މެލޭޝިއާގައި މިހާރު ކުރިއަށްދާ "މާޓާ ފެއަރ"ގައި ރާއްޖޭގެ ސްޓޭންޑު ކައިރީގައި އަލިފާނުގެ ޙާދިސާއެއް ހިނގައިފިއެވެ.
މަޢުލޫމާތު ލިބިފައިވާ ގޮތުގައި އަލިފާނުގެ ޙާދިސާ ހިނގާފައިވަނީ ރާއްޖޭގެ ސްޓޭންޑްގެ ފުރަގަހުގައި ހުރި ބަދިގެއެއްގައެވެ. މެލޭޝިއާ ގަޑިން މެންދުރުފަހު 1:40 ހާއިރު ހިނގި މި ހާދިސާގައި އެއްވެސް މީހަކަށް އަދި ރާއްޖޭގެ ސްޓޭންޑަށްވެސް ގެއްލުމެއް ލިބިފައިނުވާކަމަށް އެމްއެމްޕީއާރުސީން މައުލޫމާތުދެއެވެ.
އެމްއެމްޕީއާރުސީގެ ފަރާތުން ފެއަރގައި އިސްކޮށް ހަރަކާތްތެރިވާ މުސްތަޤީމާ އިޤްބާލް ޕީއެސްއެމްއާއި ވާހަކަދައްކަމުން ވިދާޅުވީ، އަލިފާނުގެ ޙާދިސާ ހިނގުމާއެކު ފެއަރގެ ރާއްޖޭގެ ސްޓޭންޑު ހިމެނޭ ހޯލުން މީހުން ހުސްކޮށްފައިވާ ކަމަށެވެ. އަދި އަލިފާންގަނޑު މިހާރު ކޮންޓްރޯލް ކުރެވިފައިވީނަމަވެސް އެ ހޯލު އަދިވެސް ހުރީ އާއްމުންނަށް ބަންދުކޮށްފައެވެ. މިދިޔަ ހުކުރު ދުވަހު ފެށި މާޓާ ފެއަރއަކީ މެލޭޝިއާގެ އެންމެ މަޤްބޫލް ކޮންސިއުމަރ ފެއަރއެވެ. މިއަދަކީ ފެއަރގެ އެންމެ ފަހު ދުވަހެވެ.
އެމް.އެމް.ޕީ.އާރު.ސީ އާއިއެކު ރާއްޖޭގެ ފަތުރުވެރިކަމުގެ ސިނާޢަތުގައި ހަރަކާތްތެރިވާ 9 ކުންފުންޏަކުން މި ފެއަރގައި ވަނީ ބައިވެރިވެފައެވެ.
މިފެއަރގައި ރާއްޖޭގެ ޤުދުރަތީ ރީތި މަންޒަރުތައް ދައްކުވައިދޭ ގޮތަށް 54 އަކަމީޓަރުގެ ސްޓޭންޑެއްގައި ރާއްޖެ ތަމްސީލްކޮށްފައިވަނީ ފަތްމިނި ބޮޑުބެރު ގްރޫޕްގެ ދިވެހި ސަޤާފީ ބޮޑުބެރު ލަވަތަކާއި އެކުގައެވެ.
މި ފެއަރގައި ރާއްޖޭގެ ސްޓޭންޑަށް ބޮޑު ތަރުޙީބެއް ލިބެމުން ދިޔަކަން ފާހަގަކޮށްލެވެއެވެ.