ފުވައްމުލަކުގެ އެޅުމަށް ހަމަޖެހިފައިވާ 800 ހައުސިންގް ޔުނިޓަށް ކުރިމަތިލުމުގެ ފުރުޞަތު ހުޅުވާލައިފި

ދިރިއުޅުމަށް ގޯތި ލިބި ގެދޮރު ނޭޅިވާ ފަރާތްތަކަށް ފުވައްމުލަކުގައި އެޅުމަށް ހަމަޖެހިފައިވާ 800 ހައުސިންގް ޔުނިޓަށް ކުރިމަތި ލުމުގެ ފުރުސަތު ހުޅުވާލައިފިއެވެ.

މިއީ ދެކުނުގެ ސަރަހައްދުގައި ފަހިދިރިއުޅުން މަޝްރޫޢުގެ ދަށުން އެޅުމަށް ހަމަޖެހިފައިވާ 5000 ހައުސިންގ ޔުނިޓުގެ ތެރެއިން ފުވައްމުލަކުގައި އެޅުމަށް ހަމަޖެހިފައިވާ 800 ހައުސިންގް ޔުނިޓެވެ. މިހައުސިންގް ޔުނިޓްތަކަށް ކުރިމަތިލާ ފަރާތްތަކުން މަދުވެގެން 900 އަކަފޫޓޫ ބިމެއް އޮންނަން ޖެހެއެވެ. މިމަޝްރޫޢު އާއި ގުޅޭ ގޮތުން ފުވައްމުލަކު ސިޓީގެ ޑެޕިއުޓީ މޭޔަރ މުހައްމަދު ލިރާރް ވިދާޅުވީ، މިމަޝްރޫޢުގެ ދަށުން ތަރިކައިގެ ގޮތުގައި ލިބިފައިވާ ގޯތިތަކާއި ދިރިއުޅުމަށް ލިބިފައިވާ ބަނޑާރަ ގޯތިތަތަކުގައި ގެދޮރު އަޅައި ދެވޭނެ ކަމަށެވެ.

ސަރުކާރުގެ އަމާޒަކީ މިމަޝްރޫޢުގެ ދަށުން ފަޅުގޯތި މަދުކޮށް މާލީ ގޮތުން ދަތިތައް ހުރުމުން ގެދޮރު ނޭޅިވާ ފަރާތްތަކަށް ގެދޮރު އަޅައި ދިނުމެވެ. މިމަޝްރޫގައި ގެދޮރު އެޅުމަށް ޑައުން ޕޭމެންޓެއް ދައްކަން ނުޖެހޭ އިރު، ގެދޮރަށް ލާރި ދައްކަން ޖެހޭނީ ގެއަޅައި ނިމި ހަވާލު ކުރެވުމުންނެވެ. އަދި މިގެތަކަށް ލާރި ދަށއްކަން 20 އަހަރުގެ މުއްދަތެއް ދެވެއެވެ.

ފުވައްމުލަކު ސިޓީ ކައުންސިލުން ބުނެފައިވަނީ، މިމަޝްރޫގައި ހައުސިންގް ޔުނިޓްތަކަށް ކުރިމަތިލުމަށް ބޭނުންވާ ފަރާތްތަކަށް، ފޯމު ކައުންސިލް އިދާރާއިން ލިބޭނެ ކަމަށެވެ. އެސިޓީގެ ހައުސިންގް ޔުނިޓްތަކަށް ކުރިމަތިލުމަށް ހުޅުވާލާފައވަނީ އަންނަ ސެޕްޓެމްބަރ މަހުގެ 8 ވަނަ ދުވަހު ނިޔަލަށެވެ.

މިދިޔަ ސަރުކާރުންވެސް ފުވައްމުލައް ސިޓީގައިވަނީ 200 ހައުސިންގ ޔުނިޓް އަޅާފައެވެ. ފުވައްމުލަކު ސިޓީ ކައުންސިލުން ވަނީ އެފްލެޓްތަކަށް ކުރިމަތިލީ ފަރާތްތަކަށް ޕޮއިންޓް ލިބުނު ގޮތުގެ ލިސްޓު އާންމު ކޮށް ޝަކުވާއަށް ފުރުޞަތު ހުޅުވާލާފައެވެ. އެގޮތުން ދިރިއުޅުމަށް ދޫކުރަން ހަމަޖެހިފައިވާ 140 ފްލެޓަށް އެސިޓީން 153 ފަރާތަކުން ވަނީ ކުރިމަތި ލާފައެވެ.