ހިޔާ މަޝްރޫޢުގެދަށުން ޢިމާރާތްކުރާ އޮފީސް ޓަވަރުގެ މަސައްކަތް އެންމެ ފުރަތަމަ ނިންމައި، މުވައްޒަފުންނަށް އުޅެވޭނެ މަގު ފަހިކޮށްދޭ ކުންފުންޏަކީ ސްޓެލްކޯކަމަށް ހައްދަވާނެކަމަށް ސްޓެލްކޯގެ މެނޭޖިންގ ޑިރެކްޓަރ ހަސަން މުޣުނީ ވިދާޅުވެއްޖެއެވެ. މުޢުނީ މިހެން ވިދާޅުވީ ސްޓެލްކޯގެ "ސްޓާފް ނައިޓް 2019"ގައި ވާހަކަދައްކަމުންނެވެ.
ސްޓެލްކޯގެ ސްޓާފް ނައިޓްގައި އެކުންފުނީގެ މުވައްޒަފުންނާ މުޚާޠަބުކުރައްވައި ވާހަކަފުޅުދައްކަވަމުން ކުންފުނީގެ މެނޭޖިންގ ޑިރެކްޓަރ ޙަސަން މުޣުނީ ވިދާޅުވީ ކުންފުނީގެ އެންމެ މުހިންމު ރައުސުލްމާލަކީ މުވައްޒަފުންކަމުގައިވާއިރު، ވަޒީފާގެ މާޙައުލަކީ މުވައްޒަފުންނަށް ފަހި، ފަސޭހަ މާޙައުލަކަށް ހެއްދެވުމަށް މަސައްކަތްޕުޅު ކުރައްވާކަމަށެވެ. އެގޮތުން މުވައްޒަފުން ކުންފުންޏަށް ދޭ ޚިދުމަތްތައް ބަލައި، މިދިޔަ އަށް މަސް ދުވަހުގެ ތެރޭގައި 116 މުވައްޒަފަކަށް މަޤާމުގެ ކުރިއެރުން ދީފައިވާކަމަށް މުޣުނީ ވިދާޅުވިއެވެ.
މުޣުނީ ވިދާޅުވީ މުވައްޒަފުންނަށްޓަކައި ކުންފުނިން މުހިންމު ކަންތައްތަކެއް ރާވާފައިވާކަމަށެވެ. އެގޮތުން ސްޓާފް ވެލްނެސް ސެންޓަރު ހުޅުވުމާއި ހެލްތް ކެއަރ އިންޝުއަރެންސް އިތުރަށް ހަރުދަނާކޮށް ޢާއިލާގެ މީހުން ބައިވެރިކުރެވޭގޮތް ހެދުމާއި ޢާއިލާގެ މީހެއް ނިޔާވެއްޖެނަމަ 3 ދުވަހުގެ ޗުއްޓީއެއް ދިނުމާއި، އުމްރާއަށް ދިއުމަށްޓަކައި 15 ދުވުގެ ޗުއްޓީ ދިނުން ހިމެނެއެވެ. އޭނާ ވިދާޅުވީ މުވައްޒަފުންނަށް ބޯހިޔާވަހިކަން ފޯރުކޮށް ދިނުމަށް ހިންގާ މަޝްރޫޢަކީވެސް ކުންފުނިން އިސްކަންދޭ މުހިންމު ކަމެއްކަމަށެވެ.
"ފްލެޓް ވިއްކުމަށް ވަރަށް އަވަހަށް ހުޅުވާލާނަން. ފްލެޓްގެ މަސައްކަތް ނިންމައި މުއައްޒަފުންނަށް ދިރިއުޅެވޭ ފުރަތަމަ ކުންފުންޏަކަށް ސްޓެލްކޯ ހަދާނަން." މެނޭޖިންގ ޑިރެކްޓަރ މުޢްނީ ވިދާޅުވިއެވެ.
މީގެއިތުރުން މުވައްޒަފުންގެ ކުރިއެރުމަށް ކިޔެވުމުގެ ފުރުސަތާއި، ތާމްރީނުގެ ފުރުސަތުތައް އިތުރުކޮށްދެއްވާނެކަމަށްވެސް މުޣުނީ ވިދާޅުވިއެވެ. "ސްޓާފް ނައިޓް 2019"ގައިވަނީ ކުންފުނިން ފާހަގަކޮށްލެވޭ މުވައްޒަފުންނަށް ހަނދާނީ ލިޔުން ދީފައެވެ. މީގެތެރޭގައި ކުންފުންޏަށް 30އަހަރަށްވުރެ ގިނަ ދުވަހު ޚިދުމަތްކޮށްދީފައިވާ 5 ފަރާތާއި، 20 އަހަރަށްވުރެ ގިނަ އަހަރު ޚިދުމަތްކޮށްދެއްވި 14 ފަރާތާއި، ކުންފުނީގެ އިސް މުވައްޒަފުންގެތެރެއިން، ހިންގުމުގެ ދާއިރާއިން 2 ފަރާތަކަށްވަނީ އަގުވަޒަންކޮށް ލިޔުމާއި ހަނދާނީ ލިޔުން ދެއްވާފައެވެ.
އަދި ސްޓެލްކޯގެ އަތޮޅުތަކުގެ އިންޖީނުގެތަކުގެ ތެރެއިން އެންމެ ޚިދުމަތްތެރި 4 މުވައްޒަފުންނާއި ޑިޕާޓްމަންޓްތަކުން ހޮވާލެވުނު އެންމެ ޚިދުމަތްތެރި 59 މުވައްޒަފަކަށްވަނީ ހަނދާނީ ލިޔުންމާއި ހަނދާނީ ފިލާ ދީފައެވެ. އަދި 65އަގަރު ވުމުގެ ސަބަބުން މަސައްކަތުން ރިޓަޔަރވި ފަރާތްތަކުގެ އަގު ވަޒަންކޮށްފައިވެއެވެ.
މީގެއިތުރުން ކުންފުންޏަށް އެކި ގޮތްގޮތުން ރީތި ނަން ހޯދައިދިން 2 މުވައްޒަފެއްގެ އަގުވަނީ ވަޒަންކޮށްފައެވެ. މި ހަފްލާގައިވަނީ ކުންފުނީގެ މަތީ ތަޢުލީމުގެ ފުރުސަތު ލިބުނު 5 މުއައްޒަފުންނާއި ލިޔުން ހަވާލުކޮށްފައެވެ.