2020 ވަނަ އަހަރަށް ދައުލަތުން ލަފާކުރާ ބަޖެޓުގައި 83 މިލިޔަނަށްވުރެ ގިނަ ރުފިޔާ މިނިވަން މުވައްސަސާތަކަށް ކަޑައަޅައިފިއެވެ.
2020 ވަނަ އަހަރަށް ލަފާކުރާ ބަޖެޓް ހުށަހެޅުމުގެ ކުރިން ރައްޔިތުންގެ މަޖިލީހުގެ މިނިވަން މުވައްސާތަކާއި ބެހޭ ކޮމިޓީން އިސްނަގައިގެން ބޭއްވި ބައްދަލުވުމުގައި މުވައްސަސާތަކުން ވަނީ އަންނަ އަހަރަށް ކަނޑައަޅާފައިވާ ބަޖެޓްގެ ބައެއް ތަފްސީލުތައް ކޮމެޓީއާއި ހިއްސާކޮށްފައެވެ.
އަންނަ އަހަރުގެ ބަޖެޓާއި ގުޅޭގޮތުން ކޮމިޓީގައި ވާހަކަ ދައްކަވަމުން ފިނޭންސް މިނިސްޓަރ އިބްރާހިމް އަމީރު ވިދާޅުވީ ސަރުކާރުން ތަރައްޤީގެ މަޝްރޫޢުތަކާއެކީ އިންސާނީ ވަސީލަތާއި، އާންމު ހާލަތު ރަގަޅު ކުރުމަށް އަންނަ އަހަރުގެ ބަޖެޓްގައި މުހިއްމު މަޝްރޫއުތައް ހިމަނުއްވާނެކަމަށެވެ. މިގޮތުން ސިއްޙީ ދާއިރާއާއި، ތައުލީމާއި، ފެނާއި، ނަރުދަމާގެ ޙިދުމަތްތައް ތަރައްޤީކުރުމަށް ސަރުކާރުން ބޮޑު އިސްކަމެއް ދެއްވާނެކަމަށްވެސް މިނިސްޓަރ ވިދާޅުވިއެވެ.
ކޮމިޝަންތަކުގެ އެންމެ އިސްވެރިންގެ ބައިވެރިވުމާއެކު ކުރިއަށްދިޔަ މިބައްދަލުވުމުގައި އިލެކްޝަންސް ކޮމިޝަންގެ ރައީސް އަޙްމަދު ޝަރީފް ވިދާޅުވީ އަންނަ އަހަރަށް އެ ކޮމިޝަންގެ ބަޖެޓްގެ މިންވަރަކީ 32.8 މިލިޔަން ރުފިޔާގެ ސީލިން އެއްކަމަށެވެ.
ސިވިލް ސަރވިސް ކޮމިޝަންނަށް އަންނަ އަހަރަށް 26.5 މިލިޔަން ރުފިޔާގެ ސީލިން އެއް ކަނޑައަޅާފައިވާއިރު، ނޭޝަނަލް އިންޓަރ ގްރިޓީ ކޮމިޝަންގެ ބަޖެޓްގެ ސީލިން އަކީ 9.2 މިލިޔަން ރުފިޔާއެވެ.
މޯލްޑިވްސް މީޑިޔާ ކައުންސިލަށް 4.2 މިލިޔަން ރުފިޔާގެ ސީލިން އެއް ކަނޑައަޅާފައިވާއިރު ބްރޯޑްކާސްޓިން ކޮމިޝަންގެ ބަޖެޓްގެ ސީލިން އަކީ 9.4 މިލިޔަން ރުފިޔާއެވެ.
މި ބައްދަލުވުމުގައި ހުރިހާ ކޮމިޝަންތަކަކުންވެސް ވަނީ އެކޮމިޝަންތަކަށް ދިމާވެފައިވާ ދަތިތައް ފިނޭންސް މިނިސްޓަރާއި ކޮމިޓީގެ މެމްބަރުންނަށް ހިއްސާ ކުރައްވާފައެވެ.
ދައުލަތުގެ މިނިވަން މުވައްސަސާތަކާއި، ކޮމިޝަންތައް ހިންގުމުގައި އަބަދުވެސް އެންމެބޮޑަށް ދިމާވާ އެއް ގޮންޖެހުމަކީ ބަޖެޓްގެ ދަތިކަމެވެ. ބަޖެޓުގެ ދަތިކަމުގެ އިތުރަށް ގިނަ މުވައްސަސާތަކަށް ބޭނުންވާ މުވައްޒަފުންނާއި، އެކަށީގެންވާ އޮފީސް އިމާރާތް ނުލިބުމުގެ ކަންބޮޑުވުންތައްވެސް ކޮމިޝަންތަކުން ވަނީ ފާހަގަކޮށްފައެވެ.