މެލޭޝިއާގެ އެންމެ މަޤްބޫލް ކޮންސިއުމަރ ފެއަރ ކަމަށްވާ "މާޓް ފެއަރ"ގައި ރާއްޖެ އިސްތިހާރުކުރުމަށްޓަކައި އެމް.އެމް.ޕީ.އާރް.ސީއާއެކު ޓުއަރިޒަމް އިންޑަސްޓްރީގައި ހަރަކާތްތެރިވާ ފަރާތްތަކުން ބައިވެރިވެއްޖެއެވެ.
މާޓާ ފެއަރ ކުރިއަށްދާނީ މެލޭޝިޔާގެ ކުއާލަލަމްޕޫރްގައި ސެޕްޓެމްބަރުމަހުގެ ހަޔަކުން ފެށިގެން ނުވައެއްގެ ނިޔަލަށެވެ. އެމް.އެމް.ޕީ.އާރު.ސީ އާއިއެކު ދިވެހިރާއްޖޭގެ ފަތުރުވެރި ކަމުގެ ސިނާޢަތުގައި ހަރަކާތްތެރިވާ 9 ކުންފުންޏަކުން މި ފެއަރގައި ވަނީ ބައިވެރިވެފައެވެ.
މިފެއަރގައި ރާއްޖޭގެ ޤުދުރަތީ ރީތި މަންޒަރުތައް ދައްކުވައިދޭ ގޮތަށް 54 އަކަމީޓަރުގެ ސްޓޭންޑެއްގައި ރާއްޖެ ތަމްސީލްކުރެވިގެންދާނީ ފަތްމިނި ބޮޑުބެރު ގްރޫޕްގެ ދިވެހި ސަޤާފީ ބޮޑުބެރު ލަވަތަކާއި އެކުގައެވެ. މީގެ އިތުރުން ދިވެހި ރަހަތައް ތަޖްރިބާ ކޮށްލުމުގެ އިންތިޒާމް ސްޓޭންޑްގައި ހަމަޖެހިފައި ހުންނާނެއެވެ.
މާޓާ ފެއަރއަށް ޒިޔާރާތްކުރާ ފަރާތްތަކަށް ރާއްޖޭގެ ކަނޑުއަޑީގެ ރީތި މަންޒަރުތަށް ވަރޗުއަލް ރިއަލިޓީ މެދުވެރިކޮށް ދައްކާލުމަށް ހަމަޖެހިފައިވާކަމަށްވެސް އެމްއެމްޕީއާރުސީން މައުލޫމާތުދެއެވެ.
މާޓާ ފެއަރގައި މެލޭޝިއާގެ ފަތުރުވެރިކަމުގެ ދާއިރާއާއި ގުޅުންހުރި ފަރާތްތަކާއި ބައްދަލުކޮށް މި މާރކެޓުގައި ރާއްޖެ އިތުރަށް އިސްތިހާރުކުރުމަށް މަޝްވަރާ ކުރެވިގެންދާނެއެވެ. މީގެ އިތުރުން ސްޓޭންޑަށް ޒިޔާރާތްކުރާ ފަރާތްތަކަށް ރާއްޖޭގެ ފަތުރުވެރިކަމާއި، ސަޤާފަތާއި ބެހޭގޮތުން ގިނަ މަޢުލޫމާތުތަކެއް ޙިއްސާކުރެވިގެން ދާނެކަމަށްވެސް އެމްއެމްޕީއާރުސީން ބުނެއެވެ.
މިއަހަރުގެ ޖެނުއަރީމަހުން ޖުލައިމަހުގެ ނިޔަލަށް މެލޭޝިޔާއިން ރާއްޖެއަށް ޒިޔާރަތް ކުރި ފަތުރުވެރިންގެ އަދަދުވަނީ 13 ހާހަށް އަރާފައެވެ.
މެލޭޝިޔާ ހިމެނޭ އާސިއާން ސަރަޙައްދަކީ ރާއްޖެއަށް ގިނަ ފްލައިޓް ތަކެއް އަންނަ ސަރަހައްދެކެވެ. އެހެންކަމުން ރާއްޖޭގެ ފަތުރުވެރިކަން މިސަރަޙައްދަށް އިޝްތިހާރުކޮށް ފަތުރުވެރިން އަންނަ ނިސްބަތް އިތުރު ކުރުމަށް ވަރަށް ގިނަ މަސައްކަތް ތަކެއް ދަނީ ކުރެވެމުންނެވެ.