ސިއްޙަތަށް ގެއްލުންވާ މިންވަރަށް މެލޭޝިއާގައި ދުންބޯވެ، ވައި ނުސާފުވުމުގެ ސަބަބުން އެ ޤައުމުގެ 1،500 ސްކޫލެއް ވަގުތީގޮތުން ބަންދުކޮށްފިއެވެ.
މެލޭޝިއާ ސަރުކާރުން ބުނީ އެ ޤައުމަށް ދުމުގެ އަސަރު ކޮށްފައިވަނީ އަވަށްޓެރި އިންޑޮނޭޝިއާގެ އެތައް ސަރަޙައްދެއްގައި އަނދަމުންދާ އަލިފާންގަނޑުތަކުން އަރާ ދުންތައް ވައިގެ މިސްރާބާއެކު މެލޭޝިއާއާ ދިމާއަށް ފޯރާފައިވާތީކަމަށެވެ. ރައްދުގައި އިންޑޮނޭޝިއާއިން ބުނެފައިވަނީ ދަނޑުވެރިކަމުގެ ދާއިރާގައި މަސައްކަތްކުރާ މެލޭޝިއާގެ ބައެއް ކުންފުނިތައްވެސް އެކަމުގެ ޒިންމާއުފުލަންޖެހޭނެކަމަށެވެ.
ނޫސްވެރިންނާ ވާހަކަދައްކަވަމުން އިންޑޮނޭޝިއާގެ ތިމާވެއްޓާބެހޭ ވަޒީރު ސިތީ ނޫރްބަޔާ ބަކަރް ވިދާޅުވީ އިންޑޮނޭޝިއާގެ ޖަންގަލިތަކުގައި ރޯވާން މެދުވެރި ސަބަބުތައް އޮޅުންފިލުވާދިނުމުގައި މެލޭޝިއާއިން މުޅިން އިޚްލާސްތެރި ނޫންކަމަށެވެ. އޭނާވަނީ މި އަލިފާންގަނޑުތަކުގެ ޒިންމާ ނަގަންޖެހޭ މެލޭޝިއާގެ 4 ކުންފުންޏެއްކަމަށް ވިދާޅުވެ، އެ ކުރުންފުނިތައް ފާހަގަކުރައްވާފައެވެ. އަދި އެ ކުންފުނިތަކަކީ ކާށިތެޔޮ އުފައްދާ ކުންފުނިތަކެއްކަމަށްވެސް އިންޑޮނޭޝިއާގެ ތިމާވެއްޓާބެހޭ ވަޒީރު ވިދާޅުވިއެވެ.
އިންޑޮނޭޝިއާގައި ދަނޑުވެރިކަމަށް ބިން ސާފުކުރުންފަދަ ބޭނުންތަކަށް ޖަންގަލިތަކުގައި އަލިފާންރޯކުރުމަކީ ޢާންމުކަމެކެވެ. މީގެއިތުރުން، ކޮންމެ އަހަރަކު އިންޑޮނޭޝިއާގެ ޖަންގަލިތަކުގައި ޤުދުރަތީ ގޮތުންވެސް އަލިފާން ރޯވެއެވެ.