ވޭތުވެދިޔަ ހަތް އަހަރުދުވަހުގެ ތެރޭގައި ދުއިސައްތަ ފަސްދޮޅަސް ފަސް މީހުން ގެއްލިގެން ރިޕޯޓްކޮށްފައިވަކާމަށް ފުލުހުން ހާމަކުރައްވައިފިއެވެ.
ފުލުހުން ވިދާޅުވީ 2012ވަނަ އަހަރުން ފެށިގެން މިއަހަރުގެ ޖޫން މަހުގެ 22ވަނަ ދުވަހާހަމަޔަށް
އެކި ގޮތްގޮތުން ގެއްލިގެން ނުވަތަ ވީތަނެއް ނޭނގިގެން ދިވެހިންނާއި ބިދޭސީން ހިމެނޭގޮތަށް ދުއިސައްތަ ފަސްދޮޅަސް ފަސް މީހެއްގެ މައްސަލަ ފުލުހުންގެ މުއައްސަސާއަށް ހުށަހަޅާފައިވާކަމަށެވެ.
މިގޮތުން ގެއްލިގެން ރިޕޯޓުކުރި ސަތޭކަ ސަތާރަ މީހުން ގެއިން ނިކުމެގެން ރައްޓެހިންނާއެކު ކޮންމެވެސް ތަނެއްގައި ނުވަތަ ރަށެއްގައި އުޅެނިކޮށް ފެނިގެން ޢާއިލާތަކާ ހަވާލުކޮށްފައިވާކަމަށް ފުލުހުން ވިދާޅުވެއެވެ. އަދި ސަތޭކަ ސާޅީސް ތިން މީހުންނަކީ ކަނޑުމަތީގެ އެކި ހާދިސާތަކުގައި ގެއްލި މިހާތަނަށް ޚަބަރެއް ވެފައިނުވާމީހުންކަމަށް ފުލުހުން ވިދާޅުވެއެވެ.
މީގެއިތުރުން ފަޅުރަށެއްގައި އުޅެނިކޮށް ގެއްލިފައިވާ މީހަކާއި ސްނޯކްލިންއަށްގޮސް އުޅެނިކޮށް ގެއްލިފައިވާ މީހެއްވެސް ހިމެނޭކަމަށް ފުލުހުން މަޢުލޫމާތުދެއްވައެވެ. އަދި ރާއްޖެއިންބޭރުގައި އުޅެނިކޮށް ވީނުވީއެއް ނޭގިގެން 2 މީހުން ގެއްލިފައިވާކަމަށް ހުށަހަޅާފައިވާކަމަށް ފުލުހުން ވިދާޅުވެއެވެ.
ފުލުހުން ވިދާޅުވީ ވީނުވީއެއްނޭނގި ގެއްލިފައިވާކަމަށް ހުށަހަޅައި، އަދި މިހާތަނަށް ފެނިފައިނުވާ މީހެއްގެ މައްސަލަ ޝަރީޢަތުގެ މަރުހަލާގައި މިވަގުތު ހިނގަމުންދާކަމަށެވެ.