ނޫސްވެރިޔާ އަހުމަދު ރިޟްވާން އަބްދުﷲ ގެއްލުވާލި މައްސަލައިގެ ތަހުގީގަށް ހުރަސް އެޅުމަށް މަސައްކަތް ކުރި ފުލުހުންގެ އިންޓެލިޖެންސްގެ ދެ ފުލުހުން ހައްޔަރުކުރުމުގެ އަމުރެއް ހޯދުމަށް ބަންޑާރަނައިބް އިބްރާހިމް ރިއްފަތު ފުލުހުންގެ ކިބައިން އެދިވަޑައިގެންފިއެވެ.
ބަންޑާރަ ނައިބް އެގޮތަށް އަންގަވާފައި ވަނީ ރިޟްވާންގެ މަރުގެ މައްސަލާގައި ފިޔަވަޅު އަޅަން ޖެހޭ ފަރާތްތަކާ މެދު އަވަސް ފިޔަވަޅު އެޅުމަށް އެދި ބަންޑާރަ ނައިބްގެ އޮފީހުން ފުލުހުންނަށް މިއަދު ފޮނުއްވެވި ސިޓީފުޅެއްގައެވެ.
ބަނޑާރަ ނައިބުގެ ސިޓީފުޅުގައި ތިން ކަމަކަށް ފުލުހުންގެ ކިބައިން އެދިވަޑައިގެންފައިވެއެވެ. އެގޮތުން ގޭންގުތަކުގެ ބަޔަކު ބޭނުންކޮށްގެން ދެމީހަކު ކަނޑު ފައްތަން އުޅޭކަމުގެ މަޢުލޫމާތު 2014 ވަނަ އަހަރުގެ ޖޫން މަހުގެ 24 ވަނަ ދުވަހު ފުލުހުންގެ އިންޓެލިޖެންސަށް އޭ-ގްރޭޑް ސޯސްއަކުން މައުލޫމާތު ލިބިފައިވާ ކަމަށް ރިޔާސީ ކޮމިޝަންގެ ރިޕޯޓުގައި ބުނެފައިވާއިރު، އެ މަޢުލޫމާތާ ގުޅިގެން އެއްވެސް ފިޔަވަޅެއް އަޅާފައިނުވަނީ ކީއްވެގެންކަން ބައްލަވައި ތަޙުޤީޤު ކުރެއްވުމަށް ފުލުހުންގެ ކިބައިން އެދިވަޑައިގެންފައެވެ. އަދި އެކަމުގައި ޝާމިލުވާ އެންމެހައި ފަރާތްތައް ވަޒީފާގެ މަސައްކަތްތަކުން އެކަހެރިކުރުމަށްވެސް ބަނޑާރަ ނައިބް ވަނީ ފުލުހުންނަށް ދަންނަވާފައެވެ.
މީގެ އިތުރުން މި މައްސަލާގައި ހިމެނޭ ދެ ފުލުހުން މުޖުތަމަޢުއަށް ދޫވެފައި ތިބުމަކީ، މި މައްސަލައިގެ މިނިވަން ތަޙުޤީޤެއް ކުރިއަށް ގެންދިއުމަށް ހުރަސް އެޅިދާނެ ކަމެއް ކަމަށް ޤަބޫލުކުރެވޭތީ އެ ދެ ފުލުހުން ހައްޔަރުކުރުމުގެ އަމުރަކަށް ކްރިމިނަލް ކޯޓުގައި އެދުމަށްވެސް ބަންޑާރަ ނައިބު ވަނީ ފުލުހުންގެ ކިބައިން އެދިފައެވެ.
ހައްޔަރުކުރުމަށް ބަންޑާރަ ނައިބް އެދިފައިވަނީ ރިޟްވާންގެ މަރުގެ މައްސަލައިގެ ތަހުގީގަށްފަހު މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތައް ތަޙުޤީޤުކުރާ ކޮމިޝަނުން ތައްޔާރުކުރި ރިޕޯޓުގައި، އެ މައްސަލައިގެ ތަޙްޤީޤަށް ހުރަސް އެޅިކަމަށް ބަޔާންކޮށްފައިވާ، ފުލުހުންގެ އިންޓެލިޖެންސްގެ ދެ އޮފިސަރުން ކަމަށްވާ، ކޯޕްރަލް މުޙައްމަދު ޖިނާޙާއި، ކޯޕްރަލް އިބްރާހީމް ރިފްޢަތުއެވެ.
ބަނޑާރަ ނައިބު ފުލުހުންނަށް މި މައްސަލައިގައި ފިޔަވަޅު އެޅުމަށް އެންގެވީ ޤާނޫނުއަސާސީގެ 133 ވަނަ މާއްދާގެ (ބ)ގެ ދަށުންނެވެ. އެ މައްދާއަކީ ޤާނޫނުގެ ވެރިކަން ނަގަހައްޓައި، ޙިމާޔަތްކޮށް ކުރިއެރުވުމާއި ރައްޔިތުންގެ ސަލާމަތާއި ރައްޔިތުންގެ މަންފާއާއި، ޢާންމު މިނިވަންކަން ދިފާޢުކުރުމަށް ބަންޑާރަނައިބު މަސައްކަތްކުރަންވާނެ ކަމަށް ބުނާ މާއްދާއެވެ.