ހުޅުމާލޭ ފިޔަވަތީގައި ދައުލަތުން ބަލަހައްޓަމުންދާ ކުދިންނަށް، ޕީއެސްއެމްގެ މޯލްޑިވްސް މީޑިއާ އިންސްޓިޓިއުޓު، އެމްއެމްއައިއިން ހެދުންތަކެއް ހަދިޔާކޮށްފިއެވެ.
މި ހެދުންތަކަކީ އެމްއެމްއައި އާއި މެލޭޝިޔާގެ ލިމްކޮކްވިންގް ގުޅިގެން ކުރިއަށްގެންދިޔަ "ލޭޑީސް ޑްރެސް މޭކިން" ކޯހުގެ ބައިވެރިން ފަހާފައިވާ ހެދުންތަކެވެ.
މި ތަކެތި ހާވާލުކުރުމަށް ފިޔަވަތީގައި ބޭއްވި ރަސްމިއްޔާތުގައި ޕީއެސްއެމްގެ ފަރާތުން މިތަކެތި ހަވާލުކޮށްދެއްވީ މެނޭޖިން ޑިރެކްޓަރ އަލީ ޚާލިދެވެ. އަދި ފިޔަވަތީގެ ފަރާތުން ތަކެއްޗާ ހަވާލުވީ ޑިރެކްޓަރ ޢަބްދުލް ޙަލީމް ޢަބްދުލް ޢަފޫރުއެވެ. ފިޔަވައްޗަށް މިއަދު ހަވާލުކުރި ހެދުންތަކުގެ ތެރޭގައި ޤައުމީ ހެދުމާއި ހަވީރީ ހެދުމުގެ އިތުރުން އެކިކަހަލަ މުނާސަބަތުތަކުގައި ލެވޭނެ ހެދުންތައް ހިމެނެއެވެ. ގާތްގަނޑަކަށް 200 ހެދުން ހަދިޔާކޮށްފައިވާއިރު އޭގެ ތެރޭގައި ތުއްތުކުދިންނަށް ލެވޭނެ ހެދުންތަކާއި އުމުރުން 11 އާއި 12 އަހަރާ ދެމެދުގެ އަންހެންކުދިންނަށް ލެވޭނެ ހެދުންތައް ހިމެނެއެވެ.
އެމް.އެމް.އައިގެ ޑިރެކްޓަރ މުޙައްމަދު ޖިނާޙް ވިދާޅުވީ ފިޔަވައްޗަށް ހަދިޔާކުރި ތަކެއްޗަކީ ޕީއެސްއެމްއިން ތަކެތި ދީގެން ފަހަން ދަސްކޮށްދޭ ކޯހުގައި ތައްޔާރުކޮށްފައިވާ ތަކެތިކަމަށެވެ. އަދި އެއީ ކޯހުގައި ކުރިއަށްގެންދިޔަ 6 މޮޑިއުލްގައި ބައިވެރިން ތައްޔާރުކޮށްފައިވާ ހެދުންތަކެއްކަމަށްވެސް ޖިނާޙް ވިދާޅުވިއެވެ. އަދި އެ ކޯހުގެ ދެވަނަ ބުރުގައި އުފައްދާ ތަކެތިވެސް މިފަދަ ތަންތަނަށް ހަދިޔާކުރުމުގެ ވިސްނުން ގެންގުޅުއްވާކަމަށް އޭނާ ވިދާޅުވިއެވެ. މީގެ އިތުރުން ފިޔަވަތިން ހިންގާ އެކި ޕްރޮގްރާމްތަކުގައި ބައިވެރިވުމުގެ ފުރުޞަތު ފިޔަވަތީގައި ތިބޭ ކުދިންނަށް ދޭން ނިންމާފައިވާކަމަށްވެސް ޖިނާހު ވިދާޅުވިއެވެ.
ފިޔަވަތީގެ ޑިރެކްޓަރ ޢަބްދުލް ހަލީމް އަބްދުލް ޣަފޫރު ވަނީ ފަޔަވަތީގައި އުޅެމުންދާ ދަރިވަރުންނަށް ތަކެތި ހަދިހާކުރުމުން އެކަމަށްޓަކައި ޝުކުރުއަދާކުރައްވާފައެވެ. އަދި ހަދިޔާ ކުރި ހެދުންތައް ބޭނުންކުރުމަށް ހަމަޖެހިފައިވަނީ ސްކޫލްގެ އެކި ހަރަކާތްތަކާއި އަދި މިނޫނަސް ބައްވާ ތަފާތު ހަރަކާތްތަކުގައި ކަމަށް އޭނާ ވިދާޅުއެވެ. މީގެ އިތުރުން ކުރިއަށް އޮތްތަނުގައި ޕީއެސްއެމްއާ ގުޅިގެން ކުދިންނަށް ފައިދާވާނެ ކަންކަން ކުރެވޭނެކަމަށް އުއްމީދުކުރާކަމަށްވެސް އޭނާ ވިދާޅުވިއެވެ.
ފިޔަވަތީގައި 13 އަހަރުން ދަށުގެ 109 ކުދިން ބަލަހައްޓަމުންދެއެވެ. އެކުދިން ތަޢުލީމް ޙާސިލްކުރަމުންދަނީ ހުޅުމާލޭގައި ހުންނަ ޤާޒީ ސްކޫލާއި ހުރަވީ ސްކޫލްގައެވެ.