ނުރައްކާވާގޮތަށް ބާވެ ހަލާކުވެފައިވާ 11 އިމާރާތެއް މާލެއިން ފާހަގަވެފައިވޭ - ޕްލޭނިންގ މިނިސްޓްރީ

އާންމު ރައްޔިތުންނަށް ނުރައްކާވާގޮތަށް، ބާވެ ހަލާކުވެފައިވާ 11 އިމާރަތެއް މާލެއިން ފާހަގަވެފައިވާކަމަށް ޕްލޭނިންގ މިނިސްޓްރީއިން ވިދާޅުވެއްޖެއެވެ.

ޕްލޭނިންގ މިނިސްޓްރީއިންވަނީ އިމާރާތްކުރުމާއިގުޅޭ 13 ޤަވާއިދެއްވެސް ހަދައި އެއަށް ޢަމަލުކުރަން ފަށާފައެވެ.

ޕްލޭނިންގ މިނިސްޓްރީއާ ގުޅޭ މަޢުލޫމާތު ނޫސްވެރިންނާއި ޙިއްސާކުރުމަށް ބޭއްވި "ނުވަގަޑު" ޕްރޮގްރާމްގައި ޕްލޭނިންގ މިނިސްޓްރީއިން ވިދާޅުވީ އެ މިނިސްޓްރީއިން މާލޭގައި ކުރިއަށްގެންދިޔަ އިންސްޕެކްޝަންތަކުގައި ބާވެ ހަލާކުވެ އާއްމުންނަށް ނުރައްކާވާގޮތަށް ހުރި 11 ގެއެއް ފާހަގަވެފައިވާކަމަށެވެ.

މިނިސްޓްރީގެ ކޮންސްޓްރަކްޝަން އިންޑަސްޓްރިއަލް ޑިވެލޮޕްމަންޓް ޑިޕަރޓްމަންޓުގެ ޑިރެކްޓަރ ޖެނެރަލް އަޙްމަދު ތަލްހަތް ވިދާޅުވީ މިފަދަ އިމާރާތްތައް ފާހަގަކޮށް އިމާރާތުގެ އެސެސްމަންޓް ހަދައި އެފަދަ ފަރާތްތަކާމެދު ފިޔަވަޅުއެޅުމަށް މާލެ ސިޓީ ކައުންސިލަށް ފޮނުވާފައިވާކަމަށެވެ. މި ގެތަކުގެ ތެރޭގައި ހިމެނެނީ ހެންވޭރުގެ 5 ގެއަކާއި، މާފަންނުގެ 4 ގެއާއި، މައްޗަންގޯޅީގެ 3 ގެއެއް ކަމަށް ޕްލޭނިންގ މިނިސްޓްރީން ވިދާޅުވެއެވެ.

ތަލްހަތް ވިދާޅުވީ މިނިސްޓްރީއިން ހިންގާ ހެލްތް އެންޑް ސޭފްޓީ ޕްރޮގްރާމްގެދަށުން މިދިޔަ އޮގަސްޓްމަހުގެ ނިޔަލަށް 337 ތަނެއް ބަލާފައިވާކަމަށެވެ. އަދި މައްސަލަތައް ފާހަގަވި ތަންތަން ސިޓީ ކައުންސިލަށް ހުށައަޅައި، އިސްލާހުކުރުމަށް އެންގުމަށް އެދިފައިވާކަމަށެވެ.

ޕްލޭނިންގ މިނިސްޓްރީއިން ވިދާޅުވީ އިމާރާތްކުރާ ސައިޓުތަކާއި، ކޮންސްޓްރަކްޝަން މަސައްކަތަކުގެ ކޮލިޓީ ރަނގަޅުކޮށް އާއްމުންނަށް ރައްކާތެރި ތަންތަނަށް ހެދުމަށް މިނިސްޓްރިއިން ޚާއްސަ އިސްކަމެއް ދީގެން މަސައްކަތްކުރައްވަމުންދާކަމަށެވެ. އެގޮތުން އިމާރާތްކުރުމުގެ 13 ޤަވާއިދެއް ހަދައި، ގަވައިދާ ޚިލާފުވި ގިނަ ފަރާތްތަކަކަށް ފިޔަވަޅު އަޅާފައިވާކަމަށް ތަލްހަތު ވިދާޅުވިއެވެ. އޭނާ ވިދާޅުވީ ޤަވާއިދާ ޚިލާފުވެގެން މިހާތަނަށް އެންމެ ބޮޑު އަދަދަކަށް ޖޫރިމަނާކޮށްފައިވަނީ 5 ލައްކަ ރުފިޔާއިން ކަމަށެވެ.

މިނިސްޓްރީން ވިދާޅުވެފައިވަނީ ކޮންސްޓަރަކްޝަން ސައިޓުތަކާއި، އިމާރާތްކުރުމުގެ ފެންވަރު ރަނގަޅުކުރުމަށް ބާރުއެޅުމަށް މަސައްކަތްތައް ކުރާކަމަށެވެ. އެގޮތުން ސިމެންތިއާއި، ހިލައާއި ހިލަވެލި އެތެކުރުމުގެ ހުއްދަ ދެނީވެސް ކޮލިޓީއަށް ބެލުމަށް ފަހުގައި ކަމަށް މިނިސްޓްރީން ވިދާޅުވެއެވެ.

މިނިސްޓްރީއިން ވިދާޅުވީ އެޕްރޫވްކުރާ ޑިޒައިން ނޫން ގޮތްގޮތަށް އިމާރާތްކުރަމުންދާކަންވެސް ފާހަގަވެފައިވާކަމަށެވެ. އެގޮތުން ޑިޒައިންކުރި ފަންގިފިލާއަށްވުރެ، އިރުރު ފަންގިފިލާ ހިމަނައިގެން ގެ އިމާރާތްކުރާކަންވެސް ފާހަގަވެފައިވާކަމަށް މިނިސްޓްރީން ވިދާޅުވެއެވެ.

މިނިސްޓްރީގެ ކޮންސްޓްރަކްޝަން އިންޑަސްޓްރިއަލް ޑިވެލޮޕްމަންޓް ޑިޕަރޓްމަންޓުގެ ޑިރެކްޓަރ ޖެނެރަލް ތަލްއަތް ވިދާޅުވީ ތަންތަން އިންސްޕެކްޓް ކުރުމުގެ މަސައްކަތް ފެށުމާއިއެކު ސައިޓުތަކުން ހެޔޮ ބަދަލުތައް ފެންނަމުން އަންނަކަމަށެވެ. އޭނާ ވިދާޅުވީ ސައިޓުތަކުން އެންމެ ގިނައިން ފާހަގަވާ މައްސަލައަކީ މަސައްކަތް ކުރާ މީހުންގެ ސޭފްޓީ ވަސީލަތްތައް ބޭނުން ނުކުރުންކަމަށެވެ. އަދި މިކަންކަމަށްވެސް ސައިޓުގައި މަސައްކަތް ކުރާ މީހުން މިހާރު އަހުލުވެރިވަމުންމުން އަންނަ ކަމަށް އޭނާ ވިދާޅުވިއެވެ.

ޕްލޭނިންގ މިނސިްޓްރީއިން ގެންދަނީ މާލެއާއި އެއްގޮތަށް އެކި ރަށްރަށުގެ ކައުންސިލްތަކާއި، ލޯކަލް ގަވަމަންޓް އޮތޯރިޓީ، އެލްޖީއޭއާއި ގުޅިގެން ރަށްތަކުގައި ހުރި މިފަދަ ބާވެފައި ހުރި އިމާރާތަކާއި، ކޮންސްޓްރަކްޝަން ސައިޓްތައް އިންސްޕެކްޓް ކުރުމުގެ މަސައްކަތް ކުރަމުންނެވެ.

ޕްލޭނިންގ މިނިސްޓްރިއިންދަނީ ސަރުކާރުގެ ގިނަ އޮފީސްތައް ހިންގާ މާލޭ ހުރަވީ ބިލްޑިންގްވެސް ބާވެ ހަލާވަމުންދާތީ، އެ އިމާރާތުގައި ހިމެނޭ އޮފީސްތައްވެސް އެެހެން ތަންތަނަށް ބަދަލު ކުރުމުގެ މަސައްކަތް ކުރަމުންނެވެ. ކޮންސްޓަރަކްޝަން ޤަވާއިދުތަކަށް ޢަމަލު ނުކުރުމާއި، ބާ އިމާރާތްތަކުގެ ބައިތައް ވެއްޓުމުގެ ޙާދިސާތަކުގައި މީހުންގެ ފުރާނައަށާއި މުދަލައްވެސް ގެއްލުން ވެފައިވެއެވެ.