ކަސްޓަމްސްގެ ތަސައްވުރާއި އަމާޒަށް ވާޞިލްވުމަށްޓަކައި ކަސްޓަމްސްގެ ކުރިއަށް އޮތް ފަސްއަހަރުދުވަހުގެ ސްޓްރެޓީޖިކް ޕްލޭން އިފްތިތާހްކޮށްފިއެވެ.
މި ޕްލޭންއަކީ 2020 ވަނަ އަހަރުން 2024 ވަނަ އަހަރަށް ކަސްޓަމްސްއިން ކުރަންބޭނުންވާ ކަންތައްތަކާއި ހާސިލްކުރަން ބޭނުންވާ ލަނޑުދަނޑިތައް ކަނޑައަޅާ މަގުދައްކާނެ ޕްލޭނެކެވެ.
ކަސްޓަމްސްގެ ސްޓްރެޓީޖިކް ޕެލޭން އިފްތިތާޙްކޮށްފައިވަނީ މޯލްޑިވްސް ކަސްޓަމްސް ސަރވިސްއަށް 129 އަހަރު ފުރުމުގެ މުނާސަބަތުގައި ބޭއްވި ރަސްމިއްޔާތުގައި ޑިފެންސް މިނިސްޓަރ އަލްއުސްތާޛާ މާރިޔާ އަޙްމަދު ދީދީއެވެ. މި ޕްލޭންގައި ވަނީ 28 ސްޓްރެޓެޖީ އާއި ހާސިލްކުރަންބޭނުންވާ 117 ކަމެއް ހިމަނާފައެވެ.
މި ޕްލޭން ތައްޔާރުކޮށްފައިވަނީ މައިގަނޑު 5 ދާއިރާއަކަށް އިސްކަންދީގެންނެވެ. އޭގެތެރޭގައި ހިމެނެނީ އިންސާނީ ވަޞީލަތް ތަރައްޤީކުރުމާއި ކަސްޓަމްސްގެ ހިންގުން ހަރުދަނާ ކުރުމާއި ފެސިލިޓޭޝަން އެން ރިސްކް މެނޭޖްމަންޓްއާއި ބޯޑަރ ސެކިއުރިޓީ އެންޑް އެންފޯސްމަންޓްގެ އިތުރުން ކަސްޓަމްސްއާ ގުޅުންހުރި އެކި އިދާރާތަކާއެކު ގުޅުންބަދަހި ކުރުމާ ގުޅޭގޮތުންނެވެ.
މި ރަސްމިއްޔާތުގައި މޯލްޑިވްސް ކަސްޓަމްސް ސަރވިސްގެ ތަޞައްވުރު ހުށައަޅާދެއްވަމުން ކޮމިޝަނަރ ޖެނެރަލް އޮފް ކަސްޓަމްސް އަޙްމަދު ނުޢުމާން ވިދާޅުވީ ކަސްޓަމްސްއިން ވޭތުވެދިޔަ އަހަރުތަކުގައި ކާމިޔާބު ގިނަ މަސައްކަތްތަކެއް ކޮށްފައިވާކަމަށެވެ. މިގޮތުން ވޭތުވެދިޔަ 10 އަހަރަށް އަޅާބަލާއިރު ފަސިންޖަރުން ސްކީންކުރުމުގެ ނިސްބަތް ފަސް ގުނަ އިތުރުވެފައިވާކަން އޭނާ ފާހަގަކުރެއްވިއެވެ.
ރާއްޖޭގެ އިޤްތިޞާދީ ދުވެލި އިތުރުވަމުންދާއިރު ބޯޑަރު ހުރަސްކޮށް ހިންގާ ކުށްތައް އިތުރުވަމުންދާކަން ފާހަގަކުރައްވާ ނުޢުމާން ވަނީ، ކުށްވެރިން ކުށްކުރުމަށް ގެންގުޅޭ އުކުޅުތައްވެސް ބަދަލުވަމުންދާކަން ފާހަގަކުރައްވާފައެވެ. ނުއުމާން ވިދާޅުވީ މިއަހަރުވެސް ކަސްޓަމްގެ އިންސާނީ ވަޞީލަތްތައް ތަރައްޤީކޮށް މުވައްޒަފުންނަށް އެކި ތަމްރީންތައް ދިނުމަށް ހަމަޖެހިފައިވާކަމަށެވެ. އަދި މިއަހަރުގެ ފުރަތަމަ ތިން މަސްދުވަހު އެ މުއައްސަސާއި ހާސިލްކުރަންބޭނުންވާ ލަނޑުދަނޑިތައް ކަނޑައަޅާ އެކަމުގެ ނުވަދިހަ އިންސައްތަ ހާސިލްކޮށްފައިވާކަންވެސް އެނާ ފާހަގަކުރެއްވިއެވެ.
"ޓެރަރިޒަމްއާއި ހިއުމަން ޓްރެފިކިން އަދި މަނީ ލޯންޑަރިންފަދަ، ކުރިން އުފަން ނުވާ މައްސަލަތައް އިތުރުވެ އެކަންކަން ހައްލުކުރުމުގެ ޒިންމާ އަޅުގަނޑުމެންގެ ކޮނޑުގައި އެޅިފައިވާއިރު މިކަމަށް ކުރިމަތިލުމަށް ހުރި ވަޞީލަތްތަކާއި ފުރުޞަތުތައް އިތުރުނުވާކަމީ ގޮންޖެހުމެއް. ނަމަވެސް ލިބިފައިވާ ވަޞީލަތްތައް ބޭނުންކޮށްގެން އެތެރެއާ ބޭރުގެ އެހީގައި ކުރެވޭ މަސައްކަތްތައް އެ ގޮންޖެހުމަށް ކުރިމަތިލާ ކާމިޔާބު ހޯދަމުން މިދަނީ." ނުއުމާން ވިދާޅުވިއެވެ.
މި ރަސްމިއްޔާތުގައި ވަނީ ކަސްޓަމްސްއަށް 20 އަހަރުވަންދެން ޚިދުމަތްކޮށްފައިވާ 47 ފަރާތަކަށް އެކަމުގެ އަގުވަޒަންކޮށް ހަނދާނީ ފިލާ ދީފައެވެ. މީގެ އިތުރުން ޑަބްލިޔު.ސީ.އޯ ސެޓްފިކެޓް ހަވާލުކޮށް ކަސްޓަމްސްގެ 130 ވަނަ އަހަރީ ލޯގޯ އިފްތިތާޙްކޮށްފައެވެ. ލޯގޯ އިފްތިތާހް ކޮށްދެއްވީ ރަސްމިއްޔާތުގެ ޝަރަފުވެރި މެހުމާން ނައިބް ރައީސް ފައިޞަލް ނަޞީމްއެވެ.