުގައިވެސް ހަމަޖައްސާފައިވާކަމަށް އިސްލާމިކް މިނިސްޓްރީން ވިދާޅުވެއްޖެއެވެ.
އިސްލާމިކް މިނިސްޓްރީން ވިދާޅުވީ އެގޮތަށް އިންތިޒާމް ހަމަޖައްސާފައިވަނީ މަރާމާތު ކުރުމުގެ މަސައްކަތްކުރިއަށްދާތީ އިސްލާމީ މަރުކަޒުގެ ވާތްފަޅި ބަންދުކޮށްފައިވާތީ ހުކުރުނަމާދުކުރުމަށްދާ ފަރާތްތަކަށް ފަސޭހަ ކޮށްދިނުމުގެ ގޮތުން ކަމަށެވެ.
އިސްލާމީ މަރުކަޒުގެ ވަސީލަތްތައް އާކޮށް، މަރާމާތުކުރުމުގެ މަސައްކަތް ކުރަނީ ސަޢޫދީއަރަބިއްޔާގެ އަމިއްލަ ޖަމްޢިއްޔާއެއްކަމަށްވާ ޚަލީފާ ބިން ޒައިދު އަލް ނަޙްޔާން ފައުންޑޭޝަންގެ ހިލޭ އެހީގެ ދަށުންނެވެ. އިސްލާމިކް މިނިސްޓްރީއިން ވިދާޅުވީ މި މަޝްރޫޢުގެދަށުން މިސްކިތުގެ ސައުންޑް ސިސްޓަމާއި، ހުރިހާ ބޮކިތަކާއި ފަންކާތައް މިހާރު ބަދަލުކޮށް ނިމިފައިވާކަމަށެވެ. އަދި މިސްކިތުގެ އެތެރޭގައި އެއްކޮށް ކުލަލުމާއި، ލަކުޑީގެ ބައިތައް ސާފުކޮށް އަލުން ވަރނިޝް ކުރުމުގެ މަސައްކަތް ކުރަމުންދާކަމެވެ.
މި މަޝްރޫޢުގެ އެންމެ ބޮޑު މަސައްކަތެއްގެ ގޮތުގައި ކުރުމަށް ހަމަޖެހިފައިވަނީ މިސްކިތުގެ ޓިނު ބަދަލުކުރުމާއި، މިސްކިތުގެ ގުއްބާއި ކާޕެޓުތައް ބަދަލުކުރުމުގެ މަސައްކަތްކަމަށް އިސްލާމިކް މިނިސްޓްރީން ވިދާޅުވެއެވެ. މީގެއިތުރުން މިސްކިތުގައި ބޮޑު 2 ފަންކާ ހަރުކުރުމާއި، މިސްކިތުގެ 4 ޗާންދަލިއާވެސް ބަދަލުކުރުމަށް ހަމަޖެހިފައިވާކަމަށް އިސްލާމިކް މިނިސްޓްރީއިން ވިދާޅުވެއެވެ. މި މަސައްކަތް ކުރިނަމަވެސް މިސްކިތުގެ އެއްވެސް ޑިޒައިނަކަށް ބަދަލެއް ނުގެންނާނެއެވެ.