ތިން ރަށެއްގެ ބަނދަރު ހެދުމުގެ މަސައްކަތާއި ދެރަށެއްގެ ބިން ހިއްކުމަށް އެމްޓީސީސީއާއި ހަވާލުކޮށްފިއެވެ.
މި މަސައްކަތް ހަވާލުކުރުމަށް ބޭއްވި ރަސްމިއްޔާތުގައި ޕްލޭނިންގ މިނިސްޓްރީން ސޮއިކުރެއްވީ ޑިރެކްޓަރ ޖެނެރަލް ފާތިމަތު ޝާނާ ފާރޫޤުއެވެ. އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ ސީއީއޯ ޙަސަން ޝާހުއެވެ.
އެމްޓީސީސީއާ ހަވާލުކޮށްފައިވާ ބަނދަރު ހެދުމުގެ މަޝްރޫޢުތަކުގެ ތެރެއިން މ.ވޭވަށުގެ ބަދަރު އަޕްގްރޭޑްކުރުމުގެ މަސައްކަތް 16 މަސްދުވަހުގެ ތެރޭގައި ނިންމަންޖެހެއެވެ. މިބަނދަރަކީ 800 ފޫޓް ދިގު އަދި 300 ފޫޓް ފުޅާ ބަދަރެކެވެ. މިބަނދަރާއެކު 350 މީޓަރު ބޭރުތޮއްޓަކާއި، 380 މީޓަރުގެ އެއްގަމު ތޮއްޓެއް ލުމަށްވެސް ވަނީ ހަމަޖެހިފައެވެ. މީގެ އިތުރުން 1880 އަކަމީޓަރުގެ ޕޭވްމަންޓަކާއި، 130 މީޓަރަށް ރިވެޓްމަންޓްޖެހުމަށްވެސް ވަނީ ހަމަޖެހިފައެވެ. އަދި މި މަޝްރޫޢުގެ ދަށުން މިބަނދަރުގައި 2 ނެރުބައްތި ޖެހުމާއި 19 ބަނދަރުބައްތި ޖެހުމަށްވެސް ވަނީ ހަމަޖެހިފައެވެ. މިމަސައްކަތަށް 48 މިލިޔަނަށްވުރެ ގިނަ ރުފިޔާ ޙަރަދުވެއެވެ.
އެމްޓީސީސީއާ ހަވާލުކުރެވުނު މަޝްރޫޢުތަކުގެ ތެރެއިން ހދ.ނެއްލައިދޫ ބަދަރު އަޕްގްރޭޑްކޮށް 12 މަސްދުވަހުގެ ތެރޭގައި މަސައްކަތް ނިންމަންޖެހޭއިރު، ބަނދަރު ފުންކޮށް، ބޭރުތޮށީގައި ބޮޑުހިލަޖަހައި، އެއްގަމުތޮއްޓާއި، ނެރުބައްތި ހަރުކުރުމަށްވެސް ވަނީ ހަމަޖެހިފައެވެ. މިމަސައްކަތަށް 47 މިލިޔަނަށްވުރެ ގިނަ ރުފިޔާ ޚަރަދުވެއެވެ.
ރ.އަގޮޅިތީމްގެ ބަނދަރުގެ ސާރވޭ އެންޑް ޑިޒައިންގެ މަސައްކަތް 25 ދުވަހުގެ ތެރޭގައި ނިންމުމަށް ހަވާލުކޮށްފައިވާއިރު މިމަސައްކަތަށް 3 މިލިޔަންރުފިޔާ ޚަރަދުވެއެވެ.
ބިންހިއްކުމުގެ މަޝްރޫޢުތަކުގެ ތެރެއިން އެމްޓީސީއާއި ހަވާލުކޮށްފައިވަނީ ކ.ގުރައިދުއާއި، ކ.މާފުށީގެ ބިންހިއްކުމުގެ މަޝްރޫޢެވެ. ގުރައިދޫގައި 15 ހެކްޓަރުގެ ބިން ހިއްކައި، 1200 މީޓަރުގެ ރިވެޓްމަންޓް 7 މަސްދުވަހުގެ ތެރޭގައި ޖެހުމަށް ހަވާލުކޮށްފައިވާއިރު، މިކަމަށް 85 މިލިޔަނަށްވުރެ ގިނަ ރުފިޔާ ޙަރަދުވެއެވެ.
އަދި މާފުށީގެ ބިންހިއްކުމުގެ މަސައްކަތްވެސް 7 މަސްދުވަހުގެ ތެރޭގައި ނިންމުމަށް ހަވާލުކޮށްފައިވާއިރު ޖުމްލަ 99 މިލިޔަނަށްވުރެ ގިނަ ރުފިޔާ މާފުށީ ބިންހިއްކުމަށް ޙަރަދު ވާނެއެވެ. މި މަސައްކަތުގެ ދަށުން 25 ހެކްޓަރުގެ ބިން ހިއްކައި 1110 މީޓަރުގެ ރިވެޓްމަންޓް ގާއިމްކުރަންޖެހެއެވެ.